مەملەكەت باسشىسى نۇرسۇلتان نازارباەۆتىڭ قازاقستان حالقىنا جولداۋىنداعى تاپسىرمالاردى جۇزەگە اسىرۋ اياسىندا العاشقى جارنانى ارزانداتۋ ءۇشىن جالپى سانى 50 مىڭ دانادان كەم ەمەس «7-20-25» تۇرعىن ءۇي سەرتيفيكاتتارى شىعارىلادى.
يپوتەكالىق باعدارلاماعا قاتىسقان جاعدايدا, «7-20-25» سەرتيفيكاتتارى بيۋدجەتتىك سالا قىزمەتكەرلەرى ءۇشىن العاشقى جارنانى جەڭىلدەتەدى . سەرتيفيكاتتاردى قالا جانە وبلىس اكىمدىكتەرى تۇرعىندارىنىڭ قاجەتتىلىكتەرىنە قاراي تاراتاتىن بولادى.
«ەلباسى جەرگىلىكتى بيۋدجەتتەن جەڭىلدەتىلگەن يپوتەكانىڭ العاشقى جارناسىن سۋبسيديالاۋ بويىنشا جان-جاقتى جۇمىس جۇرگىزۋدى تاپسىردى. مەملەكەت باسشىسى مالىمدەگەندەي, مۇنداي تۇرعىن ءۇي سەرتيفيكاتتارىن بەرۋ مۇعالىمدەر, دارىگەرلەر, پوليتسيا قىزمەتكەرلەرى جانە باسقا دا جەرگىلىكتى وڭىرلەرگە قاجەتتى ماماندىق يەلەرى ءۇشىن يپوتەكانىڭ قولجەتىمدىلىگىن ارتتىرا تۇسپەك. ءبىز «نۇر وتان» پارتياسىنمەن بىرلەسىپ العاشقى جارنانى ازايتۋ بويىنشا جۇمىستاردى باستاپ كەتتىك. جانە اتالعان شارۋانى قىزۋ دوڭگەلەتىپ, وسى اپتادان باستاپ ءار وڭىرلەردە «7-20-25» سەرتيفيكاتتارىن بەرە باستايمىز» - دەدى «باسپانا» يپوتەكالىق ۇيىمىنىڭ باسشىسى قايرات التىنبەكوۆ.
ءبىر تۇرعىن ءۇي سەرتيفيكاتىنىڭ ورتاشا نومينالى 1 ملن تەنگەنى قۇرايدى. سول سەبەپتەن دە, جەرگىلىكتى اتقارۋشى ورگاندار تاراپىنان بۇل باعدارلامانىڭ جۇزەگە اسىرىلۋىن ىنتالاندىرۋ ءۇشىن 50 ملرد. تەنگە بولىنەدى.