قىركۇيەك ايى بالالاردىڭ مەكتەپكە باراتىن كەزى عانا ەمەس, تەلەارنالار ءۇشىن جاڭا ماۋسىمنىڭ باستالۋىمەن دە ەرەكشە. ءدال وسى كەزدە كورەرمەندەردى جاڭا جوبالار, قىزىقتى باعدارلامالار, تىڭ تۋىندىلار كۇتەدى. وسىعان وراي ءبىز تاياۋدا عانا «حابار» اگەنتتىگىنە توراعا بولىپ تاعايىندالعان الان اجىباەۆپەن سۇحباتتاسقان ەدىك.
– الان عازيز ۇلى, جاڭا ماۋسىمدارىڭىز قۇتتى بولسىن. كۇزگى ماۋسىمعا بولەك توقتالامىز, ءبىرىنشى سۇراعىم «بالالار ەۆروۆيدەنيەسىنە» قاتىستى. وسى جىلى قازاقستان تۇڭعىش رەت اتالعان بايقاۋدا باعىن ساناپ كورەدى. كەلىسسوزدەر قالاي ءجۇردى؟ ەلىمىز ءۇشىن مۇنداي بايقاۋلاردىڭ قانشالىقتى ماڭىزى بار؟
– «حابار» اگەنتتىگى 2016 جىلدىڭ 1 قاڭتارىنان باستاپ «Junior Eurovision Song Contest» حالىقارالىق ءان بايقاۋىن ۇيىمداستىراتىن ەۋروپالىق حابار تاراتۋ وداعىنىڭ (EBU) قاۋىمداسقان مۇشەسى. بۇل بىزگە اتالعان بايقاۋعا ءوز مەملەكەتىمىزدىڭ اتىنان ۇمىتكەرىمىزدى ۇسىنۋعا مۇمكىندىك بەردى. سول ۋاقىتتان باستاپ كەلىسسوزدەر جۇرگىزىلىپ كەلدى. وسى جىلدىڭ ماۋسىم ايىندا ۇيىمداستىرۋشىلار رۇقساتىن بەرگەن سوڭ, قازاقستاننىڭ اتىنان ونەر كورسەتەتىن بالانى ىزدەۋگە كىرىستىك. ءبىر اي بويى (1-31 تامىز ارالىعىندا) khabar.kz سايتى («حابار» تەلەارناسىنىڭ رەسمي سايتى) ارقىلى قاتىسۋشىلاردىڭ وتىنىمدەرى قابىلدانعان بولاتىن. شامامەن 200-گە جۋىق وتىنىمنەن تالاپقا ساي كەلەتىن 134-ءى 11 ادامنان قۇرالعان ادىلقازىلار القاسىنا ۇسىنىلدى. ادىلقازىلار قۇرامىندا قازاقستاننىڭ حالىق ءارتىسى روزا رىمباەۆا, مەيرامبەك بەسپاەۆ, تامارا اسار, باعىم مۇحيتدەنوۆا, ەركە ەسماحان, قايرات نۇرتاس, رەنات گايسين, ءلايلا سۇلتانقىزى, ءمادينا سادۋاقاسوۆا, ديماش قۇدايبەرگەنوۆ سىندى مۋزىكا سالاسىنىڭ مايتالماندارى بولدى. قازىلار «جۇزدەن جۇيرىك, مىڭنان تۇلپار» دەگەندەي, ەلىمىزدىڭ نامىسىن حالىقارالىق ساحنادا قورعاي الاتىن تالانتتى دەگەن ون بالانى ىرىكتەپ العان ەدى. ولار 22 قىركۇيەك كۇنى «حابار» تەلەارناسىنىڭ تىكەلەي ەفيرىندە وزدەرىنىڭ اندەرىمەن ونەر كورسەتتى.
ۇلتتىق ىرىكتەۋدەگى ءار بالانىڭ بويىندا مينسك قالاسىندا ونەر كورسەتۋگە لايىقتى تالانت بولدى. الايدا قازىلار القاسى مەن كورەرمەندەردىڭ شەشىمى بويىنشا 12 جاسار دانەليا تۋلەشوۆا جەڭىمپاز اتاندى. كورەرمەندەر تەلەفونمەن حابارلاسۋ نەمەسە SMS جولداۋ ارقىلى داۋىس بەرگەن بولاتىن. قازىلار القاسى مەيىرجان جيدەبايعا ءبىرىنشى ورىندى, ال ەكىنشى ورىندى دانەلياعا بەرگەن ەدى. كورەرمەندەر بولسا, دانەلياعا كوبىرەك داۋىس بەرىپ, ول قارسىلاستارىن باسىپ وزدى.
