جاقىندا ءسىم-ءنىڭ جاۋاپتى حاتشىسى, ەحرو-2017 جوباسىنىڭ ۇلتتىق ۇيلەستىرۋشىسى ءراپىل جوشىباەۆ گەرمانياعا جۇمىس ساپارىمەن بارىپ قايتتى. ساپاردىڭ نەگىزگى ماقساتى قازاقستاننىڭ 2017 جىلى استانادا ەحرو حالىقارالىق كورمەسىن وتكىزۋگە تاپسىرىسىن ىلگەرىلەتۋ بولدى.
بەرليندە بولۋى كەزىندە ر.جوشىباەۆ ساۋدا-ەكونوميكالىق ىنتىماقتاستىق بويىنشا قازاقستان-گەرمانيا ۇكىمەتارالىق جۇمىس توبىنىڭ تەڭ توراعاسى, گفر ەكونوميكا جانە تەحنولوگيا ءمينيسترىنىڭ ورىنباسارى كارل-ەرنست براۋنەرمەن كەزدەستى. گەرمانيانىڭ فەدەرالدىق ەكونوميكا جانە تەحنولوگيا مينيسترلىگى ەحرو ماسەلەلەرىنە جەتەكشىلىك ەتەتىن وكىلدى ورگان بولىپ تابىلادى.
كەلىسسوزدەر بارىسىندا ەكى جاقتى ساياسي, ساۋدا-ەكونوميكالىق قارىم-قاتىناستاردىڭ كوكەيكەستى قىرلارى قوزعالدى. ك.-ە.براۋنەر قازاقستاننىڭ گەرمانيا ءۇشىن ورتالىق ازياداعى اسا ماڭىزدى ساياسي جانە ەكونوميكالىق ارىپتەس بولىپ تابىلاتىنىن اتاپ ءوتتى. ەكى جاقتى ساپارلار الماسۋ وتە جوعارى دەڭگەيدە ءجۇرىپ جاتسا, ەكى جاقتى قارىم-قاتىناستاردىڭ كۇن تارتىبىندە تۇرعان ماسەلەلەردىڭ تاقىرىبى دا سان الۋان.
گەرمانيا تارابىنىڭ اقپاراتى بويىنشا, تەك ۇستىمىزدەگى جىلدىڭ العاشقى جارتىسىنداعى ءوزارا تاۋار اينالىمى كولەمىنىڭ ءوزى 26 پايىزعا ۇلعايىپ, 3,5 ملرد. ەۋرودان اسىپ ءتۇسىپ وتىر. تۇتاستاي العاندا, گەرمانيا مەن قازاقستاننىڭ ءوزارا ساۋدا-ساتتىق كولەمى گفر-ءدىڭ بۇكىل ورتالىق ازيا مەن كاۆكازداعى 8 مەملەكەتتى قوسقانداعى تاۋار اينالىمىنىڭ 63 پايىزىن قۇرايدى.
ءوز كەزەگىندە قازاقستاندىق ديپلومات سۇحباتتاسىن قازاقستاندا جۇزەگە اسىرىلىپ جاتقان ۇدەمەلى يندۋستريالىق-يننوۆاتسيالىق دامۋ, سونداي-اق قازاقستاننىڭ 2020 جىلعا دەيىنگى ستراتەگيالىق دامۋ جوسپارىنىڭ نەگىزگى باعىتتارىمەن تانىستىردى.
اڭگىمە بارىسىندا ەحرو-2017 حالىقارالىق مامانداندىرىلعان كورمەنى ۇيىمداستىرۋ مەن وتكىزۋ ماسەلەلەرى بويىنشا پىكىر الماسىلدى. ال بولاشاق كورمەنىڭ باستى تاقىرىبى «بولاشاقتىڭ ەنەرگياسى» بولادى دەپ كۇتىلۋدە.
ەحرو-2017-ءنى وتكىزەتىن ەل تۋرالى كورمەلەردىڭ حالىقارالىق بيۋروسى (كحب) شىعاراتىن شەشىم داۋىس بەرۋ ارقىلى 157 مۇشە ەلدىڭ قاتىسۋىمەن الداعى جىلدىڭ جەلتوقسان ايىندا جۇزەگە اسىرىلاتىن بولادى.
«ەگەمەن-اقپارات».