2019 جىلدىڭ 2-12 ناۋرىزى ارالىعىندا رەسەيدىڭ كراسنويارسك قالاسىندا كۇللى الەمنىڭ سپورتتى سەرىك ەتەتىن اسا دارىندى ستۋدەنتتەرىنىڭ باسىن قوساتىن XXIX دۇنيەجۇزىلىك قىسقى ۋنيۆەرسيادانىڭ وتەتىنى بەلگىلى.
بۇگىن يتاليانىڭ تۋرين قالاسىندا ايتۋلى جارىستىڭ الاۋى تۇتانادى. 24 قىركۇيەكتە ول XXVIII دۇنيەجۇزىلىك قىسقى ۋنيۆەرسيادانىڭ استاناسى بولعان الماتى قالاسىنا جەتەدى. الاۋ ەستافەتاسى اباي كوشەسىنىڭ بويىنداعى بالۋان شولاق اتىنداعى سپورت سارايىنان باستالىپ, رەسپۋبليكا سارايىنا دەيىن جالعاسادى. القىزىل الاۋدى تانىمال سپورتشىلار مەن جوعارى وقۋ ورىندارىنىڭ رەكتورلارى الىپ جۇرەتىن بولادى. ارادا ەكى تاۋلىك وتكەننەن سوڭ سالتاناتتى شەرۋ قىتايدىڭ حاربين قالاسىندا جالعاسادى. ال 29 قىركۇيەكتە الاۋ رەسەيگە جەتكىزىلەدى. سول كۇننەن باستاپ, كەلەسى جىلدىڭ 1 ناۋرىزىنا دەيىن جالعاساتىن الاۋ ەستافەتاسى اتالمىش ەلدىڭ ەڭ ءىرى 30 قالاسىن ارالاپ, اقىرىندا كراسنويارسكىنى بەتكە الادى.
كراسنويارسكىدە وتەتىن ۋنيۆەرسيادادا الەمنىڭ 50-دەن اسا مەملەكەتىنەن 3 مىڭعا تارتا سپورتشىلار باق سىنايدى دەپ كۇتىلۋدە. ستۋدەنتتەر 11 سپورت تۇرىنەن 76 مەدال جيىنتىعىن ساراپقا سالادى.
عالىم سۇلەيمەن,
«ەگەمەن قازاقستان»
الماتى