ءراسىم بارىسىندا قازاقستان پرەزيدەنتى نۇرسۇلتان نازارباەۆقا قىتاي حالىق رەسپۋبليكاسىنىڭ توتەنشە جانە وكىلەتتى ەلشىسى چجان سياو, يسپانيا كورولدىگىنىڭ توتەنشە جانە وكىلەتتى ەلشىسى داۆيد ارتۋرو كارريەدو توماس, يزرايل مەملەكەتىنىڭ توتەنشە جانە وكىلەتتى ەلشىسى ليات ۆەكسەلمان, سلوۆاكيا رەسپۋبليكاسىنىڭ توتەنشە جانە وكىلەتتى ەلشىسى ميلان كوللار جانە ەۋروپا وداعىنىڭ توتەنشە جانە وكىلەتتى ەلشىسى سۆەن-ولوۆ كارلسسون سەنىم گراموتاسىن تاپسىردى.
نۇرسۇلتان نازارباەۆ ەلشىلەردى قازاقستانداعى ديپلوماتيالىق ميسسيالارىنىڭ رەسمي تۇردە باستالۋىمەن قۇتتىقتاپ, ولارعا مەملەكەتارالىق قاتىناستاردى دامىتۋ جانە ونى ودان ءارى ىلگەرىلەتۋ ىسىندە تابىس تىلەدى.
– سىزدەردىڭ ميسسيالارىڭىزدىڭ باستالۋى ەل دامۋىنىڭ ماڭىزدى كەزەڭىمەن تۇسپا-تۇس كەلىپ وتىر. ءبىزدىڭ ستراتەگيالىق باعىتىمىز – الەمنىڭ وزىق دامىعان 30 ەلىنىڭ قاتارىنا قوسىلۋ. وسىعان وراي, قاجەتتى باعدارلامالاردىڭ ءبارىن قابىلداپ, كەشەندى رەفورمالاردى جۇزەگە اسىرىپ كەلەمىز, – دەدى مەملەكەت باسشىسى.
قازاقستان پرەزيدەنتى الەمدىك داعدارىس كۇشەيگەن جاعدايدا سەنىمدى مەملەكەتارالىق قاتىناستار ورناتۋدىڭ ماڭىزدى ەكەنىن ايتتى.
– جاقىندا نيۋ-يوركتە وتكەن بىرىككەن ۇلتتار ۇيىمى باس اسسامبلەياسىنىڭ كەزەكتى سەسسياسىندا كەيبىر ەلدەر اراسىندا «سەنىم داعدارىسىنىڭ» ودان ءارى ءورشي تۇسكەنى انىق بايقالدى. ءوزارا سەنىم ورنىقپاسا, داعدارىسقا قارسى كەز-كەلگەن ءىس-قيمىلدىڭ وڭ ناتيجەسى بولمايدى, – دەدى نۇرسۇلتان نازارباەۆ.
مەملەكەت باسشىسى حالىقارالىق جانە وڭىرلىك قاقتىعىستاردى رەتتەۋ ءۇشىن قازاقستاننىڭ جۇرگىزىپ وتىرعان كوپۆەكتورلىق ساياساتى مەن كۇش-جىگەرىنىڭ تيىمدىلىگىن اتاپ ءوتتى.
ەلباسى قازاقستان مەن قىتاي اراسىنداعى قارىم-قاتىناستاردىڭ قازىرگى جاعدايى مەن دامۋ پەرسپەكتيۆالارىنا ارنايى توقتالدى.
– قازاقستان قىتايمەن جان-جاقتى ستراتەگيالىق ىنتىماقتاستىقتى دامىتۋعا ەرەكشە ءمان بەرەدى. ديپلوماتيالىق بايلانىس ورناعان ساتتەن باستاپ ءبىز تاتۋ كورشىلىك جانە ءوزارا تۇسىنىستىك رۋحىندا دامىپ كەلە جاتقان مەملەكەتارالىق قاتىناستاردىڭ ۇلگىلى مودەلىن قۇردىق. بۇگىندە ەكى ەلدىڭ ۇكىمەتتەرى ءوزارا كەلىسىمدەردى جۇزەگە اسىرۋ ءۇشىن بەلسەندى جۇمىس اتقارۋدا. «نۇرلى جول» جاڭا ەكونوميكالىق ساياساتىن «جىبەك جولىنىڭ ەكونوميكالىق بەلدەۋى» باستاماسىمەن ۇشتاستىرۋ جونىندەگى ىنتىماقتاستىققا ەرەكشە كوڭىل ءبولىنىپ وتىر, – دەدى مەملەكەت باسشىسى.
