ەۋرازيالىق ەكونوميكالىق قوعامداستىقتىڭ پارلامەنتارالىق اسسامبلەياسىنىڭ سانكت-پەتەربۋرگتەگى ون ءۇشىنشى وتىرىسىنا قاتىسقان قازاقستان پارلامەنتى سەناتىنىڭ ءتوراعاسى قايرات ءمامي باستاعان پارلامەنتتىك دەلەگاتسيا بىرنەشە تۇراقتى كوميسسيادا باس قوسىپ, ءبىزدىڭ ەل تاراپىنان كوتەرىلگەن ماسەلەلەر بويىنشا كوزقاراستارىن ءبىلدىردى.
سانكت-پەتەربۋرگتىڭ كورنەكتى جەرىندە ورنالاسقان تاۆريا سارايى تاريحتىڭ قويىپ كەتكەن قامالى ما دەگەندەي. ساراي سىرتىنداعى «بۇل جەردە رەسەيدىڭ I, II, III دۋماسىنىڭ وتىرىستارى ءوتكەن» دەگەن جازۋدى كورىپ, حالقىمىزدىڭ ءاليحان بوكەيحانوۆ, احمەت ءبىرىمجانوۆ, ءشايمەردەن قوسشىعۇلوۆ, مۇحامەدجان تىنىشباەۆ سىندى ارداقتى ۇلدارىنىڭ تابانى تيگەن, ەلدىڭ ءسوزىن سويلەگەن قاسيەتتى ورىن ەكەن-اۋ, دەپ ىشىنە ەنگەندە بۇل سارايدا تاريح جىلناماسىنىڭ جازىلۋىن جۇرىسىنەن جاڭىلدىرعان لەنيننىڭ «اپرەل تەزيستەرى» دە وسىندا جاريالانعاندىعى دا جازىلىپتى. ەكىنشى ەكاتەرينا پاتشايىمنىڭ زامانىندا ونىڭ الپەشتەۋشىسى گراف پوتەمكينگە ارناپ ارحيتەكتور ي.ستاروۆتىڭ جوباسىمەن سالىنعان ساراي اۋاسىمەن تىنىستاعانىڭىزدا, كوڭىلىڭىز تاريح قويناۋىنا ەرىكسىز دەندەي بەرەدى.
تاۆريا سارايى سول تىنىسىنان ءالى دە جاڭىلماعان قالىپتا. جاڭىلماعانى ەمەي نەمەنە, ارادا تالاي ونداعان جىلدار تاريح قويناۋىنا ەنگەنىمەن, ەۋرازەق پارلامەنتارالىق اسسامبلەياسىنىڭ شتاب-پاتەرى وسى سارايعا قونىستانعان.
ق.ءمامي باستاعان سەرىك اقىلباي, بولات جىلقىشيەۆ, ميحايل بورتنيك, نۇرلان سۇلەيمەنوۆ سىندى دەپۋتاتتاردان قۇرالعان دەلەگاتسيا ساپار بارىسىندا جوعارىدا ايتىلعان وتىرىستارمەن بىرگە, بىرنەشە تۇراقتى كوميسسيالاردىڭ جۇمىسىنا قاتىستى. اگروونەركاسىپتىك ساياسات, تابيعاتتى پايدالانۋ جانە ەكولوگيا ءجونىندەگى تۇراقتى كوميسسيا وتىرىسىنا قاتىسىپ شىققان سەناتور ب.جىلقىشيەۆتى سوزگە تارتقانىمىزدا, ول: «بۇگىنگى تۇراقتى كوميسسيانىڭ وتىرىسىنا ەۋرازەق-قا ءمۇشە ەلدەر پارلامەنتتەرىنىڭ وكىلدەرى تەگىس قاتىناستى. ونىڭ ىشىندە وندىرىستەگى اپاتتاردى بولدىرماۋ, الدىن الۋ, ساقتانۋ سەكىلدى ماسەلەلەرمەن قاتار, ونەركاسىپتىك قالدىقتاردىڭ تابيعاتقا تيگىزەتىن كەرى اسەرلەرىنە قاتىستى تيپتىك زاڭداردى قاراستىردىق. جانە دە رەسەي, قازاقستان, بەلارۋس اراسىنداعى كەدەن وداعىنا بايلانىستى وسى ەلدەردىڭ اۋىل شارۋاشىلىعىنا بەرىلەتىن مەملەكەتتىك كومەكتى شەكتەۋ ماسەلەلەرىن تالقىلادىق. ماسەلەن, ءبىزدىڭ ەلىمىزدە بۇل كومەك 4 پايىز شەگىندە بولسا, رەسەيدە – 6, ال بەلارۋستە ول 18 پايىز كولەمىندە. نەگىزىنەن ول كومەكتى 10 پايىز كولەمىندە كورسەتىلۋ كەلىسىلگەن, الايدا, قازىر ول بىردەي دەڭگەيدە بولماي وتىر. سوندىقتان, قازاقستان مەن رەسەي 10 پايىزعا دەيىن كوتەرۋى قاجەت تە, بەلارۋس ونى كەمىتۋى ءتيىس. ال ول ءۇشىن ولارعا ءبىر وتپەلى كەزەڭ بەرىلىپ وتىر. جانە دە دەپۋتاتتاردىڭ نازارىن ەرەكشە اۋدارعان ماسەلەنىڭ ءبىرى رف-نىڭ بسۇ-عا كىرۋىنە قاتىستى بولعانىن ايتقان ءجون», دەسە, دەپۋتات ميحايل بورتنيك: «قارالعان ماسەلەلەر وتە كەڭ اۋقىمدى قامتىدى. ونىڭ ىشىندە الداعى جىلدان جۇمىسىن باستايتىن ەكونوميكالىق وداققا قاتىستى وسى ەلدەردەگى زاڭنامالارعا قاجەتتى وزگەرىستەر ەنگىزۋ, ءبىر مەملەكەتتەن ەكىنشى مەملەكەتكە قونىس اۋداراتىن ادامداردىڭ ازاماتتىقتارى مەن ەڭبەك ميگراتسياسى سياقتى زاڭداردى ۇيلەستىرۋ كەڭىنەن اڭگىمەلەندى. سونىمەن قاتار, ترانسۇلتتىق وزەندەر مەن كاسپي, ارال سەكىلدى تەڭىزدەردى پايدالانۋ جايى دا دەپۋتاتتار نازارىندا بولدى. ارينە, تەك ءبىر ەل عانا ەمەس, بىرنەشە مەملەكەت پايدالاناتىن سۋ كوزدەرىنە قاتىستى بىرىڭعاي زاڭ بولۋى قاجەتتىلىك», دەدى.
