رىسحان سارسەكەەۆانىڭ ماماندىعى – زاڭگەر. جوعارى وقۋ ورنىن تامامداعان سوڭ ول ماماندىعىنا ساي جۇمىستى وڭاي تاپتى. الدىمەن سوت ورىنداۋشىسى بولدى, ودان كەيىن جەكەمەنشىك كومپانيادا زاڭگەر رەتىندە تاجىريبە جينادى. قازىر ول – ءوز ءىسىن دوڭگەلەتىپ وتىرعان كاسىپكەر-اسپاز.
ماماندىعى زاڭگەر بولسا دا رىسحان بۇرىننان جەكە كاسىپتىڭ يەسى بولۋدى ارماندايتىن. باسىندا ءىسىن نەدەن باستايتىنىن بىلمەي, اۋرە-سارساڭعا تۇسەدى. ءبىر جاعىنان ءتورت جىل وقىپ, تەر توگىپ العان ديپلومى كادەگە اسپاي قالا ما دەپ تە الاڭدايدى. بىراق تاۋەكەلگە بەل بايلاپ, كۇتپەگەن شەشىمگە كەلەدى. 2015 جىلى ءۇشىنشى بالاسىن دۇنيەگە اكەلىپ, دەكرەتتىك دەمالىسقا شىققاندا ءوزىنىڭ نان مەن توقاش پىسىرۋگە ەبى بار ەكەنىن بايقايدى. نە پىسىرسە دە ءدامدى بولىپ شىعادى, بالالارى تالاسىپ-تارماسىپ جەيدى. وزىنە دە نان ءپىسىرۋ ۇناپ قالادى. ناننىڭ ءتاتتى بولىپ شىعۋى رەتسەپتتى قاتاڭ ساقتاۋمەن عانا شەكتەلمەيتىنىنە, وعان جۇرەگىنىڭ جىلۋىن دا بەرۋ قاجەتتىگىنە كوزى جەتەدى. ارا-تۇرا پىسىرگەن نانىنان كورشىلەرىنە دە ءدام تاتقىزادى. ولار دا رىسحاننىڭ نانىن ماقتاي باستايدى. ەلدىڭ جىلى پىكىرىنەن كەيىن وعان نان, توقاش ونىمدەرىن ءپىسىرىپ ساتسام قايتەدى دەگەن وي كەلەدى. ەسەپتەپ قاراسا, كومپانيادان الاتىن ايلىق جالاقىسىن وسى كاسىپتەن جارتى ايدا-اق شىعارىپ الادى ەكەن. ونىڭ ۇستىنە ءوز-وزىنە قوجا, جۇمىستان قالىپ قويمايىن دەپ اسىقپايدى. ءبىر مەزگىل ءۇيدىڭ تىرشىلىگىنە ۋاقىت تاۋىپ, بالالارىنا دا كوبىرەك كوڭىل بولەدى. وسىنىڭ ءبارىن وي ەلەگىنەن وتكىزگەن ول ارنايى وقىتۋ كۋرسىنا بارىپ, وسى سالاداعى مىقتى مامانداردىڭ شەبەرلىك دارىستەرىنەن وتەدى.
سونىمەن 2015 جىلى رىسحان سارسەكەەۆا ءوزى تۇراتىن بەسكول اۋىلىندا «Caramel» دەگەن اتاۋمەن اسپازدىق ءدامحانا اشادى. سولتۇستىك قازاقستان وبلىستىق كاسىپكەرلەر پالاتاسىنا قايىرىلىپ, مەملەكەتتىك كومەك الۋعا ءوتىنىش بەرەدى.
ء«وز ءىسىمدى الدىمەن نان مەن توقاش پىسىرۋدەن باستاعان مەن كوپ ۇزاماي كونديتەرلىك ونىمدەردىڭ بىرنەشە ءتۇرىن جاساۋدى ۇيرەنىپ الدىم. ساتىپ الۋشىلارىم دا كوبەيىپ, ولار ماعان الدىن الا كەزەككە جازىلاتىن بولدى. تاپسىرىس بەرەۋشىلەردىڭ قاتارى كۇننەن-كۇنگە ارتتى. بۇل جاعداي مەنى قاناتتاندىرىپ, قولدان جاساعان ونىمدەرىم بۇدان دا ءتاتتى, بۇدان دا ساپالى بولۋى ءۇشىن شەبەرلىگىمدى شىڭداي ءتۇستىم», دەيدى رىسحان.
كاسىپكەرلەر پالاتاسى رىسحاننىڭ ءوتىنىشىن جەرگە تاستامايدى. ءبولىم باستىعى اسەل ساماراتوۆا مەن مەنەدجەر دميتري شلەدوۆيتس بيزنەس-جوسپار جاساۋعا كومەكتەسىپ, ءوزى تۇراتىن قىزىلجار اۋداندىق مانساپ ورتالىعىنان 1,5 ملن تەڭگە گرانت الۋعا قول جەتكىزەدى. بۇل قاراجاتقا رىسحان الدىمەن اس پىسىرۋشىگە قاجەتتى ميكسەر, بلەندەر, توڭازىتقىش سەكىلدى جابدىقتار ساتىپ الادى. بۇرىن قامىردى قولمەن يلەپ كەلگەن كەلىنشەك ەندى ەلەكتر نان يلەگىشتىڭ كومەگىمەن ساپالى قامىر دايىنداپ الاتىن بولدى.
قازىر «Caramel» اسپازدىق-كافەتەريىنىڭ ونىمدەرى تۇرلەنە تۇسكەن. تۇرعىندار بۇل جەردەن ءتاتتى سامسا, چەبۋرەك, كونديتەرلىك ونىمدەر, ىستىق تاماق پەن سالاتتاردى تالاسا-تارماسا الادى. ال رىسحاننىڭ ءوزى بۋى بۇرقىراعان اس دايىندايتىن بولمەدە ماڭداي تەرىن ءسۇرتىپ قويىپ, تالماي ەڭبەك ەتىپ جاتادى.
بۇگىندە ول ءوز ونىمدەرىن پەتروپاۆل قالاسىنىڭ دۇكەندەرى مەن ءدامحانالارىنا دا ساتۋدى كوزدەپ وتىر. «كاسىپتى قولىڭا الىپ, ەرىنبەي ەڭبەك ەتسەڭ, ەش قيىندىعى جوق ەكەن. مىنە, از ۋاقىتىڭ ىشىندە كاسىپكەر بولىپ شىعا كەلدىك. ءوزىمنىڭ تۇراقتى الۋشىلارىم دا قالىپتاستى», دەپ جىميادى ول.
سولتۇستىك قازاقستان وبلىسى