شىعىس قازاقستان وبلىسىنىڭ بورودۋليحا اۋدانىندا سوعىس ارداگەرى, گەنەرال-لەيتەنانت ماتۆەي مەركۋلوۆتىڭ 100 جىلدىعىنا ارنالعان ايتۋلى شارالار ءوتتى. الدىمەن جاڭا ءشۋلبى اۋىلىنداعى سوعىس ارداگەرى اتىنداعى كوشەدە ەسكەرتكىش تاقتا اشىلدى.
شاراعا رەسپۋبليكالىق «گەنەرالدار كەڭەسى» قوعامدىق بىرلەستىگى پرەزيديۋمىنىڭ توراعاسىنىڭ ورىنباسارى تۇرسىن ايجولوۆ, گەنەرال-مايور توقتاسىن بۇزاۋباەۆ, قر ۇقك شەكارالىق قىزمەت اكادەمياسى شۇعىل-تاكتيكالىق فاكۋلتەتىنىڭ پەداگوگيكا جانە يدەولوگيا كافەدراسىنىڭ پروفەسسورى ەربولات اقشولاقوۆ, بورودۋليحا اۋدانىنىڭ اكىمى گريگوري اكۋلوۆ جانە ۇلتتىق قاۋىپسىزدىك كوميتەتىنىڭ ارداگەرلەرى, قر ۇقك شەكارا قىزمەتىنىڭ قىزمەتكەرلەرى جانە اۋدان تۇرعىندارى قاتىستى.
-گەنەرال-لەيتەنانت ماتۆەي مەركۋلوۆ 1938 جىلى ءوزىنىڭ تۋعان اۋىلى جاڭا شۇلبىدە دۇنيەگە كەلدى,-دەدى اۋىلدىق وكرۋگ اكىمى كۇلجانات قارىموۆا,-1942 جىلى لەيتەنانت رەتىندە 162-ىنگى ورتالىق ازيا ديۆيزياسىنىڭ 224-ءىنشى اتقىشتار پولكىنا قابىلدانعان. كۋرسك شايقاسىندا ەرلىك كورسەتكەن. جارالانىپ, ودان ەمدەلگەن سوڭ ەكىنشى بەلورۋسس مايدانىنا اتتانادى. ول شەكاراشى كوماندير رەتىندە ساربازدارعا ۇلگى بولىپ, ەرلىكتەرىمەن كوزگە ءتۇستى. سوعىستان كەيىن دە شەكارا قىزمەتىندە جۇمىسىن تاستاماي جالعاستىرا ءبىلدى. الماتى قالاسىنداعى جوعارعى شەكارا كوماندالىق ۋچيليششەسىن ۇزاق جىلدار ابىرويمەن باسقاردى. ماتۆەي مەركۋلوۆ ەرلىكتەرى ۇرپاققا ونەگە.
شارا بارىسىندا جاڭا ءشۇلبى اۋىلىنىڭ مادەنيەت ۇيىندە كەڭەس وداعى باتىرىنىڭ ءومىرىن ناسيحاتتايتىن فوتوسۋرەتتەر, تاريحي دەرەكتەر كورمەسى ۇيىمداستىرىلدى. م. مەركۋلوۆ تامامداعان مەكتەپكە قر ۇقك شەكارا قىزمەتى اكادەمياسىنان «شەكارا ءۇشىن بەرىلگەن جىلدار» اتتى كىتاپ سىيعا تارتىلدى. ال سوعىسقا قاتىسقان ۇقك اعا ارداگەرى ابدىعالي قايمولدين م. مەركۋلوۆتىڭ وسى 100 جاس مەرەيتويىنا وراي «قر ۇقك قۇرمەتتى قىزمەتكەرى» توسبەلىگىسىنە يە بولدى. وسىنداي مەرەكەلىك مەدالمەن بىرقاتار قىزمەتكەرلەر دە ماراپاتتالدى.
راۋشان نۇعمانبەكوۆا,
بورودۋليحا اۋدانى
شىعىس قازاقستان وبلىسى