قاراعاندى قالاسىندا ۇستازدار كۇنى مەرەكەسىنە وراي ءوڭىردىڭ ۇزدىك دەپ تانىلعان پەداگوگ ماماندارى وبلىس اكىمىنىڭ ارنايى سىيلىعىمەن ماراپاتتالدى. ولاردىڭ اراسىندا 103 جاسقا تولعان ارداگەر ۇستاز شاۋكەي جۇقان ۇلى مەن 100 جاستاعى قارت مۇعالىم ماريا ۆولودكو دا بولدى.
سالتاناتتى شارانى قاراعاندى وبلىسى اكىمىنىڭ ورىنباسارى جاندوس ابىشەۆ اشتى.
– ەلباسى نۇرسۇلتان نازارباەۆ قازاقستان حالقىنا ارناعان جولداۋىندا مۇعالىمدەردى ولاردىڭ تىكەلەي مىندەتى بولىپ تابىلمايتىن جۇمىستاردان بوساتۋدى ايتىپ, ۇستازداردى جاقتادى. وسىنىڭ بارلىعى «پەداگوگ مارتەبەسى تۋرالى» زاڭدا ەسكەرىلەتىن بولادى. پرەزيدەنت كەلەسى جىلى ول زاڭدى قابىلداۋدى تاپسىردى. قۇرمەتتى پەداگوگتار, قاراعاندى وبلىسىنىڭ اكىمى ەرلان قوشانوۆتىڭ اتىنان سىزدەردى ۇستازدار كۇنىمەن قۇتتىقتاۋعا رۇقسات ەتىڭىزدەر! بۇل اركىم ءۇشىن ءوزىنىڭ العاشقى ۇستازىن ەسكە الۋعا سەبەپ بولاتىن كەرەمەت مەرەكە. العاشقى ۇستاز – ەڭ جاقىن, جۇرەككە ەڭ ىستىق ادام, – دەپ اتاپ ءوتتى جاندوس ابىشەۆ.
سالتاناتتى ماراپاتتاۋ كەشىندە ۇزدىك دەپ تانىلعان 13 ۇستازدىڭ ارقايسىسىنا 500 000 تەڭگەنىڭ سەرتيفيكاتتارى مەن ديپلومدار تابىس ەتىلدى. بۇدان بولەك, ء«بىلىم سالاسىن دامىتۋعا قوسقان ەرەكشە ۇلەسى ءۇشىن» اتالىمى بويىنشا 8 پەداگوگ مامانعا 1 ميلليون تەڭگەدەن سىياقى بەرىلدى. سالتاناتتى كەشتىڭ سوڭى ونەر جۇلدىزدارىنىڭ كونتسەرتىمەن تۇيىندەلدى. ۇستازدار الدىندا تانىمال ءانشى جانە پروديۋسەر قىدىرالى بولمانوۆ پەن قاراقات ءابىلدينا, ءانشى ادام, ءبيشى اتاي ومىرزاقوۆ, سونىمەن بىرگە ۆوكال جانە حورەوگرافيا ۇجىمدارى ونەر كورسەتتى.
قايرات ءابىلدا,
«ەگەمەن قازاقستان»
قاراعاندى