29-30 قىركۇيەك ارالىعىندا ۆەلوشاباندوزدار اراسىندا وتەتىن ءداستۇرلى «الماتى تۋرى-2018» جارىسىنىڭ ءبىرىنشى كەزەڭى تانىمال سپورتشى, كوپتەگەن رەسپۋبليكالىق جانە حالىقارالىق جارىستاردىڭ جەڭىمپازى اندرەي كيۆيلەۆتىڭ قۇرمەتىنە ارنالادى.
سپورتتىق جولىن ءوزىنىڭ تۋعان جەرى – تالدىقورعان قالاسىندا باستاعان اندرەي كيۆيلەۆ جاستايىنان جاسىنداي جارقىرىپ, ەلىمىزدىڭ ماڭدايالدى ۆەلوشاباندوزدارىنىڭ بىرىنە اينالادى. 1994 جىلى حيروسيمادا الاۋى تۇتانعان ازيا ويىندارىنىڭ توپتىق سايىسىندا جەڭىمپاز اتاندى. ودان كەيىن دە تالاي بايراقتى باسەكەدە قازاقستاننىڭ نامىسىن ابىرويلى قورعادى. 1997 جىلدان بەرى جەرلەسىمىز كاسىپقويلار اراسىندا باق سىناۋ قۇرمەتىنە بولەنىپ, قارت قۇرلىققا تانىمال «فەستينا», «Ag2r Prévoyance» جانە «Cofidis» كلۋبتارى ساپىندا تابىستى ونەر كورسەتتى. 2001 جىلى كيۆيلەۆ ءوزىنىڭ سپورتتىق مانسابىنداعى ءىرى جەڭىستەرگە قول جەتكىزەدى. سول ماۋسىمدا بىرقاتار جاۋاپتى جارىستاردا جەڭىس تۇعىرىنا كوتەرىلگەن ول ۆەلوسپورت الەمىنىڭ ەڭ بەلدى دوداسى – «تۋر دە فرانس» كوپكۇندىگىندە ءتورتىنشى ورىنعا تابان تىرەپ, تورتكۇل دۇنيە جۇرتشىلىعى نازارىن وزىنە اۋداردى.
2003 جىلدىڭ كوكتەمىندە اندرەي كيۆيلەۆ فرانتسيادا ءداستۇرلى تۇردە ءوتىپ تۇراتىن «پاريج–نيتستسا» دوداسىنا قاتىسادى. مارە سىزىعىنا 40 شاقىرىمداي قالعاندا ول پولشالىق مارەكو رۋتكەۆيچ جانە گەرمانيالىق فولكەر وردوۆسكيمەن قاقتىعىسادى. جارىس جولىنا دۋلىعا كيمەي شىققان جەرلەسىمىز باسىمەن جەرگە وڭباي قۇلايدى. اسا اۋىر حالدە جاتقان قازاقستاندىق سپورتشى اۋەلدە جاقىن ماڭدا ورنالاسقان اۋرۋحاناعا جەتكىزىلەدى. كوپ كەشىكپەي ونى تىكۇشاقپەن سەنت-ەتەن قالاسىنداعى زەرتتەۋ ورتالىعىنا اپارادى. دارىگەرلەر قانشا جانتالاسقانىمەن, اندرەيدى اجال تىرناعىنان امان الىپ قالۋ مۇمكىن بولمادى. 12 ناۋرىزدا 29 جاستاعى ورەنىمىز كوز جۇمدى.
ال «الماتى تۋرىنا» كەلەر بولساق, بۇل باسەكەدە 2013 جىلدان بەرى ۇزدىكسىز ۇيىمداستىرىلىپ كەلەدى. تۇساۋكەسەر دودادا ماكسيم يگلينسكي توپ جارسا, ودان كەيىن قاتارىنان ءتورت رەت الەكسەي لۋتسەنكو جەڭىمپاز اتاندى. بيىلعى جارىس تا ادەتتەگىدەي ەكى كەزەڭنەن تۇرادى. ول «استانا» الاڭىنان باستاۋ الىپ, «مەدەۋدە» ءوز مارەسىنە جەتەدى.
عالىم سۇلەيمەن
«ەگەمەن قازاقستان»
الماتى