جامبىل اتىنداعى فيلارمونيانىڭ جانىنداعى نۇرعيسا تىلەنديەۆ اتىنداعى «وتىرار سازى» اكادەميالىق فولكلورلىق-ەتنوگرافيالىق وركەسترىنىڭ ەۋروپاعا جاساعان تۋرنەسى زور جەتىستىكپەن اياقتالدى.
فرانتسيانىڭ وڭتۇستىگىندەگى مونپەلدەگى ۇلتتىق وپەرا تەاترىندا جانە كانن قالاسىنداعى اتاقتى ميرامار زالىندا ەتنوگرافيالىق وركەستر ەكى بىردەي كونتسەرت قويىپ, تالعامى دا, تالابى دا كۇشتى فرانتسۋزداردى ۇلتتىق اسپاپتاردىڭ سازىمەن ءتانتى ەتتى. «فرانتسياداعى قازاقستان كۇزى» اتتى باعدارلاما اياسىندا وتكىزىلگەن گاسترولدى قازاقستاننىڭ فرانتسياداعى ەلشىلىگى ۇيىمداستىرعان. سونداي-اق, الماتى قالالىق اكىمدىگىنىڭ وكىلدەرى اۋقىمدى مادەني شارانىڭ بۇعان قوسا قازاقستان مەن فرانتسيا اراسىنداعى ستراتەگيالىق ىنتىماقتاستىقتىڭ 10 جىلدىعىنا دا ارنالىپ وتىرعانىن ايتتى.
قازاقتىڭ مۋزىكالىق فولكلورىنىڭ ەڭ عاجاپ ۇلگىلەرىن ساقتاپ قانا قويماي, وركەستردىڭ ساز-اۋەز مۇمكىندىگىن جاڭا ىرعاقتارمەن جەتىلدىرىپ, بايىتىپ وتىرعان «وتىرار سازى» وركەسترىنىڭ شىعارماشىلىعىمەن فرانتسۋز جۇرتشىلىعى العاش رەت جاقىنىراق تانىستىرىلدى. «جاھاندىق الەمدەگى زاماناۋي قازاق مادەنيەتى» باعدارلاماسى وركەستردىڭ ۇستانىمىنا تىم جاقىن ەكەنى دە ناعىز ەۋروپالىق كورەرمەندەر قىزىقتاعان وسى كەشتە انىق اڭعارىلدى.
وركەستر قازاق پەن فرانتسۋزدىڭ ەڭ بەلگىلى اۋەندەرىن ورىنداعان كەزدە باس ديريجەر دينارا تىلەنديەۆا زالداعى كورەرمەندى قولىنىڭ سيقىرلى قوزعالىسىمەن, تاياق ۇشىنا ىلىنگەن تالانتىمەن باۋراپ, مۋزىكا تۇڭعيىعىنا قاراي جەتەلەي ءتۇستى. زالعا قايتا-قايتا شاقىرىلعان ءانشى فارحات كۋبيەۆ بولسا جەز تاڭداي ۇنىمەن فرانتسۋزدارعا ۇزاق-ۇزاق شاپالاق ۇرعىزدى. دالا دىبىسى مەن كونە زامانداردىڭ كۇمبىرىن جەتكىزۋ ءۇشىن قۇرىلعان «وتىرار سازىنىڭ» دومبىراشىلارى مەن قوبىزشىلارى, سازسىرنايشىلارى مەن جەتىگەنشىلەرى بىردە قۇستىڭ سايراعانىن, بىردە تۇلپار تۇياعىنىڭ ءدۇبىرىن, بىردە قاسقىردىڭ ۇلىعانىن, ەندى بىردە جەلدىڭ ىزىڭىن شەكتى جانە ۇرمەلى ساز اسپاپتارىنىڭ كومەيىنەن تۇيدەك-تۇيدەك توگىلتكەندە, فرانۋتسزدار تىم الىستاعى بەيتانىس ەلدىڭ تاريحى مەن تاعدىرىن تانىعانداي كۇي كەشكەنىن ءبىر-بىرىنە جارىسا ايتىپ جاتتى.
ءار كونتسەرتتەن كەيىن كورەرمەندەر ديريجەرگە, انشىلەر مەن ۇيىمداستىرۋشىلاردىڭ جانىنا ارنايى كەلىپ, وزدەرىنە جاڭا اسپاپتاردى عانا ەمەس, جاڭا ۇلتتى جاقىن تانۋعا مۇمكىندىك سىيلاعاندارى ءۇشىن راحمەت ايتىپ, قازاقستانعا ساپارلاپ كەلگىسى كەلەتىندەرىن ايتقان.
ايگۇل احانبايقىزى,
«ەگەمەن قازاقستان»
الماتى