قادىرلى وقىرمان, عاسىرمەن ۇندەسكەن «ەگەمەن قازاقستان» گازەتى ءوزىنىڭ 100 جىلدىعى قارساڭىندا جارقىن جوبالاردى قولعا العان بولاتىن. سونىڭ ءبىرى ءارى بىرەگەيىن وزدەرىڭىزگە ۇسىنۋدىڭ ءساتى بۇگىن ءتۇسىپ وتىر. ءبىز جىل باسىندا الەمدىك مەديا كەڭىستىكتەگى امەريكالىق الپاۋىت New York Times گازەتىنىڭ باس كەڭسەسىندە بولىپ, ارىپتەستىك بايلانىس ورناتۋ ماقساتىندا كەلىسسوز جۇرگىزدىك.
سول كەلىسسوزدەر ناتيجەسىندە New York Times-ءتىڭ ماتەريالدارىن كوشىرىپ باسۋ قۇقىعىنا قول جەتكىزىپ, ارنايى مەموراندۋم جاسادىق. سونىڭ نەگىزىندە جۋرناليستيكانىڭ بيىك شىڭى سانالاتىن پۋليتتسەر سىيلىعىن 125 رەت العان New York Times گازەتىندە جارىق كورگەن كولۋمنيستەر مەن ساراپشىلاردىڭ ەڭ تاڭداۋلى ماقالالارى مەن پىكىرلەرىن, ساراپتامالارى مەن شولۋلارىن egemen.kz سايتىنىڭ اعىلشىن تىلىندەگى نۇسقاسىندا جاريالاپ قانا قويماي, قازاق تىلىنە دە اۋدارىپ, قالىڭ وقىرمانعا ۇسىنۋدى باستاپ وتىرمىز.
بۇل قادام ەلىمىزدەگى مەديا كەڭىستىكتىڭ اياسىن كەڭەيتىپ, جۇرتشىلىقتىڭ ساپالى اقپارات كوزدەرىنە دەگەن قولجەتىمدىلىگىن ارتتىرادى دەپ ويلايمىز. سونىمەن قاتار وتاندىق باسپاسوزگە ستيلدىك, مازمۇندىق جانە تىلدىك تۇرعىدان تىڭ سەرپىلىس اكەلىپ, جالپى قازاق جۋرناليستيكاسىنىڭ دامۋىنا وڭ ىقپالىن تيگىزەتىنىنە سەنىمدىمىز.
گازەتىمىزدىڭ بۇگىن قولدارىڭىزعا تيگەن سانىنداعى ارناۋلى بەتتە الەمگە ايگىلى New York Times-تە باسىلعان ماتەريالداردىڭ العاشقى لەگى جاريالانىپ وتىر. ارناۋلى بەت الداعى ۋاقىتتا اپتا سايىن تۇراقتى تۇردە شىعاتىن بولادى.
قۇرمەتپەن, دارحان قىدىءرالى