بۇگىن ۇكىمەتتىڭ سەلەكتورلىق رەجىمدەگى وتىرىسىندا پرەمەر-ءمينيسترىنىڭ ءبىرىنشى ورىنباسارى اسقار مامين استانا قالاسىن دامىتۋدىڭ 2019-2023 جىلدارعا ارنالعان كەشەندى جوسپارىن تانىستىرىپ, ونداعى كولىك جانە وندىرىستىك ينفراقۇرىلىم, قالانى گازبەن, جىلۋمەن جانە ەلەكتر ەنەرگياسىمەن قامتاماسىز ەتۋ سياقتى قالا تىرشىلىگىنە قاجەتتى جوبالار جايىندا باياندادى.
جوسپارعا سايكەس, 2023 جىلعا قاراي قالا تۇرعىندارىنىڭ سانى 1,5 ملن ادام بولادى دەپ ەسەپتەلىنگەن. قالا حالقىنىڭ سانى ارتقان جاعدايدا تۇرعىن ۇيمەن قامتاماسىز ەتۋ جانە قۇرىلىس, ينجەنەرلىك ينفراقۇرىلىمدى سالۋ, ورتا ءبىلىم بەرۋ, دەنساۋلىق ساقتاۋ, مادەنيەت نىساندارىن سالۋ ماسەلەلەرى تۋىندايتىنى انىق.
«وسى جوسپاردا اتالعان ماسەلەلەر بويىنشا ناقتى شارالار قاراستىرىلعان. جوسپار بويىنشا الداعى 5 جىلدا 10 ملن شارشى مەتر تۇرعىن ءۇي سالىنادى. 546 مىڭ ادام باسپانامەن قامتاماسىز ەتىلەدى. 37 مەكتەپ, 13 دەنساۋلىق ساقتاۋ نىسانىنىڭ قۇرىلىسى جۇرگىزىلەدى. كەشەندى جوسپاردا مەملەكەتتىك جەكەشەلىك-ارىپتەستىك قولدانۋ ارقىلى جوبالاردى ىسە اسىرۋ قاراستىرىلعان. جالپى قالانىڭ دامۋىنا 6 ترلن تەڭگە جەكەمەنشىك ينۆەستيتسيا تارتىلادى», - دەدى اسقار مامين.
ال قالا اكىمى باقىت سۇلتانوۆتىڭ ايتۋىنشا, استانا قالاسىنان رەسپۋبليكالىق بيۋدجەتكە جىل سايىنعى تۇسىمدەر 14 پايىزعا, 2018 جىلعى 823 ملرد تەڭگەدەن 2023 جىلى 940 ملرد تەڭگەگە دەيىن وسەدى. سونىمەن قاتار, الداعى 5 جىلدىڭ ىشىندە ەلوردانىڭ دامۋىنا شامامەن 6 ترلن تەڭگە جەكە ينۆەستيتسيا سالىنباق. سونىمەن قاتار, 2023 جىلعا دەيىن شامامەن 10 ملن شارشى مەتر تۇرعىن ءۇي سالىنىپ, 121 شاقىرىم جول, 2 جول ايرىعى, 3 كوپىر, 1 جول وتپەسى, 1 جەر استى جولىن سالۋ جانە 1 اينالما جولدىڭ قۇرىلىسىن اياقتاۋ جوسپارلانىپ وتىر.
ەركەجان ايتقازى,
«ەگەمەن قازاقستان»