الەمنىڭ تۇكپىر-تۇكپىرىنەن جينالعان التى رەجيسسەر Hollywood Foreign Press Association (Film Independent سەرىكتەستىك نەگىزىندە قۇرىلعان) تاعايىنداعان العاشقى رەزيدەنتتىك گرانتقا يە بولدى. بۇل تىزىمدە ۆەنەتسيا كينوفەستيۆالىنىڭ «كوكجيەكتەر» سەكتسياسىندا «ۇزدىك رەجيسسەر» اتانعان وتاندىق رەجيسسەر ەمير بايعازيننىڭ دە ەسىمى بار.
گرانتقا يە بولعان كينوگەرلەر بەلدى رەجيسسەرلەردىڭ جەتەكشىلىگىمەن وتەتىن سەمينارلارعا, شەبەرلىك ساعاتتارعا قاتىسۋ ءۇشىن كەلەسى جىلى قاڭتاردىڭ 2-ءسى مەن 23-ءى ارالىعىندا لوس-اندجەلەس قالاسىنا اتتانادى. جەڭىمپازدار Film Independent ۇيىمداستىرۋىمەن ءبىلىم بەرۋ باعدارلامالارىنا, كورسەتىلىمدەرگە, سونداي-اق جىل سايىن وتكىزىلەتىن 76-شى «التىن گلوبۋس» سالتاناتىنا قاتىسادى.
سونىمەن قاتار, تورونتو كينوفەستيۆالىندەگى «پلاتفورما» كونكۋرستىق باعدارلاماسىنىڭ جەڭىمپازى انىقتالدى. بۇل بايقاۋدىڭ باستى جۇلدەسى رەجيسسەر حو ۆي-ديننىڭ «باقىتتى قالا» فيلمىنە بۇيىردى. ال ەمير بايعازيننىڭ «وزەن» ءفيلمى قازىلار القاسىنىڭ قۇرمەتتى اتالىمىنا يە بولدى.
- فەستيۆال بارىسىندا ءبىز 12 ءفيلمدى كورىپ تاماشالادىق. اۆتورلىق كينونىڭ بولاشاعى سەنىمدى قولدا ەكەنىنە ءۇمىتىمىز زور. سوندىقتان دا جەڭىمپازدى انىقتاۋ بىزگە قيىن بولدى. قازىلار القاسىنىڭ اتىنان (بەلا تارر, ميرا ناير, لي چانگ-دون) ەمير بايعازيندى جانە پوەزيالىق وقيعاسى بار, باۋراپ الاتىن كورىنىستەرى بار, ايرىقشا ادەمى تۇسىرىلگەن «وزەن» ءفيلمىن ەرەكشە اتاپ وتكىمىز كەلەدى, - دەدى ساحنا تورىنەن فەستيۆالدىڭ «پلاتفورما» باعدارلاماسى قازىلار القاسىنىڭ مۇشەسى لي چحان دون.
وتاندىق كينوتۋىندى تۋرالى قازىلار القاسىنان رەسمي ءباسپاسوز-ستەتستمەنتىندە: «دالمە-ءدال جانە مۇقيات قولونەر كومەگىمەن شىققان ەرەكشە تۋىندى ءبىزدى قاتتى قىزىقتىردى. فيلمدەگى ۆيزۋالدى كورىنىستەر جانە ونىڭ باتىل دا شىدامدى باقىلاۋ ءستيلى كوڭىلىڭدى بىردەن باۋراپ الادى» دەلىنگەن.
ايتا كەتسەك, Screendaily باسىلىمى ۇيىمداستىرعان حالىقارالىق كينوسىنشىلار رەيتينگى بويىنشا «وزەن» ءفيلمى جانە ارگەنتينالىق رەجيسسەر بەنجامين نايشتاتتىڭ «روحو» ءفيلمى 1-ءشى ورىندى يەلەندى.
ەستەرىڭىزگە سالا كەتسەك, اسلان تۋرالى تريلوگيانىڭ سوڭعى ءبولىمى - «وزەن» ءفيلمى وركەنيەتتەن الىس جەردە تۇراتىن, قالادان كەلگەن قوناقتان كەيىن ومىرلەرى كۇرت وزگەرە باستاعان بەس اعايىندى تۋرالى باياندايدى. ءفيلمنىڭ ءتۇسىرۋ جۇمىستارى وڭتۇستىك قازاقستان وبلىسىندا جۇرگىزىلدى.
ءفيلمنىڭ جارىققا شىعۋىنا بىرنەشە مەملەكەتتەر اتسالىستى, ولار: قازاقستان (قر مادەنيەت جانە سپورت مينيسترلىگى, ش.ايمانوۆ اتىنداعى «قازاقفيلم» اق, Emir Baigazin Production), نورۆەگيا (Norsk Filmproduksjon) جانە پولشا (Madants).