جەتىسۋدا توپىراعىندا تۋىپ-وسكەن ازاماتتار وبلىستىڭ كىتاپحاناسىنا 1500 دانا كىتاپتى سىيعا تارتتى. جۇزدەن استام اۆتوردىڭ ەڭبەكتەرىنەن قۇرالعان كىتاپدى ەندى وبلىستىق سەيفۋللين اتىنداعى امبەباپ كىتاپحانا مەن تالدىقورعانداعى «VIP ZHETYSU» كىتاپحاناسىنان وقۋعا بولادى.
باستامانى اتاقتى حيرۋرگ, پروفەسسور نۇرلان ارىن قولعا الىپ, جۇزەگە اسىرىپتى. وعان عالىم ەرلان ارىن مەن «ارىس» باسپاسىنىڭ ديرەكتورى, فيلولوگيا عىلىمدارىنىڭ دوكتورى عاريفوللا انەس قولداۋ كورسەتىپتى. ناتيجەسىندە قۇنى 1 ميلليون 200 مىڭ تەڭگە تۇراتىن كىتاپ قورى جيناقتالدى.
ايتپاقشى, نۇرلان مۇحتار ۇلىنىڭ ەلگە جاساعان العاشقى سىيلىعى ەمەس. ول تۋعان جەرىنەن قول ۇزبەگەن ازامات. جانە ول التىن قولدى وتاشى عانا ەمەس, ەم-دوم باعىتىندا 220 عىلىمي ەڭبەك جازىپ, 1 عىلىم دوكتورىن, 8 عىلىم كانديتاتىن تاربيەلەگەن بىلىكتى ۇستاز رەتىندە بەلگىلى. وسى قىستا سارقان اۋداندىق اۋرۋحاناسىندا ءاليحان ەسىمدى بالاقايعا وڭەش پلاستيكاسى وتاسىن جاساپ, ءبۇلدىرشىندى اجالدان اراشالاپ قالعان بولاتىن. ءارى ول بۇل وتانى ەشقانداي اقىسىز, تەگىن جاساعان ەدى.
- بۇل باستاما – جەتىسۋ جۇرتى ءۇشىن باعالى قازىنا. ال, وسى كىتاپتاردى تۋعان حالقىنا ارنايى سىيعا تارتىپ وتىرعانداردىڭ ءبىرى – بەلگىلى عالىم-حيرۋرگ نۇرلان ارىن. ول جىل سايىن تۋعان جەرى سارقان اۋدانىنا كەلىپ, جەرلەستەرىنە تەگىن مەديتسينالىق قىزمەت كورسەتۋدى داستۇرگە اينالدىرعان. وسىنىڭ بارلىعى عالىمنىڭ تۋعان ايماعىنا جاساپ جاتقان قامقورلىعى, – دەيدى كىتاپتاردى الماتىدان ارنايى بارىپ الىپ كەلگەن الماتى وبلىسى وڭىرلىك كوممۋنيكاتسيالار قىزمەتى باسشىسىنىڭ ورىنباسارى رۇستەم كاناپيانوۆ.
جۇرت ىقىلاسىنا بولەنگەن دارىگەر ءوزىنىڭ كاسىبي قىزمەتىنەن بولەك, ءوڭىر رۋحانياتىنىڭ دامۋىنا دا ۇلەس قوسقانى قۇپتارلىق ءىس.
قالماحانبەت مۇقامەتقالي,
«ەگەمەن قازاقستان»
الماتى وبلىسى