قىزىلوردا وبلىسى كاسىپكەرلىك سالاسىن دامىتۋدا رەسپۋبليكادا كوش باستاپ كەلەدى. بۇل ءسوزدى وبلىستىق كاسىپكەرلەر پالاتاسىنىڭ ديرەكتورى عالىمبەك جاقسىلىقوۆ ايتتى.
– جىل باسىندا دەپۋتاتتار, قوعامدىق كەڭەس مۇشەلەرى جانە وڭىرلىك بيزنەس-قاۋىمداستىق وكىلدەرىنىڭ باستاماسىمەن وبلىستا «جاپپاي كاسىپكەرلىكتى دامىتۋ» جىلى جاريالاندى, – دەدى ول. – جاقىندا قولىما وڭىرلەردەگى كاسىپكەرلىك سالاسىنىڭ دامۋ بارىسى تۋرالى ستاتيستيكا ءتۇستى. جەتى ايدىڭ قورىتىندىسى بويىنشا قىزىلوردا وبلىسى رەسپۋبليكا كولەمىندە ءبىرىنشى ورىندا كەلەدى ەكەن. جۇمىس ىستەيتىن شاعىن جانە ورتا كاسىپكەرلىك سۋبەكتىلەرىنىڭ سانى وبلىسىمىزدا 10,8 پروتسەنتكە ارتقان. ياعني رەسپۋبليكالىق ورتاشا دەڭگەيدەن 2,4 ەسەگە ارتىق. وتكەن جىلى عانا وبلىسىمىز 16 ءوڭىردىڭ ىشىندە 10-شى ورىنعا تۇراقتاعان. دەگەنمەن, جەتىستىككە توقمەيىلسۋگە بولمايدى. الدا اتقارار جۇمىس جەتكىلىكتى. «جاپپاي كاسىپكەرلىكتى دامىتۋ» باستاماسىنىڭ ءۇش جىلعا ۇزارتىلعاندىعىن ەسكەرسەك, وبلىستا جۇمىسسىز ازاماتتاردىڭ قاتارى ازايىپ, كاسىپپەن اينالىسۋشىلار ەسەلەنەدى دەگەن سەنىمدەمىن.
جۇمىس جۇيەلى قويىلعان جەردە تابىس بولادى. وبلىس باسشىسى قىرىمبەك كوشەرباەۆتىڭ باستاماسىمەن جىل باسىندا ءوزىن-ءوزى جۇمىسپەن قامتىعاندارمەن قاتار مۇلدە جۇمىسسىز ادامداردىڭ ەسەبى الىنعان. از ەمەس, 100 مىڭعا جۋىق ازامات ەكى قولعا كۇرەك تاپپاي, قولىنا ىلىنگەنىن كاسىپ قىلىپ كۇن كورىپ ءجۇر. وسىنشا ازاماتتىڭ ەرتەڭىن ويلاعان وبلىس باسشىلىعى كەشەندى جوسپار جاساپ, كاسىپكەرلىكتى ورىستەتۋگە شەشىم قابىلدادى. ناتيجەسىز ەمەس. وسى ماقساتقا 32 ملرد تەڭگە قاراستىرىلعان ەدى. قىزىلوردا وڭىرلىك ينۆەستيتسيالىق ورتالىعىنىڭ ءوزى عانا 280 جوبانى قارجىلاندىرادى.
اۋىلداعى اعايىننىڭ كاسىپ اشۋىنا جاعداي جاسالىپ, جەڭىلدەتىلگەن نەسيەنىڭ باسىم بولىگى اۋىل ازاماتتارىنا بەرىلۋدە. ماسەلەن, بيىل «ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ» باعدارلاماسى اياسىندا 1,8 ملرد تەڭگە اۋىلدى ەلدى مەكەن جوبالارىن قارجىلاندىرۋعا بولىنسە, 89,5 ملن تەڭگە قالالىق جاڭا كاسىپكەرلەردىڭ جوباسىنا بولىنگەن.
نەمىس حالقىندا «قارنى اشقانعا بالىق بەرمە, قارماق بەر» دەگەن قاناتتى ءسوز بار ەكەن. ءبىر رەتتىك كومەك ەشقانداي از قامتىلعان وتباسىنىڭ قابىرعاسىن جاپپايدى. ال جەڭىلدەتىلگەن نەسيە مەن كاسىپكەرلىككە وقىتۋ ءىسى وسىلايشا جەمىسىن بەرۋدە.
باقتيار تايجان,
«ەگەمەن قازاقستان»
قىزىلوردا وبلىسى