وسى اپتادا عىلىم, ەكونوميكا, بەيبىتشىلىك سالالارى بويىنشا نوبەل سىيلىعىنىڭ لاۋرەاتتارى انىقتالدى. ەكىنشى دۇنيەجۇزىلىك سوعىستان بەرى بيىل ءبىرىنشى رەت ادەبيەت سالاسى بويىنشا نوبەل سىيلىعى بەرىلمەيدى.
شۆەد اكادەمياسىنىڭ مۇشەسى كاتارينا فروستەنسوننىڭ كۇيەۋى جان-كلود ارنوعا بايلانىستى بىلتىر بۇقارالىق اقپارات قۇرالدارىن جايلاعان داۋ-دامايدىڭ كەسىرى اكادەمياعا دا تيمەي قويمادى. بۇل تارتىسقا بايلانىستى بىرنەشە اكادەميك كەڭەستەن شىققانى تۋرالى دا اقپارات تارادى. (ول اقپاراتتاردا ەكى-ءۇش جىل نوبەل سىيلىعىنىڭ يەگەرلەرى تۋرالى جاسىرىن اقپارات شۆەد اكادەمياسىنىڭ رەسمي مالىمدەمەلەرىنەن بۇرىن شىعىپ كەتكەنى ايتىلعان). سودان كەيىن اكادەميا بيىلشا جەڭىمپازدىڭ اتىن اتاماي, كەلەسى جىلعا قالدىرعانىن مالىمدەگەن بولاتىن. كەلەر جىلى ەكى نوبەل سىيلىعى يەسىنىڭ ەسىمىن ەستۋىمىز مۇمكىن.
جان-كلود ارنونى زورلىق ىسىنە قاتىستى ەكى جىلعا سوتتاپ, باس بوستاندىعىنان ايىردى. ال وقىرماندار بيىل نوبەل سىيلىعىنىڭ جەڭىمپازى انىقتالماعاندىقتان كوپ نارسە جوعالتتى. Quartzy باسىلىمىنىڭ ساراپشىلارى كەرىسىنشە كىتاپ ساۋداسىنا مۇنىڭ ەشقانداي اسەرى بولمايدى دەگەن پىكىردە.
نوبەل سىيلىعىنىڭ يەگەرىن سونشالىقتى تەز انىقتاۋدىڭ ەشقانداي قاجەتتىلىگى جوق. كوبىنە كوزى ءتىرى كەزىندە جەتكەن جەتىستىكتەرگە بەرىلەتىن سىيلىق بولعاندىقتان, اسىقپاي ويلانعان دا ءجون. اقش-تىڭ كىتاپ پالاتاسىنىڭ سىيلىعى, يا بۋكەر سياقتى ءبىر جىلداعى ۇزدىك كىتاپقا بەرىلمەگەن سوڭ, اپتىعاتىن ەشتەڭە جوق. جاقسى كىتاپقا نوبەل سىيلىعى ەلۋ جىلدان كەيىن دە بۇيىرۋى مۇمكىن دەپ ەسەپتەيدى ساراپشىلار.
2016 جىلى بوب ديلان ەڭ ۇلكەن ادەبي سىيلىقتى جەڭىپ الدى. بىراق بۇل باسپاگەرلەر ءۇشىن باس قاتىراتىن شارۋا بولدى. ويتكەنى كىتاپقا ارنالعان سىيلىق, سۋرەت جاپسىرىپ تاراتاتىن دۇنيە ەمەس. قازىلار القاسى جينالىپ, قالىڭ جۇرتشىلىق شۋلاپ قابىلدايتىن, سكەپتيكالىق كوزقاراستا بولاتىن شىعارمالاردى ىزدەيدى. بۇل كۇشتى ماركەتينگىلىك قۇرال بولىپ تۇر. ادەبي سىيلىقتان گورى, جارناماسىنان تۇسەتىن قارجى كوپ.
سىيلىق جازۋشىلارعا ارقالاي اسەر ەتەدى. ال وقىرماندار, سىيلىق يەگەرى اتاقتى بولماسا, كوپ نارسە ۇتادى. 2014, 2015 جىلدارى پاتريك موديانو مەن سۆەتلانا الەكسيەۆيچ جەڭىمپاز اتانعاندا كوپ تىلدەرگە اۋدارىلىپ, كىتاپتارى مول ساتىلدى. الەم وقىرماندارى وزدەرىنە ادەبيەتتىڭ جاڭا ەسىگىن اشقانداي بولدى. ال ەندىگى نوبەل يەلەرى ءدال سونداي اسەر سىيلاي الا ما؟
باعاشار تۇرسىنباي ۇلى,
«ەگەمەن قازاقستان»