سايىستا دانەليا «وزىڭە سەن» (Seize the Time) دەپ اتالاتىن جاڭا تۋىندىسىن ورىندادى. ءانىن يۆان لوپۋحوۆ, ءسوزىن كاميلا دايروۆا مەن ارتەم كۋزمەنكوۆ جازعان. بۇل تۋىندى الپىس پروتسەنت قازاق تىلىندە, قالعان قىرىق پروتسەنتى اعىلشىن تىلىندە ورىندالادى. الداعى 25 قاراشادا مينسك قالاسىندا وتەتىن سايىستا دا دانەليا ءدال وسى شىعارمانى ورىندايدى. قازىرگى ۋاقىتتا دايىندىقتى باستاپ كەتتىك. بۇل جاۋاپكەرشىلىگى مول بايقاۋ بولعاندىقتان, دانەليانىڭ ساحنالىق وبرازى, ءوزىن ۇستاۋى, ارتىستىك قابىلەتى, ءجۇرىس-تۇرىسى دا ماڭىزدى. سونىمەن قاتار پسيحولوگيالىق دايىندىعىن دا ەسكەرۋ كەرەك. ءبىز بۇل ءدۇبىرلى دوداعا العاش رەت قاتىسامىز, سوندىقتان اتالعان بايقاۋ مەملەكەتىمىز ءۇشىن دە, جاس ءانشى ءۇشىن دە ۇلكەن تاجىريبە. ول جەڭسە دە, جەڭبەسە دە, وسى سايىسقا قاتىسىپ, ونەر كورسەتكەنىنىڭ ءوزى جەتىستىك دەپ بىلەمىز.
ەلىمىز ءۇشىن ماڭىزىنا توقتالار بولساق, مۇنداي حالىقارالىق جوبالار مەملەكەتىمىزدى تانىتۋدىڭ بىردەن-ءبىر قۇرالى. مۇنى ديماش قۇدايبەرگەنوۆ پەن دانەليانىڭ ءوزى قاتىسقان جوبالار دالەلدەدى. بۇل – مۋزىكالىق سالامىزدىڭ دامۋى, مىڭجىلدىق رۋحاني, مادەني ءومىرىمىز بەن ءان ءداستۇرىمىزدى تانىتۋ, سونىمەن بىرگە مەملەكەتىمىزدىڭ حالىقارالىق ارەناداعى بەدەلىن, ءيميدجىن ودان ءارى نىعايتا ءتۇسۋ, جاستاردىڭ شەت مەملەكەتتەگى ارىپتەستەرىمەن تاجىريبە الماسۋى. سوندىقتان وتە ماڭىزدى.
– جاڭا ماۋسىمنان باستاپ قورىتىندى جاڭالىقتاردىڭ ۋاقىتى وزگەرىپ, بۇرىنعى جۇرگىزۋشىلەر قايتىپ كەلدى. بۇل نەمەن بايلانىستى؟
– دۇرىس ايتاسىز, جاڭا ماۋسىمنان باستاپ كورەرمەندەر كەشكى ساعات 20.00-دەن باستاپ 21.30-عا دەيىن اقپاراتتىق-ساراپتامالىق جوبالاردى تاماشالاۋدا. ءبىز, اۋديتورياعا قولايلى بولۋ ءۇشىن, قورىتىندى جاڭالىقتاردىڭ ۋاقىتىن 19:00-دەن 20:00-گە اۋىستىردىق. سونىمەن قاتار «حابار» تەلەارناسىندا ۇزاق جىلدار جۇمىس ىستەگەن مايتالمان تەلەجۇرگىزۋشىلەر دە قايتا ورالدى. زەيىن الىپبەك, مارات مۇحامەدساليەۆ جاڭالىقتار ەفيرىنىڭ اجارىن اشا تۇسكەندەي. ولاردىڭ ورالعانىن ەستىگەن حالىق الەۋمەتتىك جەلىلەر ارقىلى بىزگە كۇن سايىن جاقسى پىكىرلەرىن ءبىلدىرىپ جاتىر. سوندىقتان وڭ شەشىم بولعانىنا كوزىمىز انىق جەتتى.
