شوقان ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنىڭ ستۋدەنتى, ازيا ويىندارىنىڭ كۇمىس جۇلدەگەرى ايان بەيسەنباەۆتى ارداقتاعان ارنايى جيىن ءوتتى.
الدىمەن ۋنيۆەرسيتەت رەكتورى مارات سىرلىباەۆ ايان بەيسەنباەۆتى اۋىز تولتىرىپ ايتۋعا لايىق جەڭىسىمەن قۇتتىقتاپ, بولاشاعىنان زور ءۇمىت كۇتەتىنىن اتاپ ءوتتى.
– يندونەزيا ەلىندە وتكەن ءدۇبىرلى ويىنداردا قازاقستان مارتەبەسىن بيىكتەتكەن ستۋدەنتىمىز ءبارىمىزدى رۋحتاندىرىپ جىبەردى. جەرلەسىمىزدىڭ جەڭىسىنە ءدان ريزامىز. كەلەسى جىلى سپورتشىلار ءۇشىن قارجى قاراستىرىلادى. جارىسقا باراتىن سپورتشىلارىمىزدى قولداپ, دەمەۋشىلىك جاسايمىز,–دەي كەلىپ, رەكتور سپورتشىعا 250 مىڭ تەڭگەنىڭ سەرتيفيكاتىن تاپسىردى.
ايان بەيسەنباەۆتىڭ جاتتىقتىرۋشىسى, ترياتلوننان قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى يۋري سولوۆەۆقا دا سىي-سياپات جاسالدى. قازاقستان رەسپۋبليكاسىنىڭ قۇرمەتتى سپورت قايراتكەرى سابىر ءماجيتوۆ ايان بەيسەنباەۆتىڭ سپورتتاعى جەتىستىكتەرى جونىندە تارقاتىپ ايتىپ بەردى.
سپورتشى اتالمىش ۋنيۆەرسيتەتتىڭ 3 كۋرسىندا وقىپ جۇرگەندە ترياتلوننان قازاقستان رەسپۋبليكاسى ۇلتتىق قۇراماسىنىڭ مۇشەلىگىنە قابىلداندى. 2013 جىلدان بەرى قازاقستان رەسپۋبليكاسى جانە ازيا چەمپيوناتتارىنا, ازيادا ويىندارىنا, ازيا, افريكا جانە ەۋروپا كۋبوكتارىنا قاتىسىپ, جۇلدەلى ورىنداردان كورىندى. كوكشەتاۋ ترياتلون مەكتەبىنىڭ تاربيەلەنۋشىسى جوعارى سپورت شەبەرلىگى مەكتەبىنىڭ سپورتشىسى اتانىپ, حالىقارالىق دارەجەدەگى سپورت شەبەرى اتاعىنا يە بولدى.
جيىن سوڭى كوڭىلدى كونتسەرتتىك باعدارلاماعا ۇلاستى.
بايقال ءبايادىل,
«ەگەمەن قازاقستان»