1916 جىلعى ۇلت-ازاتتىق قوزعالىس كوسەمدەرىنىڭ ءبىرى, امانگەلدىنىڭ ۇزەڭگىلەس سەرىگى, حالىق باتىرى نۇرماعامبەت كوكەمباي ۇلىنىڭ (كەيكى باتىر) باس سۇيەگىنىڭ تۋعان توپىراعىنا جەرلەنۋى ۇلتتىق رۋحىمىزدى ءبىر اسپانداتقان ەدى. باس سۇيەكتى سانكت-پەتەربۋرگتەن الدىرۋعا, كەيىن باتىردىڭ بەت بەينەسىن جاساتۋعا قارجىلاي دەمەۋشىلىك كورسەتۋشى - ساعدات نۇرماعامبەتوۆ اتىنداعى قوردىڭ باسشىلارى م.نالىباەۆ پەن س.ىسقاقوۆ. ماجار ەلىنىڭ استاناسى بۋداپەشت قالاسىنداعى جاراتىلىستانۋ عىلىمي مۇراجايىندا زولتان كورشوشتىڭ باسشىلىعىمەن باس سۇيەكتەن كەيكى باتىردىڭ بەينەسى قالىپقا كەلتىرىلدى.تاريحي ءىس-شاراعا سەنات دەپۋتاتى سەرىك اقىلباي باسشىلىق جاساسا, باس سۇيەكتى اكەلۋگە بۇرىنعى ۇكىمەت باسشىسى كارىم ءماسىموۆتىڭ ءوزى بارعانىنان جۇرتشىلىق حاباردار. جۋىردا, امانگەلدى اۋدانىنىڭ 90 جىلدىعى قارساڭىندا كەيكى باتىر ءمۇسىنىنىڭ مۇراجايعا تابىس ەتىلۋى ەلەۋلى وقيعا بولدى. ءمۇسىندى الماتىدان الدىرىپ, مۇراجايعا تاپسىرۋشى - جەرگىلىكتى كاسىپكەر احمەتوۆ تاڭاتار. ءمۇسىندى مۇراجايعا ورناتىپ بەرگەن كاسىپكەر باس سۇيەككە بايلانىستى ۆەنگريانىڭ جانە رەسەي فەدەراتسياسىنىڭ مادەنيەت مينيسترلىگىنىڭ بەرگەن بىرنەشە قۇجاتتارىن قوسا تابىس ەتتى. ەندى كەز-كەلگەن مۇراجايعا كەلۋشى باتىردىڭ ءمۇسىنىن كورىپ, قۇجاتتارمەن تانىسا الادى.