جىل باسىنان باستاپ «حابار» تەلەارناسىندا كۇندىزگى جاڭالىقتار ەفيرگە شىعىپ جاتىر. ءبىز ەڭ وزەكتى, ەلىمىزدىڭ ساياسي, ەكونوميكالىق ومىرىندەگى ماڭىزدى وقيعالاردى ءبىرىنشى بولىپ جان-جاقتى جەتكىزۋدەمىز. بۇگىنگى تاڭدا 16 ايماقتا ەلۋدەن اسا ءتىلشىمىز كۇننىڭ باستى اقپاراتتارىن سارالاپ, ەگجەي-تەگجەيلى زەرتتەۋدە. ەلباسىنىڭ تاپسىرىسىمەن قۇرىلعان تۇركىستان وبلىسىنان تىكەلەي قوسىلىمدار, قىزىقتى ماتەريالدار مەن تانىمدىق سيۋجەتتەر ازىرلەنۋدە.
10 قىركۇيەكتەن باستاپ قورىتىندى جاڭالىقتاردان كەيىن 20:30-دا «Online» توك-شوۋى كورەرمەنگە جول تارتتى. جۇرگىزۋشىسى – ەرلان يگىسىنوۆ. اپتاسىنا 3 رەت شىعاتىن تىكەلەي ەفيردەگى باعدارلاماعا قوعامداعى وزەكتى ماسەلەلەر ارقاۋ بولۋدا. ماسەلەن, ءبىرىنشى ەفيردە قازاقستانداعى ءبىلىم بەرۋ جۇيەسى تالقىعا سالىنىپ, ستۋدياعا ءبىلىم جانە عىلىم ءمينيسترى ەرلان ساعاديەۆ كەلدى. سونداي-اق «7 – 20 – 25» باعدارلاماسى دا ستۋديادا ءسوز بولىپ, كوكەيدەگى ساۋالدارعا جاۋاپ الىندى. كورەرمەندەر سۇراقتارىن الەۋمەتتىك جەلىلەر, WhatsApp جانە تىكەلەي ستۋدياعا حابارلاسۋ ارقىلى قويا الادى.
– تەلەديداردان «توپجارعان» دەپ اتالاتىن جاڭا ۆوكالدىق شوۋدىڭ انونسىن كوردىك. بۇل جوبانىڭ ەرەكشەلىگى قانداي؟ نەلىكتەن تاڭداۋ وسى جوباعا ءتۇستى؟ ياعني بىزدە ۆوكالدىق شوۋلار كوپ قوي...
– «The Final Four» جوباسى يزرايلدىك Armoza Formats كومپانياسىنا تيەسىلى. قازىرگى تاڭدا الەمنىڭ جۇزدەگەن مەملەكەتىندە جارىق كورۋدە. وتكەن جىلى اقش-تا «The Four: Battle for Stardom», سونداي-اق رەسەيدە «ۋسپەح» دەگەن اتاۋمەن شىقتى.
قازىرگى تاڭدا ينتەرنەتتىڭ كومەگىمەن تانىمال بولىپ جاتقان قانشاما تالانتتارىمىز بار. ولارعا پروديۋسەر دە, قولداۋشى دا قاجەت ەمەس, باستىسى دارىنىڭ بولسا بولعانى. ءبىزدىڭ الاڭ دا ءدال وسى جاندارعا ارنالعان. شوۋدىڭ ەرەجەسى بويىنشا ءتورت قاتىسۋشى انىقتالىپ, ولار ەرەكشە داۋىسىن, ارتىستىك قابىلەتىن, دارىنىن دالەلدەۋى كەرەك. باعدارلامانىڭ باستى ەرەكشەلىگى دە وسى, بايقاۋدىڭ فيناليستەرى ءبىرىنشى كۇننەن بەلگىلى بولادى. الايدا اپتا سايىن جاڭا قاتىسۋشىلار كەلىپ, فيناليستەردى جەكپە-جەككە شاقىرىپ, ورنىنان ىسىرىپ تاستاۋى مۇمكىن. ياعني العاشقى تورتتىكتىڭ فينالعا جەتۋ-جەتپەۋى وزدەرىنىڭ قارىم-قابىلەتىنە بايلانىستى.
