بۇگىن ۇكىمەتتىڭ سەلەكتورلىق رەجىمدەگى وتىرىسىندا پرەمەر-ءمينيسترىنىڭ ورىنباسارى - اۋىل شارۋاشىلىعى ءمينيسترى ومىرزاق شوكەەۆ بيىلعى كۇزگى جيىن-تەرىم ناۋقانىنىڭ بارىسىمەن تانىستىردى.
ونىڭ ايتۋىنشا, اعىمداعى جىلى ءداندى داقىلدار 15 ملن گەكتار القاپتان جينالاتىن بولادى. ونىڭ ىشىندە بيداي 11,1 ملن گەكتاردى قۇراسا, ال مايلى داقىلداردىڭ جينالاتىن القابى 2,8 ملن گەكتار. بۇل وتكەن جىلعى دەڭگەيدەن 400 مىڭ گەكتارعا ارتىق.
رەسپۋبليكا بويىنشا 20 ملن توننا ءداندى داقىل جينالادى دەپ بولجانۋدا. مايلى تۇقىمدار ءوندىرۋ كولەمى 2,3 ملن توننا دەڭگەيىندە بولادى دەپ كۇتىلۋدە. بۇل كورسەتكىش استىقتىڭ ەكسپورتتىق الەۋەتىن 9 ملن تونناعا دەيىن, مايلى تۇقىمداردىڭ ەكسپورتىن 1 ملن تونناعا دەيىن جەتكىزۋگە, قۇراماجەم جانە ماي شىعاراتىن كاسىپورىنداردى شيكىزاتپەن قامتاماسىز ەتۋگە مۇمكىندىك بەرەدى.
ال اعىمداعى جىلعى كوكتەمگى ەگىس جانە ەگىن جيناۋ جۇمىستارىن قارجىلاندىرۋعا «كازاگرو» حولدينگى بيۋدجەتتىك كرەديت قاراجاتىنان 60 ملرد تەڭگە بولمەك. سونىمەن قاتار, 1985 اگروونەركاسىپتىك كەشەننىڭ 3,2 ملن گەكتاردان استام القابىنا ءداندى داقىلدار وسىرۋگە قارجىلاي قولداۋ كورسەتىلمەك.
ەركەجان ايتقازى,
«ەگەمەن قازاقستان»