ەلىمىزدە بولاشاق چەمپيونداردى بالا جاستان تاربيەلەۋ نىقتاپ قولعا الىنا باستادى. اسىرەسە ۆەلوسپورتتان وليمپيادالىق دايارلاۋ ورتالىعى ءداستۇرلى تۇردە بۇلدىرشىندەر اراسىنداعى جارىس وتكىزىپ تۇرادى.
وسى 15 قىركۇيەكتە «سارىارقا» ۆەلوترەگىندە 5-6 جاستاعى بالالار اراسىندا جارىس ۇيىمداستىرىلادى. وعان جۇزدەن اسا قاتىسۋشى كەلەدى دەپ كۇتىلەدى. جالپى «وليمپيادالىق ءۇمىت» اتتى جوبا كاسىپقوي سپورتقا بالالاردى باۋلۋعا باعىتتالعان. بۇل تاجىريبە شەتەلدەردە كەڭىنەن قولدانىلادى. ال ەلىمىزدە 2016 جىلدان بەرى وسى ورتالىق ماماندارىنىڭ باستاماسىمەن قولعا الىندى. گۇلدانا قاناپيانوۆا, وليمپيادالىق دايارلاۋ ورتالىعىنىڭ ءباسپاسوز قىزمەتكەرى: - اتالمىش شارا وليمپيادالىق دايارلاۋ ورتالىعىمەن بىرىگىپ دەمەۋشىلەردىڭ قولداۋىمەن ۇيىمداستىرىلاتىن بولادى. سونداي-اق «وليمپيادالىق ءۇمىت» جارىسىنا بارلىق بالالار قاتىسا الادى.