جوبانىڭ قازىلار القاسىنىڭ قۇرامىندا قازاقستاننىڭ حالىق ءارتىسى روزا رىمباەۆا, كومپوزيتور ءارى پروديۋسەر رەنات گايسين جانە جاس رەپپەر Baller بار. سوندىقتان كەز كەلگەن جاستاعى كورەرمەنگە قىزىق بولادى دەپ ويلايمىن. ونىڭ ۇستىنە باعدارلامانى حالىقتىڭ سۇيىكتى ءانشىسى ءمادينا سادۋاقاسوۆا جۇرگىزەدى. بۇل دا حاباردىڭ اجارىن اشا تۇسەدى دەگەن سەنىمدەمىن.
– جاڭا ماۋسىمدا تاعى قانداي جوبالار كۇتىلۋدە؟
– «حابار» قاشاندا كورەرمەندەرىنە ەڭ ۇزدىگىن ۇسىنىپ كەلەدى. جىل سايىن جاڭا جوبالاردىڭ سانى ارتىپ, ساپاسى جاقسارا تۇسۋدە. وسى ماۋسىمدا «داۆايتە گوۆوريت» توك-شوۋىن قالىڭ كورەرمەننىڭ سۇيىكتى جۇرگىزۋشىسى ايگۇل مۇكەي تىزگىندەدى. ايگۇل حانىم – «جۋرناليستيكانىڭ جىلىگىن شاعىپ, مايىن ىشكەن» ادام, تاجىربيەلى جۋرناليست. سوندىقتان قوعامداعى وزەكتى ماسەلەلەردى ورتاعا سالاتىن باعدارلاماعا بىردەن جاراسا كەتكەندەي كورىندى. سونىمەن قاتار ءۇشىنشى جىل ء«بىزدىڭ نازاردا» جانە ء«بىلۋ ماڭىزدى» دەپ اتالاتىن جوبالارىمىز جالعاسىن تابۋدا. اتالعان حابارلار ءبىرىنشى كەزەكتە كورەرمەننىڭ سۇرانىسىنا جاۋاپ بەرەدى. جۋرناليستەر ءار ماسەلەگە ءجىتى توقتالىپ, جان-جاقتى زەرتتەيدى. قوردالانعان پروبلەمالاردىڭ شەشىمىن تابۋدا.
سونداي-اق كورەرمەننىڭ سۇرانىسى بويىنشا «ميلليون كىمگە بۇيىرادى؟» ينتەللەكتۋالدىق ويىنى قازاق تىلىندە شىعىپ جاتىر. جۇرگىزۋشىسى – دوسىمبەك وتەعاليەۆ. وزدەرىڭىز بىلەتىندەي, بىلتىرعى جىلدان باستاپ جوبانىڭ ۇتىسى ەكى ەسەلەنىپ, جۇلدە قورى 10 ميلليون تەڭگەگە جەتتى. باعدارلاماعا 18 جاسقا تولعان كەز كەلگەن ازامات قاتىسا الادى. وتكەن جىلى ءبىر ادام 10 ميلليون تەڭگە ۇتىپ الدى. بۇل از اقشا ەمەس, كورەرمەنىمىزدىڭ قاجەتىنە جارادى دەگەن سەنىمدەمىن. تاعى وسى جىلى ينتەللەكتۋالدىق سەتكامىزعا «زەردە» دەپ الاتاتىن ورىس تىلىندەگى جوبا قوسىلدى. بريتانيانىڭ ەڭ ايگىلى حابارلارىنىڭ ءبىرى. ەفيرگە شىققانىنا 46 جىل بولعان. وسى ۋاقىت ارالىعىندا باعدارلاما جاڭا زەلانديا, اۋستراليا, تۇركيا, ءۇندىستان, رەسەي جانە وزگە دە مەملەكەتتەردە جارىق كورىپ, كورەرمەن تاراپىنان جاقسى قابىلداندى. اعىلشىن تىلىندەگى اتاۋ «Mastermind». بۇل باعدارلامانىڭ باستى ەرەكشەلىگى سول قاتىسۋشى ازاماتتاردىڭ بارلىعى ءبىلىمدى, ناعىز ينتەلەكتۋالدار. ولار ويىن بارىسىندا وزدەرى تاڭداعان تاقىرىپ بويىنشا كۇردەلى ساۋالدارعا جاۋاپ بەرەدى. مۇنىڭ وزگە ويىنداردان ەرەكشەلىگى – ۇتىس (قارجى) جوق, قاتىسۋشىلار وزدەرىنىڭ ءبىلىمىن تەكسەرۋگە كەلەدى. جوبانى اكتەر ءارى رەجيسسەر بوپەش جانداەۆ جۇرگىزەدى. ايتا كەتەيىن, العاشقى ەفيرى 30 قىركۇيەكتە ءوتتى. قاتىسامىن دەۋشىلەر بولسا khabar.kz سايتىنا كىرىپ تىركەلسە بولادى.
