بۇگىن وڭتۇستىك كورەيا ۋاقىتىمەن ساعات 3-تەن 45 مينۋت كەتكەندە ەكى ەلدىڭ اراسىنداعى 3-ءشى سامميت باستالدى. وڭتۇستىك كورەيانىڭ پرەزيدەنتى مۋن چجە ين سولتۇستىك كورەيا ەلىنە تاڭەرتەڭگى ساعات 10-دا ۇشىپ كەلدى.
وڭتۇستىك كورەيانىڭ پرەزيدەنتى كيم دە چجۋن, نو مۋ حەننەن كەيىن 11 جىلدان سوڭ پرەزيدەنت مۋن چجە ين قايتالاپ سولتۇستىك كورەيا جەرىنە قادام باستى. سولتۇستىك كورەياعا تۇبەكتىڭ تىنىشتىعى مەن بەيبىتشىلىگىن قالاپ كەلگەن وڭتۇستىك كورەي ەلىنىڭ ءۇش پرەزيدەنتى كيم, نو, مۋن - «دەموكراتيالىق پارتيانىڭ» وكىلدەرى. بۇل كورەي ەلىندەگى ساياساتتىڭ وزگەشە ءبىر قىرىن بايقاتادى.
بۇل جولى مۋن چجە ين مەن ونىڭ جۇبايى كيم چجون سۋك حانىمدى كيم چجون ىن توراعا مەن ونىڭ جۇبايى ري سول چجۋ حانىم قارسى الدى. ەكى ەلدىڭ باسشىسى بۇرىنعى بىلەتىن ادامدارداي ءبىر-بىرىمەن ەمەن-جارقىن امانداسىپ سويلەستى. ءبىر-بىرىنە جول بەرگەندەرىنەن - ەكى ەلدىڭ باسشىلارىنىڭ دوستىعى جاراسا باستادى دەپ ايتۋعا بولادى. ۇشاقتان تۇسكەن مۋن چجە ءيندى پحەنيان حالقى اۋەجايدان باستاپ كوشە بويى قول بۇلعاپ قارسى العان ساتتە, قولدارىنا ەكى ەلدىڭ تۋى مەن تۇبەكتىڭ تۇتاستاي سالىنعان كارتاسى مەن گۇل شوقتارىن ۇستاپ شىقتى. مۋن مەن كيم مىرزا كيم توراعانىڭ كولىگىنە وتىرىپ, پحەنياندى ارالاپ, حالىقتىڭ قوشامەتىنە بولەنىپ, كيم توراعا مەن ءوزىن قۋانا قارسى العان سولتۇستىك حالقىنا شەكسىز العىسىن جەتكىزدى.
بۇگىنگى ءسامميتتىڭ 1-ءشى وتىرىسى ساعات 3 تەن 45 مينۋت كەتكەندە باستالدى. ول ەكى ساعاتقا سوزىلدى. تالقىلانعان ماسەلەر تۋرالى ەكى ەلدىڭ ۇكىمەتى حابارلايدى. 2-ءشى وتىرىس 19 كۇنى تاڭەرتەڭ جالعاسادى. اسىرەسە, وسى 2-ءشى سامميتتە تۇبەكتى يادرولىق قارۋدان ارىلتۋ ماسەلەسى تولىقتاي قاراستىرىلادى دەپ كۇتىلۋدە. ودان باسقا دا بۇگىن بەلگىلى بولعان اقپارات بويىنشا ەكى ەلدىڭ اراسىندا ءبىر-بىرىنەن ايىرىلىپ, كوز جازىپ قالعان وتباسىلاردى قايتا تابىستىرۋ ماسەلەسىن تالقىلاۋ جۇمىسى قوسىلدى. سونىمەن قاتار سولتۇستىك كورەياداعى ادام قۇقىقتارى, ياعني ايەل مەن بالا قۇقىعى دا ءسوز بولادى.
ءسامميتتىڭ وتەتىن جەرى وتە ماڭىزدى جەر. بۇل جەر ەشقاشان ەشبىر الەمدىك تەلەارنادان كورسەتىلمەگەن عيمارات. ونىڭ اتى - «چوسون ەڭبەك پارتياسىنىڭ باس عيماراتى». كورەي تىلىندە – «조선노동당본부청사» دەپ جازىلادى. بۇل عيمارات كيم توراعانىڭ رەسمي رەزيدەنتسياسى. وسى جولى ەكى ەلدىڭ بەيبىتشىلىككە باستايتىن ءسامميتىن كيم چجون ىن ءوزىنىڭ رەزيدەنتسياسىندا ارنايى وتكىزۋى – ەكى ەلدىڭ دوستىعى بۇرىنعىدان قاراعانداي ءبىرشاما جاقىنداي باستاعاندىعىن ايعاقتايدى. بۇعان دەيىنگى سامميتتەر مەن كەزدەسۋلەر بۇل ماڭىزدى عيماراتتا اتالىپ وتكەن ەمەس. وسى عيماراتقا ات باسىن تىرەگەن مۋن چجە ين ەستەلىك ءسوزى مەن ءوز تىلەگىن «ەستەلىك كىتابىنا» جازىپ قالدىردى. ول ءسوزدىڭ ماعىناسى «بەيبىتشىلىك پەن وركەندەۋ, ۇلتتىڭ جانى ءبىر» - «평화와 번영, 겨레의 마음 하나다» دەگەن ءسوز جازدى. وسىنداعى «ۇلت» دەپ العان ءسوز ەسكى كونە ءسوزدىڭ ءبىرى. اتالمىش ءسوزدىڭ ماعىناسى تەرەڭ. كورەي تىلىندە «كيورە» دەگەن ءسوزدىڭ ماعىناسى ءبىر اتادان تاراعان ۇلت دەگەن ماعىنانى بەرەدى. عالىمدار «مۋن چجە ين بۇل ءسوزدى ساپاردان بۇرىن ويلانىپ بارىپ جازعاندىعى كورىنىپ تۇر» دەگەن پىكىرلەرىن بىلدىرۋدە.
ءوزىنىڭ باس رەزيدەنتسياسىندا مۋن چجە ءيندى قارسى العان كيم چجون ىن «از دا بولسا كوپتەي كورىڭىز, ءبىراز جەتىسپەۋشىلىكتەرىمىز بار, شامامىز كەلگەنشە ءبارىن جاساپ, كۇتىپ الۋعا دايىندالدىق» دەگەن جۇرەك جاردى ويىن اشىپ ايتىپ سالدى. بۇل كيم توراعانىڭ سوزىنەن سولتۇستىكتىڭ باسشىسىنىڭ اشىقتىعى مەن ءوز ەلىنىڭ ەكونوميكالىق الەۋەتى وڭتۇستىك كورەيا ەلىنىڭ ەكونوميكاسىمەن سالىستىرۋعا كەلمەيتىندىگىن اڭعارتادى. ەكى ەلدىڭ اراسىنداعى كەزدەسۋلەردىڭ دەنى مۇمكىندىگىنشە تىكەلەي ەفيردە كۇندەلىكتى وڭتۇستىك پەن سولتۇستىك ەلىنە كورسەتىلىپ جاتىر.
داستان اقاش,
ارنايى «ەگەمەن قازاقستان» ءۇشىن
وڭتۇستىك كورەيا, سەۋل قالاسى