بۇۇ قاۋىپسىزدىك كەڭەسىنىڭ جوعارى دەڭگەيدەگى وتىرىسىندا «جاپپاي قىرىپ جويۋ قارۋىن تاراتپاۋ: كحدر» تاقىرىبى قارالدى. جيىن اقش مەملەكەتتىك حاتشىسىسى مايكل پومپەونىڭ توراعالىعىمەن ءوتتى, دەپ حابارلايدى سىرتقى ىستەر مينيسترلىگىنىڭ ءباسپاسوز قىزمەتى.
قازاقستان سىرتقى ىستەر ءمينيسترى قايرات ءابدىراحمانوۆتىڭ سويلەگەن سوزىندە يادرولىق قارۋسىزدانۋ كەزەڭدىلىكتى, شىدامدىلىقتى, كەلىسىمدى جانە بارلىق مۇددەلى تاراپتاردىڭ ادال نيەتىن تالاپ ەتەدى جانە قازاقستان ونى ءوز تاجىريبەسىنەن بىلەدى دەپ اتاپ ءوتىلدى. سونىمەن قاتار, يادرولىق قارۋسىز جولدى تاڭداۋدىڭ ارقاسىندا قازاقستان الەمدىك قاۋىمداستىقتىڭ سەنىمدى سەرىكتەسىنە اينالدى, ينۆەستيتسيالاردى تارتىپ, ەكونوميكالىق دامۋدى قامتاماسىز ەتتى. ورتالىق ازياداعى يادرولىق قارۋدان ازات ايماق سولتۇستىك جارتى شارداعى العاشقى جانە جالعىز ايماق بولىپ تابىلادى. وسىنداي ايماقتى سولتۇستىك شىعىس ازيادا قۇرۋعا ۇمتىلۋ قاجەت. ازياداعى ءوزارا ىقپالداستىق جانە سەنىم شارالارى جونىندەگى كەڭەسىنىڭ (اوسشك) ازيا كونتينەنتىندەگى ىنتىماقتاستىقتى نىعايتۋداعى ءرولىن اتاپ, قازاقستان كحدر مەن جاپونيانىڭ بولاشاقتا كەڭەسكە تولىق قۇقىلى مۇشە رەتىندە كىرۋىن ماڭىزدى دەپ سانايدى.
بيىلعى جىلدىڭ قاڭتارىندا قازاقستاننىڭ بۇۇ قاۋىپسىزدىك كەڭەسىندەگى توراعالىعى بارىسىندا پرەزيدەنت نۇرسۇلتان نازارباەۆ سەنىم شارالارى ارقىلى جاپپاي قىرىپ جويۋ قارۋىن تاراتپاۋ پروبلەمالارىن شەشۋ بويىنشا ءوز تاجىريبەسىمەن جانە يدەيالارىمەن ءبولىستى. كورەي تۇبەگىندەگى سوڭعى وقيعالار وسى ءتاسىلدىڭ وزەكتىلىگى مەن سەنىمدىلىگىن كورسەتەدى. قازاقستان ينكليۋزيۆتى ديالوگتى قايتا ورناتۋداعى ەكى كورەي مەملەكەتتەرىنىڭ ماقساتتى ۇمتىلىسىن, سونداي-اق اقش پەن كورەيا رەسپۋبليكاسىنىڭ بىرلەسكەن وڭىرلىك اسكەري جاتتىعۋلاردى توقتاتۋ تۋرالى شەشىمىن قولدادى. وسىنىڭ بارلىعى سينگاپۋردا وتكەن تاريحي ءسامميتتى مۇمكىن قىلعان بەيبىت, ساياسي-ديپلوماتيالىق شارالارعا جانە كورەيارالىق كەلىسسوزدەردىڭ جالعاسۋىنا سەرپىن بەردى دەپ مالىمدەمەدە دەلىنگەن.
«پحەنيان مەن سەۋل اراسىندا جالعاسىپ كەلە جاتقان دوستىق نەگىزىندەگى ساياسي ديالوگ جانە ءوزارا ءتيىمدى جوبالار وڭىردەگى شيەلەنىستى ۇزاق مەرزىمگە باسەڭدەتۋدىڭ ەڭ ءتيىمدى ءتاسىلى بولۋى مۇمكىن. بۇل تولىق, تەكسەرۋگە جاتاتىن جانە قايتارىمسىز دەنۋكرلەاريزاتسيا ءۇشىن ءوزارا قولايلى شەشىمدەرگە جول بەرەدى», - دەپ اتاپ ءوتتى مينيستر.
قازاقستاننىڭ پىكىرىنشە, بۇل ماقسات بۇۇ قاۋىپسىزدىك كەڭەسىندەگى بىرلەستىكتى قاجەت ەتەدى. سانكتسيالار پروبلەمالىق ماسەلەلەردى تەك بەيبىت جانە ساياسي-ديپلوماتيالىق جولمەن شەشۋگە باعىتتالعان ۋاقىتشا شارا ەكەندىگى ەستە ساقتاعان ءجون. قازاقستان يادرولىق قارۋسىزدانۋ ۇدەرىسىنىڭ اشىقتىعى مەن سالماقتىلىعىن قولدايدى. ولار بارلىق تاراپتاردىڭ مۇددەلەرىن جانە وزدەرىنە جۇكتەلگەن مىندەتتەمەلەردى ىسكە اسىرۋدى بىركەلكى ەسكەرۋ قاجەت. قاڭتاردا وتكەن جيىندا قازاقستان پرەزيدەنتى قارۋسىزدانىپ جاتقان تاراپقا قاۋىپسىزدىك كەپىلدىكتەرىن ۇسىنۋ العا جىلجۋدىڭ وتە ماڭىزدى ءارى قاجەتتى شارتى ەكەنىن اتاپ ءوتتى.
«وسى تۇرعىدا قازاقستان كحدر وزىنە جۇكتەگەن بارلىق مىندەتتەردى تولىق ورىندايتىنىنا جانە يادرولىق قارۋدى تاراپتاۋ تۋرالى شارتقا (ياقتش) قايتا ورالاتىنىنا جاۋاپ رەتىندە يادرولىق دەرجاۆالار تاراپىنان قاۋىپسىزدىكتىڭ سەنىمدى شارالارىن ۇسىنا وتىرىپ, سولتۇستىك كورەيانى دايەكتى دەنۋكلەاريزاتسيالاۋ بويىنشا جول كارتاسىن ازىرلەۋ مۇمكىندىگىن قاراستىرۋدى ۇسىنۋدا. وسى ءىس-ارەكەت باعدارلاماسىن ىسكە اسىرۋ مىندەتىن ورىنداماعان جاعدايداعى سالدارىن كورسەتە وتىرىپ, كەڭەستىڭ ءتيىستى قارارىمەن بەكىتۋگە بولادى. قازاقستان دەنۋكلەاريزاتسيالاۋ ۇدەرىسىن دايەكتى جانە اشىق ىسكە اسىرۋ ءۇشىن ءوز تاجىريبەسىمەن جانە تەحنيكالىق بىلىمىمەن بولىسۋگە دايىن.