ەكى مىڭ جىلدىق تاريحى بار تاراز توپىراعىندا «Taraz – Aspara fashion week» حالىقارالىق ءسان اپتالىعى باستالدى. قازاقستانداعى وزبەكستان جىلى اياسىندا جامبىل وبلىسى اكىمدىگىنىڭ جانە «اسىل ديزاين» ءسان ءۇيىنىڭ بىرلەسە ۇيىمداستىرۋىمەن «اراي پلازا» كەشەنىندە وتكەن سالتاناتتى شاراعا مەملەكەتتىك حاتشى, قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە وتباسىلىق دەموگرافيالىق ساياسات جونىندەگى كوميسسيانىڭ ءتورايىمى گۇلشارا ابدىقالىقوۆا قاتىستى.
گۇلشارا ناۋشاقىزى الەمنىڭ يتاليا, ءۇندىستان, گوللانديا, قىتاي, فرانتسيا, رەسەي سەكىلدى 19 مەملەكەتىنەن كەلگەن قوناقتاردى سالتاناتتى شارانىڭ اشىلۋىمەن قۇتتىقتاپ, ولاردىڭ جۇمىستارىنا ساتتىلىك تىلەدى. تاريحىمىزدىڭ تەمىرقازىعى بولىپ سانالاتىن تاراز قالاسىندا وسىنداي شارانىڭ ءوتىپ وتىرعانىنا قۋانىشتى ەكەنىن جەتكىزدى. بۇدان كەيىن وزبەكستان رەسپۋبليكاسى ايەلدەر كوميتەتى توراعاسىنىڭ ورىنباسارى مۋكاررام نۋرماتوۆا اۋەلى تارازدىقتارعا وزبەك حالقىنىڭ ىستىق سالەمىن جەتكىزدى. قازاق ەلىندە ءوتىپ جاتقان ءسان اپتالىعىنىڭ ماڭىزدىلىعىنا توقتالىپ, بۇگىنگى تاڭدا قازاق پەن وزبەك حالىقتارى اراسىنداعى دوستىق بايلانىستىڭ جوعارى دەڭگەيدە ەكەنىن اتاپ ءوتتى. ال ءوز سوزىندە جامبىل وبلىسىنىڭ اكىمى اسقار مىرزاحمەتوۆ ەجەلدەن تاراز تاريحي قالا ەكەنىن ايتا كەلىپ, باي مادەنيەتىمىز بەن تاريحىمىزدى تاماشالاۋعا كەلگەن شەتەلدىك ازاماتتارعا العىسىن ءبىلدىردى. سونىمەن قاتار تارازدىق ديزاينەرلەردىڭ قازاق ەلىنە عانا ەمەس, بىرقاتار شەتەلدەرگە دە تانىمال ەكەنىن, سوندىقتان دا بۇگىنگى سالتاناتتى شارانىڭ جوعارى دەڭگەيدە وتەتىندىگىنە سەنەتىندىگىن جەتكىزدى.
بۇدان كەيىن جۋىردا عانا يتاليا مەملەكەتىنىڭ ميلان قالاسىندا ونەر كورسەتىپ, قازاق ءسان ۇلگىسىن الەمگە تانىتىپ قايتقان جەرگىلىكتى ديزاينەر ايدارحان قاليەۆتىڭ «تاراز پەرىشتەلەرى» ءسان ۇلگىلەرى كوپشىلىككە كورسەتىلدى. شىعىستىق ۇلگىدە ساحنالانعان بۇل كورىنىستى الەمنىڭ كوپتەگەن ەلىنەن كەلگەن سانگەرلەر قىزىعا تاماشالادى. سونىمەن قاتار تاراز تاريحىنا قاتىستى دا مالىمەتتەرگە قانىقتى.
جالپى, تاراز وڭىرىندە العاش رەت ۇيىمداستىرىلىپ وتىرعان «Taraz – Aspara fashion week» حالىقارالىق ءسان اپتالىعى قازان ايىنىڭ 8-12-ءسى ارالىعىندا جامبىل وبلىسىنىڭ اۋماعىندا وتەدى. بۇل ورايدا الەمنىڭ 19 مەملەكەتىنەن كەلگەن 30 ءسان ديزاينەرى اۋليەاتا وڭىرىندە ءوز شەبەرلىكتەرىن ورتاعا سالادى. سونىمەن قاتار جامبىلدىق 55 قولونەر شەبەرىنىڭ ەڭبەكتەرى دە شەتەلدەن كەلگەن قوناقتاردىڭ نازارىنا ۇسىنىلادى. بۇل كورمەدە اۋليەاتالىقتار الەمدىك دەڭگەيدەگى ءسان ۇلگىسىنەن حاباردار بولىپ قانا قويماي, وزدەرىنىڭ قولدان جاساعان ءتۇرلى بۇيىمدارىن دا شەتەلدىكتەرگە جارنامالاي الادى. بۇدان بولەك, شەتەلدىك تۋريستەر تاراز قالاسىنداعى بىرنەشە نىسانمەن قاتار, اقىرتاس كەشەنىندە جانە ايشا ءبيبى كەسەنەسىندە بولادى. ولار جالپى وڭىردەگى 11 تاريحي ورىندى ارالاپ, ۇلت تاريحىمەن دە كەڭىنەن تانىسادى. اپتالىق بارىسىندا حالىقارالىق دەڭگەيدەگى 7, رەسپۋبليكالىق دەڭگەيدەگى 5 مەموراندۋمعا قول قويىلادى دەپ كۇتىلۋدە.
جامبىل وبلىستىق تۋريزم باسقارماسىنىڭ باسشىسى قارلىعاش ارالبەكوۆانىڭ ايتۋىنشا, وسى ۋاقىت ارالىعىندا شەتەلدىك قوناقتار اۋليەاتا ءوڭىرىنىڭ تاريحي جەرلەرىنە ساياحات جاساپ قانا قويماي, «تورتكۇل» كەشەنىندە قازاقتىڭ ۇلتتىق تاعامدارىمەن دە تانىسادى.
اتالعان ءسان اپتالىعىنىڭ اشىلۋ سالتاناتى جوعارى دەڭگەيدە ءوتتى. مۇندا وزبەكستان مەملەكەتىنەن كەلگەن ديزاينەرلەردىڭ ۇلگىلەرى كوپشىلىك نازارىنا ۇسىنىلدى. بۇل ورايدا وزبەك ەلىنەن كەلگەن ديزاينەر سابينا ابدۋنازاروۆا تاراز توپىراعىنا كەلىپ, وسىنداي شاراعا قاتىسقانىنا قۋانىشتى ەكەنىن جەتكىزدى. سونىمەن قاتار الداعى ۋاقىتتاردا دا ءسان اپتالىعى قازاق جەرىندە ءوتىپ تۇرسا دەگەن تىلەگىن ايتتى. ايتا كەتەيىك, تاراز قالاسىندا تۇڭعىش رەت ۇيىمداستىرىلىپ وتىرعان سالتاناتتى شارا ەندى جىل سايىن جالعاسىن تاباتىن بولادى.
حاميت ەسامان,
«ەگەمەن قازاقستان»
جامبىل وبلىسى