سونداي-اق, نۇرسۇلتان نازارباەۆ بيىل ەلىمىزدىڭ ەۋروپا وداعىمەن ديپلوماتيالىق قاتىناس ورناتقانىنا 25 جىل تولعانىن اتاپ ءوتتى.
– قازىرگى باستى مىندەتىمىز – 2015 جىلى قول قويىلعان قازاقستان مەن ەۋرووداق اراسىنداعى كەڭەيتىلگەن ارىپتەستىك پەن ىنتىماقتاستىق تۋرالى كەلىسىمدى جۇزەگە اسىرۋ. سونداي-اق, بريۋسسەلدىڭ ورتالىق ازيا ەلدەرىنە قاتىستى جاڭا ستراتەگياسىن ازىرلەۋگە كۇش جۇمىلدىرۋ كەرەك. ءبىز قازاقستان مەن ەۋرووداق اراسىنداعى ۆيزالىق رەجىمدى جەڭىلدەتۋ ماسەلەسى دۇرىس شەشىمىن تابادى دەپ سەنەمىز, – دەدى قازاقستان پرەزيدەنتى.
راسىمگە قاتىسۋشىلار الدىندا سويلەگەن سوزىندە مەملەكەت باسشىسى قازاقستان مەن يسپانيا كورولدىگى اراسىنداعى قاتىناستاردىڭ ستراتەگيالىق سيپاتىن اتاپ ءوتتى.
– 2017 جىلى ماۋسىم ايىندا ۇلى مارتەبەلى يسپانيا كورولى VI فەليپە قازاقستانعا العاشقى رەسمي ساپارمەن كەلىپ, «ەكسپو-2017» حالىقارالىق كورمەسىنىڭ اشىلۋىنا قاتىستى. ءوزارا ۋاعدالاستىقتارىمىزدى جۇزەگە اسىرۋعا ەكونوميكا جانە ونەركاسىپ سالاسىنداعى ىنتىماقتاستىق تۋرالى ۇكىمەتارالىق كوميسسيا مەن ىسكەرلىك كەڭەس زور ۇلەس قوسىپ كەلەدى, – دەدى نۇرسۇلتان نازارباەۆ.
سونداي-اق, ەلباسى ەكونوميكانىڭ ءتۇرلى سەكتورىندا قازاقستان مەن يزرايل اراسىنداعى قاتىناستاردى ودان ءارى دامىتۋعا مۇددەلى ەكەنىن ءبىلدىردى.
– 2016 جىلى يزرايل پرەمەر-ءمينيسترى بينيامين نەتانياحۋدىڭ قازاقستانعا رەسمي ساپارى جانە سونىڭ بارىسىندا وتكەن بيزنەس-فورۋم ءوزارا ىقپالداستىعىمىزدىڭ اياسىن كەڭەيتۋگە تىڭ سەرپىن بەردى. ءبىز ءوزارا قاتىناستارىمىزدى, اسىرەسە اۋىل شارۋاشىلىعى, يننوۆاتسيالىق تەحنولوگيالار جانە دەنساۋلىق ساقتاۋ سالالارىن ودان ءارى دامىتۋعا مۇددەلىمىز, – دەدى مەملەكەت باسشىسى.
قازاقستان پرەزيدەنتى سلوۆاكيامەن ىنتىماقتاستىقتىڭ وڭ قارقىنىن اتاپ ءوتىپ, ەكى ەل اراسىنداعى ساۋدا اينالىمىن ارتتىرۋدىڭ جانە ەكونوميكالىق ىنتىماقتاستىقتىڭ جاڭا باعىتتارىن دامىتۋدىڭ ماڭىزدى ەكەنىن ايتتى.
– ساۋدا-ەكونوميكالىق بايلانىستاردى نىعايتۋعا ەكونوميكالىق جانە عىلىمي-تەحنيكالىق ىنتىماقتاستىق جونىندەگى ۇكىمەتارالىق كوميسسيا زور ۇلەس قوسىپ كەلەدى. بولاشاقتا بىزگە تاۋار اينالىمىن ۇلعايتىپ, ءوزارا ەكونوميكالىق قاتىناستاردى دامىتۋدىڭ جاڭا باعىتتارىن ايقىنداۋ قاجەت, – دەدى نۇرسۇلتان نازارباەۆ.
ءراسىم سوڭىندا مەملەكەت باسشىسى ديپلوماتتاردى قازاقستانداعى جاۋاپتى ميسسيالارىنىڭ باستالۋىمەن تاعى دا قۇتتىقتادى.