قۇقىقتىق, كەدەندىك ۇيلەستىرۋ مەن شەكارالىق ساياسات, ساۋدا جانە حالىقارالىق ىقپالداستىق بويىنشا تۇراقتى كوميسسيانىڭ وتىرىسىنان شىققان سەناتور سەرىك اقىلباي: «كوميسسيانىڭ اتى ايتىپ تۇرعانداي, قارالعان ماسەلەلەردىڭ دەنى زاڭدارىمىزدى ءبىر-بىرىنە جاقىنداتۋ تۇرعىسىندا بولدى. اسىرەسە, بىرىڭعاي ەكونوميكالىق كەڭىستىكتى قۇرۋدىڭ نەگىزىندە زاڭداردى بىرىزدەندىرۋ, ودان سوڭ وسى جۇمىستى ۇيلەستىرۋ تۋراسىندا كەڭەسىلدى. سونىمەن بىرگە, ازاماتتارىمىزدىڭ شەكارادان وتۋلەرىندە بيومەتريالىق ءمالىمەتتەر تۋراسىنداعى زاڭدارىمىزدىڭ بىردەيلىگى, سوت شەشىمدەرىنىڭ ورىندالۋىندا بىركەلكىلىك جايى ايتىلدى. مىسالى, ءبىزدىڭ ەلىمىزدە تۇرىپ جۇمىس ىستەپ, وسىندا جاۋاپقا تارتىلىپ, سوت شەشىمى شىققان جاعدايدا, قونىس اۋدارىپ نەمەسە ەلىنە قايتا كەتكەن ازاماتتاردىڭ سۇراۋ سالىنۋ بويىنشا زاڭ الدىندا جاۋاپقا تارتىلۋى, سونى بارعان جەرىندە ورىنداۋ تۋراسىنداعى ماسەلەلەر قارالدى», دەدى.
وتىرىستارداعى ءۇزىلىس كەزىندە رەسەي دەپۋتاتى, وزىمىزبەن كورشى جاتقان قورعان وبلىسىنىڭ وكىلى ولەگ پانتەلەەۆتى اڭگىمەگە تارتتىق. ولەگ ەۆگەنەۆيچ: – جالپى, ىنتىماقتاسا جۇمىس ىستەۋ, ينتەگراتسياعا ۇمتىلۋ الدىمەن قاراپايىم حالىققا وتە پايدالى, – دەپ ءسوز باستاعان. – ماسەلەن, كەدەن وداعى جۇمىس ىستەي باستاۋىمەن ورتالىق ازيادان, باتىس سىبىردەن رەسەيدىڭ ىشكى جاعىنا وتەتىن پويىزدار ءجۇرىسى اجەپتاۋىر جىلدامدادى. بۇرىن ساعاتتاپ كەدەندىك تەكسەرۋدەن وتەتىن حالىق ەندى وعان الاڭدامايدى. قازىر شەكارادا بۇرىنعىداي تۇرۋ جوق. ال بۇگىنگى وتىرىستاردا, ەۋرازەق-تىڭ تۇراقتى كوميسسيالارىندا ماڭىزدى ماسەلەلەردى ءسوز ەتتىك. ەكونوميكالىق ىقپالداستىقتىڭ قاي ەلدىڭ دە حالقىنا تيگىزەتىن پايداسى مول. وعان ونىڭ جۇمىسىنا قاتىسقان بارلىق دەپۋتاتتار كەلىسەدى. ارينە, بارلىق ماسەلەلەردە بىردەن ءبىراۋىزدان كەلىسىمگە كەلدىك دەپ ايتۋعا بولمايدى. الايدا مۇنىڭ بارلىعى جۇمىس بارىسىندا شەشىلەتىن دۇنيەلەر, – دەپ وي ءبولىستى.
ەۋرازەق پارلامەنتارالىق اسسامبلەياسىنىڭ كەزەكتەن تىس ون ءۇشىنشى وتىرىسى اياقتالىپ, وعان قاتىسقان دەپۋتاتتار مىندەت ءجۇگىن ارقالاپ قايتتى.
انار تولەۋحانقىزى.