مۇنىمەن ءبىزدىڭ ۇسىنىستارىمىز بىتپەيدى. «قىزىق Times», «تاڭعى حابار», «انا مەن بالا» جوبالارى جاڭا ماۋسىمدا جاڭا لەپپەن شىعىپ جاتىر. سونداي-اق سەنبى-جەكسەنبى كۇندەرى ەلىمىزگە بەلگىلى ونەر يەلەرىنىڭ كونتسەرتتىك باعدارلامالارى, قوعام قايراتكەرلەرىنىڭ ءومىر جولى تۋرالى دەرەكتى فيلمدەر, ماڭىزدى سپورتتىق شارالار, الەمدىك پروكاتتاعى ەڭ ۇزدىك فيلمدەر, ساياسي وقيعالاردان تىكەلەي قوسىلىمداردى دا تاماشالايدى.
– سوڭعى جىلدارى وتاندىق تەلەارنالارىمىز ءوزىمىزدىڭ سەريالداردى كوپتەپ ۇسىنىپ كەلەدى. كورەرمەندەر قالاي قابىلداۋدا, سۇرانىس بار ما؟
– ارينە, سۇرانىس بولماسا تۇسىرىلمەس ەدى دەپ ويلايمىن. قازىرگى ۋاقىتتا قازاق ءتىلدى اۋديتوريادا وتاندىق سەريالدارعا سۇرانىس ارتتى. ماسەلەن, «حابار» تەلەارناسىنان كورسەتىلگەن ء«ان اعا», «مەزگىلسىز ماحاببات», «انا جۇرەگى» سىندى تەلەحيكايالارىمىزدىڭ كورسەتكىشتەرى وتە جاقسى بولدى. سونىمەن قاتار ء«وز ءۇيىم» دەپ اتالاتىن وتاندىق ەسترادا جۇلدىزدارىمەن تۇسىرگەن تۋىندىمىزدىڭ You Tube الەۋمەتتىك جەلىسىندە ميلليونعا جۋىق قارالىمى بار, پىكىرلەر دە جاقسى, كورەرمەندەر جالعاسىن كۇتۋدە. سوندىقتان وسى جىلى ەكىنشى ماۋسىمىن جوسپارلاپ جاتىرمىز.
جالپى, «حابار» اگەنتتىگى جىل سايىن 191 بولىمنەن تۇراتىن سان الۋان جانرداعى تەلەسەريالداردى ۇسىنىپ كەلەدى. ولاردىڭ اراسىندا ۇلتتىق ءداستۇرىمىزدى ۇلىقتايتىن, تامىرى تەرەڭ تاريحىمىزدان سىر شەرتەتىن درامالار, ۇلى تۇلعالارىمىزدىڭ عۇمىرىن سۋرەتتەيتىن كوركەم فيلمدەر, دەتەكتيۆ جانرىنداعى شىتىرمان وقيعالارعا تولى تۋىندىلار, جاستارىمىز ءۇشىن رومانتيكالىق تەلەحيكايالار بار. جاڭا ماۋسىمدى «تاعى دا ءسۇي» دەپ اتالاتىن كومەديالىق كارتينامەن باستادىق. الداعى ۋاقىتتا رەجيسسەر سەرىكبول وتەپبەرگەننىڭ «دەتەكتيۆ اجە» دەپ اتالاتىن كومەدياسى كورەرمەن نازارىنا ۇسىنىلادى. بۇل نەمەرەسىمەن بىرگە سان الۋان قىلمىستى زەرتتەۋگە كىرىسكەن اجەنىڭ قىزىققا تولى حيكايالارىنان سىر شەرتەدى. باستى ءرولدى «توعىسقان تاعدىرلار» سەريالىنان جاقسى تانىس, قازاقستاننىڭ ەڭبەك سىڭىرگەن ءارتىسى عازيزا ابدىنابيەۆا سومدايدى. سونداي-اق نياز شايسۇلتانوۆ, مۇرات نۇراسىلوۆ, نۇرجان داۋلەتوۆ سىندى اكتەرلەردى كورەسىزدەر.
