ەلباسى نۇرسۇلتان نازارباەۆ تۇركياعا رەسمي ساپارى اياسىندا وسى ەلدەگى بيزنەس وكىلدەرىمەن جولىعىپ, بىرقاتار ماڭىزدى ماسەلەلەردى تالقىلادى.
ءىس-شارانى اشقان ەلباسى ەكى ەل اراسىنداعى قارىم-قاتىناس دوستىق سەنىمگە نەگىزدەلگەنىن اتاپ ءوتىپ, ەكونوميكالىق بايلانىستىڭ نىعايىپ كەلە جاتقانىن جەتكىزدى.
پرەزيدەنت قازاقستان مەن تۇركيا اراسىنداعى تاۋار اينالىمى 27 پايىزعا ارتىپ, 2 ميلليارد دوللارعا جەتكەنىن مالىمدەدى. «تۇركيا قازاقستاننىڭ ساۋدا اينالىمىنىڭ العاشقى وندىعىنا كىرەتىن ستراتەگيالىق ارىپتەس. ەلدەر اراسىنداعى تاۋار اينالىمى 2017 جىلى 27 پايىزعا ارتىپ, 2 ميلليارد دوللاردى قۇرادى. وسى جىلدىڭ ءبىرىنشى جارتى جىلدىعىندا 820 ميلليون دوللارعا جەتتى», دەدى ن.نازارباەۆ.
سونداي-اق تاۋەلسىزدىك العالى بەرى تۇركيا قازاقستانعا 3 ميلليارد دوللاردان استام تىكەلەي ينۆەستيتسيا سالعانىن ايتىپ, كەرى ينۆەستيتسيانىڭ كولەمى 940 ميلليونعا جەتكەنىن اتاپ ءوتتى.
قازىرگى تاڭدا قازاقستانداعى ءتۇرلى سالالاردى تۇرىك كاپيتالىنىڭ قاتىسۋىمەن ەكى مىڭعا جۋىق كاسىپورىن جۇمىس ىستەيدى. ولار حيميا جانە جەڭىل ونەركاسىپ, ماشينا جاساۋ, قۇرىلىس ماتەريالدارىن ءوندىرۋ, تاۋ-كەن مەتاللۋرگياسى جانە باسقا سالالاردى قامتيدى. ءىرى سەرىكتەستەر قاتارىندا «انادولى حيلدروۋ», «ۇلكەر», «ابدي» سەكىلدى كومپانيالار بار. سونداي-اق قازاقستاندا 1993 جىلدان بەرى تۇركيالىق «زيارات» بانكى قىزمەت ەتىپ كەلەدى.
«2012 جىلدان بەرى ەكى ەلدىڭ كاسىپكەرلەرىن جان-جاقتى ىنتالاندىرۋعا جانە قولداۋعا باعىتتالعان جاڭا سينەرگيا باعدارلاماسى جۇزەگە اسىرىلىپ كەلەدى. بۇل باعدارلاما ر.ەردوعان مىرزانىڭ قازاقستانعا ساپارى كەزىندە باستالعان بولاتىن. ونىڭ شەڭبەرىندە سوماسى 800 ميلليون دوللار بولاتىن 23 جوبا ىسكە قوسىلىپ, 3000 جۇمىس ورنى قۇرىلدى», دەدى پرەزيدەنت.
بۇدان بولەك, ەلباسى كەشە وتكەن بيزنەس وكىلدەرىنىڭ كەزدەسۋىنە توقتالىپ, ەكى ەل اراسىنداعى ەكونوميكالىق بايلانىستىڭ جاڭا قارقىن العانىن مالىمدەدى.
«ەلدەرىمىزدىڭ بيزنەس وكىلدەرى اراسىندا سوماسى 1,7 ميلليارد دوللاردان استام 24 قۇجاتقا قول قويىلدى. بۇل سەنىمدىلىك پەن ىنتىماقتاستىقتىڭ جارقىن ۇلگىسى. ەكونوميكالىق قاتىناستاردى ودان ءارى دامىتۋعا قازاقستان جاعى ءار ۋاقىتتا مۇددەلى», دەدى ن.نازارباەۆ.
كەزدەسۋگە تۇركيا ەكونوميكاسىنىڭ 15 پايىزىن قۇرايتىن ەلدەگى ەڭ ءىرى 25 كومپانيانىڭ باسشىلارى قاتىستى. ولار اۋىلشارۋاشىلىق جانە ازىق-ت ۇلىك ونەركاسىبى, گەولوگيا, تاۋ-كەن مەتاللۋرگياسى, حيميا ونەركاسىبى, ماشينا جاساۋ, توقىما جانە جەڭىل ونەركاسىپ, مەمدەكەتتىك-جەكە مەنشىك سەرىكتەستىگى, دەنساۋلىق ساقتاۋ, فارماتسەۆتيكا سەكىلدى ەكونوميكانىڭ باستى سالالارىندا جۇمىس ىستەيدى.
اباي اسانكەلدى ۇلى,
«ەگەمەن قازاقستان»
سۋرەتتەردى تۇسىرگەن باۋىرجان جۋاسباەۆ
انكارادان