كەنشىلەر استاناسىندا ەسترادا ورىنداۋشىلارىنىڭ رەسپۋبليكالىق «جۇلدىز-2018» ءان بايقاۋى قاتارىنان سەگىزىنشى مارتە ءوتتى. كىل مىقتىنى انىقتايتىن كونكۋرس بيىل استانانىڭ 20 جىلدىعىنا ارنالدى. ونەر دوداسىنا ەلىمىزدىڭ تۇكپىر-تۇكپىرىنەن 18 ۇمىتكەر قاتىسىپ, باس جۇلدە ءۇشىن ءوزارا باق سىناسقان بولاتىن.
بايقاۋدىڭ تالابىنا ساي, ءاربىر ۇمىتكەر ەكى اننەن ورىنداپ شىقتى. ءبىرىنشى كەزەكتە الەمدىك حيت اندەر ورىندالسا, شەشۋشى كەزەڭدە قازاقتىڭ تانىمال تۋىندىلارى شىرقالدى.
تالابى تاۋداي تالانت يەلەرىن انىقتاپ, ولاردى شىعارماشىلىققا باۋلۋ ماقساتىندا وتكەن رەسپۋبليكالىق ءان بايقاۋىنا ەلىمىزگە بەلگىلى مادەنيەت قايراتكەرلەرى مەن انشىلەر قازىلىق ەتتى. قازىلار القاسى مۇشەلەرىنىڭ ءبىرى, «مۇزارت» توبىنىڭ ءانشىسى ساكەن مايعازيەۆتىڭ ايتۋىنشا, مۇنداي ونەر بايقاۋلارى انشىلەردىڭ كاسىبي دەڭگەيگە كوتەرىلۋىنە تىكەلەي ىقپال ەتەدى. سونداي-اق وسىعان بالاما بولاتىن ءان كونكۋرستارى ءجيى وتكىزىلسە دەگەن تىلەك تە ايتىلدى.
سونىمەن بايقاۋ ناتيجەسى بويىنشا ءداستۇر اسىلحان (استانا قالاسى), انار تاجەنتاەۆا (قاراعاندى وبلىسى) جانە ايلينا لەپەسوۆا (الماتى قالاسى) ديپلومانت اتانسا, پاۆلوداردان كەلگەن ناتاليا پروتسكايا كورەرمەندەر كوزايىمىنا اينالدى.
بايقاۋدىڭ ءۇشىنشى جۇلدەسىنە مەرجان قابدولوۆ (اتىراۋ وبلىسى) پەن جانەركە قاباتاەۆا (شقو) لايىق دەپ تانىلدى. تۇركىستان وبلىسىنىڭ ءانشىسى ەرىك تولەنوۆ ەكىنشى جۇلدەگە يە بولسا, ءبىرىنشى ورىن الماتى وبلىسىنان كەلگەن ۇمىتكەر قارلىعاش بيعازىقىزىنا بۇيىردى. ال «جۇلدىز-2018» رەسپۋبليكالىق بايقاۋىنىڭ گران-پري جۇلدەسىنە سولتۇستىك قازاقستان وبلىسىنان كەلگەن ءادىلحان ماكين يە بولدى.
كونكۋرستا ۇزدىك شىققاندارعا ديپلومدار مەن اقشالاي سەرتيفيكاتتار تابىس ەتىلدى. بايقاۋ سوڭى كونكۋرس جەڭىمپازدارى مەن قازىلار القاسىنىڭ مۇشەلەرى جانە قازاق ەستراداسى جۇلدىزدارىنىڭ قاتىسۋىمەن وتكەن گالا-كونتسەرتكە ۇلاستى.
قايرات ءابىلدا,
«ەگەمەن قازاقستان»
قاراعاندى