بۇگىن قازاقستان رەسپۋبليكاسى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اليك شپەكباەۆ جامبىل وبلىسىنا جۇمىس ساپارىمەن كەلدى. ساپار بارىسىندا اگەنتتىك توراعاسى جامبىل وبلىسىنىڭ اكىمى اسقار مىرزاحمەتوۆپەن بىرگە قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسى جامبىل وبلىستىق فيليالىنىڭ اشىلۋ راسىمىنە قاتىستى.
سونىمەن قاتار, فيليالدىڭ اشىلۋ سالتاناتىندا پرەزيدەنت جانىنداعى مەملەكەتتىك باسقارۋ اكادەمياسىنىڭ رەكتورى فاتيما جاقىپوۆا جانە الماتى, قىزىلوردا, تۇركىستان وبلىستارى مەن الماتى, شىمكەنت قالالارىنىڭ اۋماقتىق دەپارتامەنتتەرىنىڭ باسشىلارى دا بولدى. اليك شپەكباەۆ ءوز سوزىندە مەملەكەتتىك باسقارۋ اكادەمياسىنىڭ وڭىرلەردەگى فيليالدارىنىڭ اشىلۋى ەلىمىزدەگى مەملەكەتتىك قىزمەتشىلەردىڭ دامۋىنا ايتارلىقتاي ۇلەس قوساتىنىن ايتىپ ءوتتى.
تاراز قالاسىندا ورنالاسقان اكادەميا فيليالى ەلىمىزدە مەملەكەتتىك قىزمەتكەرلەردى وقىتۋدىڭ بىرىڭعاي جۇيەسىن قۇرۋ شەڭبەرىندە اشىلعان بولاتىن. سونىمەن قاتار, اتالمىش فيليال وڭىردەگى مەملەكەتتىك قىزمەتشىلەردىڭ بىلىكتىلىگىن ارتتىرۋعا ارنالعان. ورتا ەسەپپەن العاندا, فيليال بازاسىندا وبلىستاعى مەملەكەتتىك ورگانداردىڭ ەكى مىڭعا جۋىق قىزمەتكەرى قايتا دايارلانىپ, بىلىكتىلىگىن ارتتىرا الادى. اكادەميا فيليالى مەملەكەتتىك باسقارۋداعى جوبالىق باسقارۋدى قولدانۋ بويىنشا دا كونسۋلتاتسيالىق قىزمەتتەر كورسەتەدى. بۇل ماقساتتا قاجەتتى ينفراقۇرىلىم مەن پەداگوگيكالىق الەۋەت قاراستىرىلعان.
بۇدان كەيىن اگەنتتىك توراعاسىنىڭ جامبىل وبلىسىنا ءىسساپارى تاراز قالاسىنداعى بىرقاتار نىسانداردا جالعاسادى.
حاميت ەسامان,
«ەگەمەن قازاقستان»
جامبىل وبلىسى