قازان ايىندا «اعا» جانە «قارلىعاش ۇيا سالعاندا» كارتينالارىن ەفيرگە شىعارامىز. بۇل ەكى تەلەحيكايادا وتباسىلىق قۇندىلىقتار, تۋىستار اراسىنداعى قاتىناس, مەيىرىمدىلىك پەن جىگەرلىلىك سۋرەتتەلەدى. «قارلىعاش ۇيا سالعاندا» تۋىندىسىندا تانىمال ءانشى ءارى اكتريسا كامشات جولدىباەۆا جانە اكتەر ەركەبۇلان دايىروۆ باستى رولدەردى سومدايدى. سونىمەن قاتار «جالعىز جاۋقازىن», ء«بورى», ء«بىزدىڭ قالامگەر», «شاشۋ» سىندى تەلەسەريالدار دا كورەرمەن نازارىنا ۇسىنىلادى.
تاعى دا ايتا كەتكىم كەلەتىن جايت, «حابار» ارناسى الەمدىك دەڭگەيدەگى قىزىقتى دەرەكتى فيلمدەردى ساتىپ الدى. كورەرمەندەرىمىزگە ءار جەكسەنبى كۇنى قازاق تىلىندە «تاڭعاجايىپ الەم», «شەبەر اسپاز», «جاراتىلىس. ادامزات تاريحىنا ساياحات», «مارس» دەپ اتالاتىن «National Geographic» تۇسىرگەن تۋىندىلاردى ۇسىنىپ جاتىرمىز.
سونداي-اق «حابار» اگەنتتىگى بىلتىردان بەرى «باتىرلار جولى» دەپ اتالاتىن تاريحي كوركەم فيلم ءتۇسىرىپ جاتىر. قويۋشى رەجيسسەرى اسقار ۇزاباەۆ. اتالمىش كارتينادا قاراساي باتىردىڭ ءومىرى, قازاق دالاسىنىڭ باسىنان وتكەن قيىن-قىستاۋ كەزەڭى سۋرەتتەلەدى. وقيعادا ۇلان-عايىر ولكەمىزدى نايزانىڭ ۇشىمەن, بىلەكتىڭ كۇشىمەن قورعاعان باتىرلارىمىزدىڭ ەرلىگى, ەل باسىنا كۇن تۋعان زاماندا كورسەتكەن قايسارلىعى, حالىقتىڭ رۋحى, مەملەكەت تۇتاستىعىنىڭ ماڭىزى, ءوزارا تارتىستىڭ سوڭى جاقسىلىققا الىپ بارمايتىندىعى ءسوز بولادى. بۇل كارتينا ارقىلى تاريحىمىزعا تەرەڭىرەك ءۇڭىلىپ, اتا-بابامىزدىڭ ۇلى دالامىزدىڭ ءار پۇشپاعى ءۇشىن كۇرەسىن كورىپ, وتكەنگە ورالامىز.
بۇل جوباعا ءتۇسىرىلىم توبى جان-جاقتى ءارى تىڭعىلىقتى دايىندالدى. تاريحشىلارمەن كەڭەسىپ, سول زاماندى شىنايى كورسەتۋ ءۇشىن ءار دەكوراتسيا مەن لوكاتسيا ۇزاق تاڭدالدى. توبەلەس ساحنالارىن سومداۋعا جايداربەك كۇنعوجينوۆ باستاعان قازاقستاندىق كاسكادەرلەر قاتىستى. سوندىقتان ول وسكەلەڭ ۇرپاققا بەرەرى مول دۇنيە بولادى دەگەن ۇمىتتەمىز.
اكتەرلەر قۇرامى دا جاقسى جاساقتالعان. باستى رولدەردى نازار سۇلتانوۆ, ءاشىم احمەتوۆ, جاندوس ايباسوۆ, ەرجان نۇرىمبەت, الدابەك شالباەۆ, ايدوس بەكتەمىر, ءمولدىر مەكەنباي سىندى اكتەرلەر وينايدى. سونىمەن قاتار 71-ءشى كانن كينوفەستيۆالىندە «ەڭ ۇزدىك ايەل ءرولى» نوميناتسياسىن جەڭىپ العان سامال ەسلياموۆانى قاراساي باتىردىڭ اناسى وبرازىندا كورەسىزدەر.
– كوركەم فيلم دەپ قالدىڭىز, ياعني بۇل تۋىندىنى كينوتەاترلاردان كورەمىز بە؟
–جىل باسىنان باستاپ «حابار» اگەنتتىگى كەيبىر تۋىندىلاردى ۇلكەن ەكرانداردا كورسەتۋدە. سوندىقتان كۇتىڭىزدەر.
