دۇنيەجۇزىلىك جۇرەك كۇنى مەن دۇنيەجۇزىلىك ترومبوز كۇنىنە (13 قازان) وراي قازاقستانداعى SANTO كومپانياسى جۇرەك-قانتامىر اۋرۋلارىنا جۇرتشىلىقتىڭ نازارىن اۋدارتۋ ماقساتىندا الەۋمەتتىك ناۋقاندى باستادى.
كارديولوگ-دارىگەرلەر سوڭعى ۋاقىتتا ەلىمىزدە جۇرەك اۋرۋلارىنىڭ كورسەتكىشى گەومەتريالىق پروگرەسسپەن ءوسىپ كەلە جاتقاندىقتان, بۇل دەرتتىڭ بەلەڭ الۋىنا توقتاۋ سالۋ ءۇشىن تاباندى قادامدار جاساۋ قاجەتتتىگىن العا تارتۋدا.
كومپانيا ءوتىنىشى بويىنشا, ءتۇرلى جانردا ءان ايتاتىن قازاقستاننىڭ تانىمال ءۇش ورىنداۋشىسى وزدەرىنە بەيمالىم ادامداردىڭ جۇرەك ىرعاعىنا سايكەس كومپوزيتسيالار جازىپ شىعاردى. كومپوزيتسيا دايىن بولعان سوڭ عانا, بۇل اندەر كىمنىڭ جۇرەگىنىڭ «اۋەنىنە» ساي جازىلعاندىعى بەلگىلى بولدى.
جوباعا تارتىلعان ءالي وقاپوۆ بىلاي دەيدى: «شىنىمدى ايتسام, باسىندا كومپوزيتسيانى جازۋ قيىنعا سوقتى. بىرىنشىدەن, اۋەندى ءبىر مينۋتقا سىيدىرۋ قاجەت. ەڭ باستىسى, مۋزىكانى ناقتى ءبىر ىرعاققا كەلتىرۋ قاجەت بولدى. سوندىقتان اۋەندى جىلدامداتا, نە باياۋلاتا المايسىڭ. بۇل دىبىستىڭ نە ايتقىسى كەلىپ تۇرعانىن بارىنشا سەزىنۋگە تىرىستىم. ناتيجەسىندە مۋزىكا وتە تەز دۇنيەگە كەلدى. باستاپقىدا بۇل جۇرەك كىمدىكى ەكەنىن بىلمەدىم. ماعان بۇل كارديولوگ-دارىگەردىڭ نەمەسە كاسكادەردىڭ نەمەسە انانىڭ جۇرەگىنىڭ ىرعاعى بولۋى مۇمكىن دەپ قانا ايتتى. مەن سول ىرعاقتى تىڭداعان كەزدە, جۇرەك دىبىسى وتە تەرەڭ, قۋاتتى ءارى مازاسىز بولعاندىقتان, كاسكادەردىڭ جۇرەگى دەپ ويلاپ قالدىم. سويتسەم, انانىڭ جۇرەگى بولىپ شىقتى. مۇمكىن بۇل قىزىق ەستىلەتىن شىعار, بىراق بۇل دىبىستا ەرەكشە ءبىر تىلسىم كۇش بار. سونىڭ ارقاسىندا ءوز سەزىمدەرىمدى مۋزىكا ارقىلى تەز جەتكىزە الدىم».
اتالمىش جوباعا انا رەتىندە قاتىسقان روزا رىمباەۆا: ء«وز جۇرەگىمە العاش رەت قۇلاق اسقان كەزدە, ونىڭ وتە تەرەڭ ءارى مازاسىزدىققا تولى ەكەندىگىن سەزىندىم. ءومىرىمنىڭ سوڭىنا دەيىن بۇل دىبىستىڭ وتە تىنىش, بىرقالىپتى, مەيىرىمگە تولى بولعانى قالايمىن. ادامدار ءوز جۇرەگىنە كوڭىل ءبولۋى ءتيىس, ويتكەنى ول – اعزامىزداعى ەڭ باستى مۇشە. ءبىز كوبىنەسە قۇلاپ سۇرىنگەن كەزدە عانا دارىگەرلەردىڭ كومەگىنە جۇگىنىپ جاتامىز. جىلىنا ءبىر مارتە بولسا دا دارىگەرلەرگە قارالىپ, دەنساۋلىعىمىزدى تەكسەرىپ تۇرۋ كەرەك» دەيدى.
جەرەبە تارتۋ ناتيجەسىندە JCS توبىنىڭ مۋزىكانتتارىنا جوعارعى ساناتتاعى كارديولوگ-دارىگەر قايرات كارىباەۆتىڭ جۇرەك ىرعاعىنا سايكەس كومپوزيتسيانى جازۋ مۇمكىندىگى بۇيىردى.
– جۇرەك ىرعاعى مۋزىكا دىبىسىنا قوندىرىلعان كەزدە, وتە قىزىقتى دۇنيەلەر ومىرگە كەلەدى ەكەن. ءاربىر ادامدا, ءاربىر ءتىرى زاتتا ءارتۇرلى مۇشەنىڭ, مىسالى, بۇيرەك, باۋىر, ەڭ باستىسى, جۇرەكتىڭ ءوز بيوىرعاعى بولادى. ءبىز جۇرەككە ۇنەمى قۇلاق اسپاساق تا, ءبىزدىڭ بۇكىل ءومىرىمىز ونىڭ ىرعاعىنا كونەدى, وسىنى ەستەن شىعارماعانىمىز ابزال, – دەيدى دارىگەر قايرات راحماني ۇلى.
– مەن كۇندەلىكتى ناۋقاستارمەن جۇمىس جاسايمىن. ادامدار اۋرۋ بەلگىلەرىن نە وستەوحوندروز, نە وكپەدەگى سىرقات دەپ ءتۇسىنىپ, ميوكارد ينفاركتىسىنىڭ بەلگىلەرىن وتكىزىپ الادى. ءبىز ۇدايى جۇرەك ىرعاعىنىڭ بۇزىلعاندىعىنا ءجىتى كوڭىل بولمەيمىز. الايدا جۇرەك – بىرەۋ, سوندىقتان ونى كۇتۋ قاجەت, – دەيدى دارىگەر.
«سوڭعى جىلدارداعى وڭدى ۇردىسكە قاراماستان, قازاقستاندا قان اينالىم جانە جۇرەك-قانتامىر اۋرۋلارى جالپى اۋرۋ-سىرقاتتار اراسىندا كوش باستاپ, ءولىم-ءجىتىمنىڭ كوپتىشىگى جاعىنان ءبىرىنشى ورىندا تۇر. تانىمال تۇلعالاردىڭ قاتىسۋىمەن تۇسىرىلگەن الەۋمەتتىك روليكتەر قازاقستاندىقتاردىڭ نازارىن وسى ماسەلەگە اۋدارتىپ, ءوز دەنساۋلىقتارىنا كوڭىل بولۋگە, دەرتتىڭ الدىن الىپ, سالاۋاتتى ءومىر سالتىن ۇستانۋعا تۇرتكى سالادى دەگەن سەنىمدەمىن», – دەدى SANTO كومپانياسىنىڭ قوعاممەن بايلانىس جونىندەگى ديرەكتورى ەلەنا ارىشەۆا.
ايناش ەسالي,
«ەگەمەن قازاقستان»
الماتى