تارازدا ەلباسى جولداۋىن ىسكە اسىرۋعا ارنالعان جيىن ءوتتى

القالى جيىنعا وبلىس جانە اۋدان اكىمدەرىنىڭ ورىنباسارلارى, وبلىستىق باسقارمالار مەن دەپارتامەنتتەردىڭ جانە جوعارى وقۋ ورىندارىنىڭ باسشىلارىمەن قاتار, ءتۇرلى سالا وكىلدەرى قاتىستى. مىڭعا تارتا ادام قاتىسقان جيىندا جامبىل وبلىسىنىڭ اكىمى اسقار مىرزاحمەتوۆ بايانداما جاساپ, باستى قۇجات اياسىندا اۋليەاتا وڭىرىندە اتقارىلىپ جاتقان جانە الداعى ۋاقىتتا اتقارىلاتىن جوسپارلى جۇمىستار تۋرالى xابارلادى.

– ءبىرىنشى باسىمدىققا سايكەس, 2019 جىلدىڭ 1 قاڭتارىنان  باستاپ 101 مىڭعا جۋىق قىزمەتكەر ءۇشىن ەڭ تومەنگى جالاقىنى 28284 تەڭگەدەن 42426 تەڭگەگە دەيىن ءوسىرۋ ءۇشىن وبلىستىق بيۋدجەتتىڭ كىرىستەرى مەن شىعىستارى قايتا قارالاتىن بولادى. بۇل بيۋدجەتتەن تولەنەتىن تولەمدەر بويىنشا. وسىعان وراي, بيزنەس وكىلدەرى دە بۇل شەشىمدى قۋاتتاۋ ءۇشىن, ەڭبەك ونىمدىلىگىن ارتتىرۋلارى قاجەت. ەكىنشىدەن, جولداۋدا بيزنەستى وركەندەتۋدىڭ تۇراقتى كوزدەرىن قالىپتاستىرىپ, جەكە ينۆەستيتسيانى ىنتالاندىرۋ جانە نارىق ەركىندىگىن قولداۋ قاجەتتىلىگىنە باسىمدىق بەرىلگەن. سوندىقتان, كاسىپكەرلىك باسقارماسى مەن اۋدان, قالا اكىمدەرى قابىلدانعان شارالاردىڭ اۋقىمىن كەڭەيتىپ, باعىتتالعان جۇمىستى كۇشەيتەتىن بولادى.

«بيزنەستىڭ جول كارتاسى – 2020» باعدارلاماسىنىڭ مەرزىمى 2025 جىلعا دەيىن ۇزارتىلۋىن ەسكەرە وتىرىپ, كەلەسى جىلعا وسى ماقساتتا جوسپارلانعان 1,2 ميلليارد تەڭگەنى كەمىندە 2 ەسەگە ۇلعايتۋ قاجەت. بۇل جاڭادان اشىلاتىن كاسىپكەرلىك پەن كاسىبىن كەڭەيتەتىن بيزنەستىڭ ۇلەسىن 30 پايىزعا ارتتىرۋعا جانە جاڭا جۇمىس ورىندارىن اشۋعا مۇمكىندىك بەرەدى. شاعىن كاسىپكەرلىكتى قولداۋ ماقساتىندا «دامۋ» قورىمەن بىرلەسە قاراجات ءبولۋ پرينتسيپىمەن 2018 جىلى وبلىستىق بيۋدجەتتەن 500 ميلليون تەڭگە, «دامۋ» قورىنان 1 ميلليارد تەڭگە قاراستىرىلعان. ال, اۋىل تۇرعىندارىنا شاعىن نەسيە بەرۋ ءۇشىن جەرگىلىكتى بيۋدجەتتەن قوسىمشا 1,0 ميلليارد تەڭگە ءبولىنىپ, جالپى سوما 5 ميلليارد تەڭگەگە جەتتى. كەلەسى جىلى بۇل قارجىلاردىڭ كولەمىن بارىنشا كوبەيتەتىن بولامىز,  – دەدى اكىم.