ايتپاقشى, ءبىز بەكزات ساتتارحانوۆتىڭ ءومىرى مەن سپورتتاعى جەتىستىگى تۋرالى تەلەحيكايا ءتۇسىرىپ جاتىرمىز, الداعى ۋاقىتتا ۇسىنامىز.
– ال اگەنتتىكتىڭ باسقا ارنالارىندا قانداي وزگەرىستەر ورىن الىپ جاتىر؟
– «حابار» ارناسىنان بولەك, ءبىزدىڭ اگەنتتىكتە ءۇش تەلەارنا بار. «حابار 24» تەلەارناسى جاڭا ماۋسىمنان باستاپ جاڭالىقتار 20 مينۋت نەمەسە 30 مينۋت شىعۋ كەرەك دەگەن فورماتىنان, تۇسىنىكتەن باس تارتىپ, جاڭالىقتار مارافونىن جاساپ جاتىر, ياعني توقتاۋسىز ءبىر ساعات جاڭالىقتار تاراتامىز. اقپاراتتى شىنايى ءارى وقيعا ورنىنان دەر كەزىندە بەرۋ ءۇشىن live-قۇرالدار كوبەيدى. مىسالى stream تارالىم ءۇشىن تەرەزەلەر, ساراپشىلارمەن تىكەلەي ەفيردە سۇحباتتار, بىرنەشە سپيكەرمەن ءبىر ۋاقىتتا سۇحبات جاساۋعا ارنايى مۇمكىندىكتەر جاسالدى. جۇرگىزۋشىلەر تەك ديكتور عانا ەمەس, ءوز ەفيرىنىڭ مودەراتورىنا اينالدى. «حابار 24» تاڭى 4 ساعاتقا جالعاساتىن جاڭالىقتار مارافونىمەن باستالىپ, كەشكى ساراپشىلار پىكىرى بەرىلەتىن مارافونمەن جالعاسىن تابادى. سونىمەن قاتار جاڭا ماۋسىمدا بىرنەشە قىزىقتى دا ماڭىزدى باعدارلامالار ەفيرگە شىعىپ جاتىر: «تۇتىنۋشى تاڭداۋى», «بايىبىنا بارساق», «ەرەكشە كوزقاراس», «كينوبيزنەس», «Overtime» جانە باسقالارى بار. «تۇتىنۋشى تاڭداۋى» باعدارلاماسىنىڭ شىعارماشىلىق ۇجىمى اپتا سايىن قازاقستاندىق تاۋارلاردىڭ ساپاسىمەن تانىسادى, قۇندىلىعى مەن ماڭىزىنا توقتالادى. ال «بايىبىنا بارساق» جوباسىنىڭ جۋرناليستەرى ەڭ وزەكتى تاقىرىپتاردى زەرتتەپ, ءتۇيىنىن شەشۋگە تىرىسادى. فۋتبولسۇيەر قاۋىم «Overtime» باعدارلاماسىنان ەڭ قىزىقتى ويىندار, سۇحباتتار مەن سيۋجەتتەر تاماشالايدى.
«ەل ارنا» تەلەارناسى جاڭا ماۋسىمنان باستاپ كورەرمەندەرىنە ىڭعايلى بولۋى ءۇشىن, ەفيرلىك سەتكاسىن اۋىستىردى. ەندى كۇندىزگى ون ەكىدەن كەشكى التىعا دەيىن وتاندىق تەلەحيكايالار, ال كەشكى التىدان تۇنگى ون ەكىگە دەيىن ءۇش كوركەم فيلم ۇسىنادى. سونىمەن قاتار العاش رەت ارنا ەفيرىندە تۇركى الەمى جانە ورتالىق ازيا مەملەكەتتەرىنىڭ «التىن قورىندا» ساقتالعان فيلمدەر قازاق تىلىندە كورسەتىلەدى. 1 قازاننان باستاپ اپتا سايىن بەلگىلى ءبىر مەملەكەتتىڭ تۋىندىلارىن تاماشالايسىزدار. مىسالى ءبىرىنشى اپتا تاجىك كينوسىنىڭ اپتالىعى بولادى. كورەرمەندەر تاجىكستاننىڭ كلاسسيكالىق كارتينالارىن كەشكى ۋاقىتتا كورە الادى.
