بۇگىنگى تاڭدا وتاندىق جۋرناليستيكانى دامىتۋ كۇن تارتىبىندەگى ماسەلەگە اينالىپ وتىر. زامان تالابىنا ساي جەدەل ءارى ساپالى اقپارات تاراتۋ, قوعامداعى ماسەلەلەرگە تالداۋ جاساۋ سياقتى دۇنيەلەر ءجۋرناليستىڭ بىلىكتىلىگىنە بايلانىستى. بۇل ماسەلە توڭىرەگىندە جاستارعا كوبىرەك تاجىريبە الماسۋ ماڭىزدى.
وسى ورايدا قازاقستان رەسپۋبليكاسىنىڭ تۇڭعىش پرەزيدەنتى – ەلباسى قورى قازاقستان جاستارىنىڭ كونگرەسىمەن بىرگە «Jas Qalam» جاستار جۋرناليستيكاسىن دامىتۋ جوباسىن جۇزەگە اسىرۋدى باستاعان بولاتىن. بۇل رەتتە ەلىمىزدىڭ جۋرناليستيكا سالاسىندا جەتىستىككە جەتكەن جۋرناليستەر قاۋىمى جەرگىلىكتى جەرلەردە شەبەرلىك ساباقتارىن وتكىزىپ, وتاندىق ءباسپاسوز سالاسىنىڭ بۇگىنگى دەڭگەيىن سارالايتىن بولادى.
م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ تاۋەلسىزدىك زالىندا «Jas Qalam» جوباسىنىڭ تۇڭعىش فورۋمى ءوتتى. فورۋم جۇمىسىنا وڭىردەگى بارشا جاس جۋرناليستەرمەن قاتار, اتالعان ۋنيۆەرسيتەتتىڭ جۋرناليستيكا فاكۋلتەتىنىڭ ستۋدەنتتەرى قاتىستى. جيىندى قازاقستان جاستارى كونگرەسىنىڭ توراعاسى توقتار بولىسوۆ اشتى. اۋەلى جامبىل وبلىستىق جاستار ساياساتى ماسەلەلەرى باسقارماسىنىڭ باسشىسى ءمادي ماتەن ءسوز الىپ, وتاندىق جۋرناليستيكانىڭ ءمانى مەن ماڭىزىنا توقتالدى. «البەتتە, بىلىكتى جۋرناليست مامانداردىڭ ارتۋىنا تاجىريبەلى جوعارى بۋىن وكىلدەرى ىقپال جاساۋى قاجەت. وتاندىق بۇقارالىق اقپارات قۇرالدارىنىڭ تانىمال جۋرناليستەرىنىڭ كوپ جىلدىق تاجىريبەلەرىن ءبولىسۋى سالاعا قىزىعۋشىلىعى بار جامبىلدىق جاستاردىڭ العا قاراي دامۋىنا وڭ اسەر ەتەتىنى ءسوزسىز. ء«جۋرناليستىڭ ارقالاعانى التىن, جەگەنى جانتاق» دەپ شەرحان مۇرتازا ايتپاقشى, جۋرناليستيكا – اۋىر ەڭبەكتى, تىنىمسىز ىزدەنىستى, ۇشقىر شەبەرلىكتى جانە تەرەڭ ءبىلىمدى تالاپ ەتەتىن ماماندىق. سوڭعى كەزدەرى ەلىمىزدە عانا ەمەس, دۇنيە جۇزىندە اقپاراتتىق سالانىڭ ءرولى ارتىپ كەلەدى. مەملەكەت تاۋەلسىزدىگىن باياندى ەتۋ, ازاماتتىق, قۇقىقتىق, ىزگىلىكتى قوعامنىڭ قالىپتاسۋىنا ەلىمىزدىڭ ءباسپاسوزى وراسان ۇلەس قوسىپ وتىرعانىن ەلباسىمىز ۇنەمى اتاپ ايتىپ, باعاسىن بەرۋمەن بىرگە, جۋرناليستەرمەن بىرلەسىپ قىزمەت ەتۋدىڭ ۇلگىسىن كورسەتىپ كەلەدى», دەدى ول ءوز سوزىندە.
بۇدان كەيىن رەسپۋبليكالىق «جاس قازاق» گازەتىنىڭ باس رەداكتورى سرايىل سمايىل ءداستۇرلى جۋرناليستيكا توڭىرەگىندە اڭگىمە ءوربىتتى. «بۇگىندە ءداستۇرلى جۋرناليستيكا ساقتالىپ قالا ما, الدە ونىڭ ورنىن الەۋمەتتىك جەلىدەگى ءتۇرلى اقپاراتتار باسىپ كەتە مە دەگەن ساۋال ەلىمىزدى عانا ەمەس, الەمدى تولعاندىرۋدا. ماسەلەن ەلىمىزدە بولىپ جاتقان ءتۇرلى جيىنداردا ءداستۇرلى جۋرناليستيكا قانداي باعىتتا دامۋى كەرەك دەگەن وي ايتىلىپ جاتادى. دەگەنمەن, بۇدان بىلاي دا ءداستۇرلى جۋرناليستيكا ساقتالىپ قالا بەرەدى دەگەن ويدامىن. سونىمەن قاتار جۋرناليستيكادا ماماندانۋ دەگەن بار. ياعني كاسىپتى جاقسى كورۋ ارقىلى ءوزى بىلەتىن سالا بويىنشا ەڭبەك ەتۋ. قازىر كوپ جاستار قاي تاقىرىپقا جازاتىنىن بىلمەي قينالادى. تەوريا بويىنشا ءبىلىم الىپ كەلگەن جاستارعا ماماندانۋ قيىن», دەدى ول.
سونىمەن قاتار جيىن بارىسىندا «قازاقستان» ۇلتتىق تەلەارناسىنداعى «ماسەلە» باعدارلاماسىنىڭ اۆتورى نارتاي ارالباي ۇلى تەلەجۋرناليستيكا بويىنشا تابىستى باعدارلاما ءتۇسىرۋدىڭ ماڭىزدىلىعى جونىندە ايتسا, اتالعان باعدارلامانىڭ رەجيسسەرى جاندوس قالتاەۆ ءوزىنىڭ رەجيسسەرلىك شەبەرلىگىمەن ءبولىستى. بۇدان كەيىن جينالعان جاستار ەكى توپقا ءبولىنىپ تانىمال جۋرناليستەردىڭ شەبەرلىك سىنىپتارىنا قاتىستى. مۇندا دا وتاندىق جۋرناليستيكانى دامىتۋ ماسەلەلەرى ءسوز بولدى. جيىن بارىسىندا بولاشاق جۋرناليستەر ءىس جۇزىندە دە تاجىريبە الماستى.
ايتا كەتەيىك, 11 قىركۇيەك كۇنى تاراز قالاسىنان باستاۋ العان جوبا 16 قىركۇيەك كۇنى الماتى قالاسىندا, 25 قىركۇيەكتە سەمەي قالاسىندا جانە 5 قازان كۇنى استانا قالاسىندا وتەتىن بولادى.
حاميت ەسامان,
«ەگەمەن قازاقستان»
جامبىل وبلىسى