اسقار مىرزاحمەتوۆ ءوز سوزىندە قازاقستاندىقتاردىڭ ءال-اۋقاتىن ارتتىرۋعا باعىتتالعان جولداۋدىڭ ماڭىزدىلىعىن اتاپ ءوتىپ, ونداعى حالىق تابىسىنىڭ ءوسۋى, تۇرمىس ساپاسىن ارتتىرۋ, ءومىر سۇرۋگە جايلى ورتا قالىپتاستىرۋ,  ازاماتتار سۇرانىسىنا بەيىمدەلگەن مەملەكەتتىك  اپپارات, ءتيىمدى سىرتقى ساياسات جانە ءاربىر قازاقستاندىقتىڭ ەلىمىزدەگى وزگەرىستەر ۇدەرىستەرىنە اتسالىسۋى سەكىلدى التى باسىمدىققا جەكەلەي توقتالدى. جولداۋ اياسىندا جامبىل وبلىسىندا ءار سالا بويىنشا اتقارىلىپ جاتقان جۇمىستاردى باياندادى. ونىڭ ىشىندە باسپانا, ساپالى ءبىلىم, دەنساۋلىق ساقتاۋ سالالارى تۋرالى دا ايتىپ ءوتتى. 

 – جولداۋدا اگروونەركاسىپ كەشەنىندەگى ەڭبەك ونىمدىلىگىن جانە قايتا وڭدەلگەن ءونىمىنىڭ ەكسپورتىن 2022 جىلعا قاراي 2,5 ەسە كوبەيتۋ مىندەتى تۇر. جىل باسىنان 1,8 مىڭ توننا ەت ەكسپورتقا شىعارىلدى. بۇگىندە, وبلىستا اۋىل شارۋاشىلىعى ونىمدەرىن قايتا وڭدەيتىن 183 كاسىپورىن جۇمىس ىستەۋدە. بىراق ساپالى, تەرەڭ وڭدەۋمەن اينالىساتىن كاسىپورىنداردىڭ سانى از. ولاردىڭ سانىن كوبەيتۋ ءۇشىن وسى جىلى جۇزەگە اساتىن 4 جوبا ءوڭىردىڭ ارنايى كارتاسىنا  ەندى. بۇدان بولەك, قۇنى 8 ميلليارد تەڭگەنى قۇرايتىن 7 ينۆەستيتسيالىق باستاما قولداۋ تاپتى, – دەدى اكىم.

ءوڭىر باسشىسى ەلباسى جولداۋىنداعى مىندەتتەر مەن تالاپتاردى جۇمىلا ورىنداۋعا بارشا جامبىلدىقتاردى شاقىرىپ, ەل دامۋىنا ەلەۋلى ۇلەس قوسۋ ءاربىر قازاقستاندىقتاردىڭ مەرەيلى مىندەتى ەكەنىن باسا ايتتى.

بۇدان كەيىن «ساحا» شارۋا قوجالىعىنىڭ جەتەكشىسى ساحا ماناتوۆ, «جامبىلگيپس» اق تەحنيكالىق ديرەكتورى بولات تالاسباەۆ, تاراز قالاسىنداعى №3 دارىندى بالالارعا ارنالعان مەكتەپتىڭ مۇعالىمى گۇلشات وتەگەنوۆا, وبلىستىق تۋبەركۋلەزگە قارسى ديسپانسەردىڭ باس دارىگەرى قايرات جەتىباەۆ, وبلىستىق ىشكى ىستەر دەپارتامەنتىنىڭ باستىعى, پوليتسيا پولكوۆنيگى ارمان ورازاليەۆ, قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى وبلىس بويىنشا دەپارتامەنتى باسشىسىنىڭ ورىنباسارى نۇرلان ەركەباەۆ, تاراز مەملەكەتتىك پەداگوگيكالىق ۋنيۆەرسيتەتىنىڭ ستۋدەنتى ءۇمىت سەيسەنعالي جانە وزگە دە بىرقاتار ازاماتتار ەلباسى جولداۋىنداعى يگى ماقساتتاردى زور ىقىلاسپەن قابىلداعاندارىن جەتكىزىپ, وزدەرىنىڭ وي-پىكىرلەرىن ورتاعا سالدى.  

حاميت ەسامان,

«ەگەمەن قازاقستان»

جامبىل وبلىسى