ال جاڭا ماۋسىمنىڭ تىڭ جوبالارىنىڭ ءبىرى – «اشىق كورسەتىلىم» باعدارلاماسى. مۇندا كينەماتوگرافيا كوريفەيلەرى, تانىمال اكتەرلەر, جاس رەجيسسەرلەر مەن اكتەرلەر, جازۋشىلار مەن ستسەناريستەر ءبىر الاڭدا كەزدەسىپ, كينولەنتالاردىڭ جاسالۋ تاريحى, كەيىپكەرلەر مەن اۆتورلاردىڭ تاعدىرى, كادردان تىس قالعان دۇنيەلەردى, جالپى, بەلگىلى فيلمدەردىڭ بەيمالىم تۇستارىن پاش ەتەدى. كورەرمەندەرمەن تىلدەسىپ, قىزىقتى مالىمەتتەر ۇسىنادى.
– «حابار» اگەنتتىگىنىڭ ونىمدەرىن شەتەلگە تاراتۋ جانە شەتەلدىك ارىپتەستەرمەن قويان- قولتىق جۇمىس ىستەۋ بويىنشا كەلىسسوزدەر جۇرگىزىلىپ جاتقانىن بىلەمىز. بۇل كەلىسىمدەر قاي دەڭگەيدە؟
«Euronews» جانە «CCTV» ىنتىماعىمىز نىعايا ءتۇستى, پولشانىڭ «TVP» ورتالىق تەلەۆيزياسىمەن جانە بەلارۋس ەلىنىڭ رەسپۋبليكالىق تەلەراديوكومپاياسىمەن كەلىسىمگە كەلدىك. «Euronews»-تىك ارىپتەستەرىمىز تاياۋدا عانا كەلىپ شەبەرلىك سىنىپتارىن وتكىزىپ كەتتى. ءبىزدىڭ جۋرناليستەرىمىز بەن قىزمەتكەرلەرىمىز تۇركيانىڭ «تRT» ارناسىنا بارىپ تاجىريبە الماسىپ كەلدى. سونىمەن قاتار ءبىزدىڭ ارنالارىمىز تۇسىرگەن تەلەونىمدەر جەر شارىنىڭ تۇكپىر-تۇكپىرىندەگى كورەرمەن ءۇشىن قولجەتىمدى بولا ءتۇستى. وتكەن جىلدىڭ ماۋسىم ايىندا تەلەۆيزيا سالاسىندا كونتەنت الماسۋ بويىنشا قازاقستان مەن قىتاي ەلدەرى اراسىندا كەلىسىم جاسالدى. اتالعان كەلىسىمگە سايكەس قازاقستاندىق جانە قىتايلىق تاراپتار سەرىكتەستەر وندىرگەن تەلەجوبالاردى ءوز ەفيرلەرىنەن كورسەتۋگە كەلىستى. سونداي-اق سينگاپۋردىڭ «Silver Wolf International» حالىقارالىق كومپانياسىمەن «حابار» اگەنتتىگىنىڭ تەلەونىمدەرىن ديستريبۋتسيالاۋ بويىنشا كەلىسىم جاسالدى. وعان سايكەس اگەنتتىك جوبالارىن ازيانىڭ 9 مەملەكەتى تاماشالايدى.
ۇلى دالامىزدىڭ باي تابيعاتى مەن مادەنيەتى, تاريحى مەن قوناقجايلىلىعى تۋرالى دەرەكتى فيلمدەر, باۋىرجان مومىش ۇلى جانە كۇلاش بايسەيىتوۆا سىندى بەلگىلى تۇلعالارىمىز جونىندەگى بيوگرافيالىق فيلمدەر مەن سەريالداردى رەسەي, موڭعوليا, مالايزيا جانە قىتاي مەملەكەتتەرىنىڭ ازاماتتارى تاماشالاپ ۇلگەردى.
وسى سىندى جۇمىستار ءارى قاراي جالعاسىن تابا بەرەدى. قازىرگى تاڭدا كەلىسسوزدەر جۇرگىزىپ جاتىرمىز. جالپى, جاڭا ماۋسىمدا ۇسىنارىمىز مول.
– اڭگىمەڭىزگە راحمەت.
اڭگىمەلەسكەن گۇلنۇر دوسبول
سۋرەتتەردە: الان اجىباەۆ; «قارلىعاش ۇيا سالعاندا» سەريالى; «دەتەكتيۆ اجە» كومەدياسى