تۇركىستان وبلىسى بويىنشا ءار گەكتارىنان 25 تسەنتنەردەن 332 مىڭ توننا ءشيتتى ماقتا جيناۋ جوسپارلانۋدا.
ال جينالعان ءشيتتى ماقتانى العاشقى وڭدەۋدەن وتكىزەتىن 23 ليتسەنزيالانعان ماقتا وڭدەۋ كاسىپورىندارىنىڭ 304 ماقتا قابىلداۋ بەكەتتەرى بار. نەگىزىنەن وڭدەلگەن ماقتا تالشىعىنىڭ 85-90 پايىزى رەسەي, بەلورۋسسيا, لاتۆيا, ليتۆا مەن قىتاي ەلدەرىنە ەكسپورتتالادى. اعىمداعى جىلى اۋىل شارۋاشىلىعى مينيسترلىگىنىڭ بۇيرىعىنا سايكەس, ماقتا وڭدەۋ كاسىپورىندارىنا تاپسىرىلعان 1 توننا ونىمىنە 10 مىڭ تەڭگە سۋبسيديا تولەۋ جوسپارلانۋدا. بۇل باعىتقا 2,7 ملرد. تەڭگە قارجى قارالىپ وتىر.
وبلىستاعى ماقتالى اۋدانداردىڭ ءبىرى جەتىسايدا القاپقا العاشقى كومبايندار دا تۇسە باستادى. مىسالى, اۋدانداعى ىنتىماق اۋىلدىق وكرۋگىندەگى 17 گەكتار القاپقا كومباين ءتۇسىپ, ءبىر كۇندە 30 توننا ءونىم جينالعان. ال جالپى الىنعان ءونىم كولەمى 3380 تونناعا جەتىپ وتىر. قازىرگى تاڭدا اۋداندا 24222 گەكتار ماقتا القابى دەفولياتسيالانعان. بۇل جۇمىستاردى ناتيجەلى جۇرگىزۋدە اتامەكەن اۋىل وكۋرىگى كوش باستاپ كەلەدى. مۇندا بۇگىنگە دەيىن 4950 گەكتار ماقتا القابىندا قۋراتۋ شارالارى اياقتالعان.
عالىمجان ەلشىباي,
«ەگەمەن قازاقستان»
تۇركىستان وبلىسى