استانادا ۆەتنام سوتسياليستىك رەسپۋبليكاسىنىڭ قۇرىلعانىنا 73 جىل تولۋىنا وراي القالى جيىن ءوتتى. شارا بارىسىندا ۆەتنام مەن قازاقستان اراسىنداعى دوستىققا زور ۇلەس قوسقان وتانداستارمىز ماراپاتتالدى. ولاردىڭ قاتارىندا گريگوري شيشوۆ, بەلگىلى قازاقستاندىق قايىرىمدىلىق قىزمەتشىسى, پروفەسسور ورالبەك بوتباي جانە باقىت رۇستەموۆ بار. سونىمەن قاتار شەت ەلدەردىڭ ەلشىلەرى دە قاتىستى.
جيىندا ۆەتنام سوتسياليستىك رەسپۋبليكاسىنىڭ قازاقستانداعى ەلشىسى دوان تحي سۋان حيەن وسىدان 73 جىل بۇرىن 2 قىركۇيەكتە, ۆەتنام حالقىنىڭ سۇيىكتى كوشباسشىسى, پرەزيدەنت حو شي مين, حا-نوي با-دين الاڭىندا تاۋەلسىزدىك دەكلاراتسياسىن وقىپ بەرگەنىن جانە بۇل كۇن ۆەتنام دەموكراتيالىق رەسپۋبليكاسىنىڭ, قازىرگى ۆەتنام سوتسياليستىك رەسپۋبليكاسىنىڭ قۇرىلعان كۇنى بولىپ بەلگىلەنگەنىن تىلگە تيەك ەتتى.
«سول ۋاقىتتان بەرى باتىر جانە قايسار ۆەتنام حالقى كوپتەگەن قيىندىقتار مەن اۋىرتپالىقتاردى جەڭۋ ءۇشىن, ءبىزدىڭ ۇلتتىق قايتا قوسىلۋىمىزدى, تاۋەلسىزدىگىمىز بەن بوستاندىعىمىزدى ساقتاپ قالۋ ءۇشىن باسىن بىرىكتىردى, اۋقاتتى حالىق, قۋاتتى ۇلت بولۋعا, دەموكراتيالىق, ءادىل جانە وركەنيەتتى قوعام قۇرۋعا ۇمتىلدى. قازىرگى كەزدە ۆەتنام سەنىمدى دوس جانە سەرىكتەس, سونداي-اق حالىقارالىق قاۋىمداستىقتىڭ جاۋاپتى مۇشەسى بولا وتىرىپ, ايماقتىڭ جانە الەمنىڭ ىنتىماقتاستىعى مەن دامۋى, بەيبىتشىلىك مۇددەسى ءۇشىن تاۋەلسىزدىك, ءوزىن-ءوزى قامتۋ, ءوزىنىڭ سىرتقى بايلانىستارىن ءارتاراپتاندىرۋ جانە جان-جاقتى قولداۋ بويىنشا جۇيەلى سىرتقى ساياساتىن جۇرگىزۋدى جالعاستىرۋدا».
«سونىمەن قاتار مەن قازاقستان رەسپۋبليكاسى جانە ونىڭ حالقىنا ۇلتتىق دەڭگەيدە دامۋىمىز كەزىندە كورسەتكەن زور قولداۋلارى مەن ىنتىماقتاستىقتارى ءۇشىن العىس ايتقىم كەلەدى. 26 جىلدىق ديپلوماتيالىق قارىم-قاتىناسى بار ۆەتنام مەن قازاقستان دوستىق ءداستۇر نەگىزىندە ارامىزداعى جىلى دوستىق قاتىناس پەن ىنتىماقتاستىقتى ءارى قاراي نىعايتادى. سوڭعى جىلدارى ەكى ەلدىڭ اراسىنداعى كوپ قىرلى ىنتىماقتاستىق تۇراقتى نىعايىپ, دامۋدا. وسى جىلداردا ەكى ەل دە بارلىق دەڭگەيلەردە دەلەگاتسيالارمەن الماستى, اسىرەسە پرەزيدەنت نۇرسۇلتان نازارباەۆتىڭ 2011 جىلى حانويعا رەسمي ساپارىن, پرەزيدەنت چىونگ تان شانگتىڭ 2012 جىلى استاناعا مەملەكەتتىك ساپارىن جانە ۆەتنامنىڭ ۇلتتىق جينالىسىنىڭ پرەزيدەنتى نگۋەن تحي كيم نگاننىڭ 2017 جىلى قازاقستانعا رەسمي ساپارىن ەرەكشە اتاۋ كەرەك. وسى ساپارلار بارىسىندا ءتۇرلى سالالارداعى سەرىكتەستىك تۋرالى بىرقاتار ماڭىزدى قۇجاتتارعا قول قويىلدى. ۆەتنام جانە قازاقستان اراسىنداعى ەكونوميكالىق, ساۋدا جانە عىلىمي-تەحنيكالىق سەرىكتەستىك سالاسىنداعى ىنتىماقتاستىق تەتىگىن قولداي وتىرىپ, ءبىز ەكى ەل دە ساۋدا-ەكونوميكالىق بايلانىستاردى نىعايتۋ جانە ەركىن ساۋدا تۋرالى كەلىسىمدى ءتيىمدى جۇزەگە اسىرۋ بويىنشا ءىس-قيمىلداردىڭ بىرلەسكەن جوسپارلارىن ازىرلەيتىن بولادى دەپ ۇمىتتەنەمىز. ەكى ەل جان-جاقتى ساياسي ديالوگتى جانە بارلىق سالالارداعى ىنتىماقتاستىقتى دامىتۋ كەلەشەگىنىڭ كەڭ شەڭبەرىن ناقتى كوزدەيدى», دەدى ول.
سونىمەن قاتار ماڭىزدى ءماسليحاتتا قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى عالىمجان قويشىباەۆ قازاقستان رەسپۋبليكاسى مەن ۆەتنام سوتسياليستىك رەسپۋبليكاسى اراسىنداعى ديپلوماتيالىق قاتىناستاردىڭ ورناعانىنا جيىرما التى جىل تولعانىن اتاپ ءوتىپ, وسى جىلدار ىشىندە ەكىجاقتى ىنتىماقتاستىق نەگىزگى سيپاتقا يە بولعانىن, ۆەتناممەن ەكونوميكالىق ىنتىماقتاستىقتى دامىتۋ ماسەلەسى قازاقستاننىڭ سىرتقى ساياساتىندا ماڭىزدى ورىن الاتىنىن ورتاعا سالدى.
ء«بىز ۆەتناممەن ايماقارالىق ىنتىماقتاستىقتى دامىتۋعا ۇلكەن ءمان بەرەمىز. اعىمداعى جىلدىڭ سوڭىنا دەيىن قازاقستاندىق جانە ۆەتنامدىق دەلەگاتسيالاردىڭ جوسپارلانعان ساپارلارى ءوزارا ساۋدا-ساتتىقتىڭ وسۋىنە, ەكى ەل اراسىنداعى ەكونوميكالىق جانە ينۆەستيتسيالىق بايلانىستاردى كەڭەيتۋگە وڭ ىقپال ەتەتىنىنە سەنىمدىمىن», دەدى ع.قويشىباەۆ
راۋان قايدار,
«ەگەمەن قازاقستان»