بۇگىن مادەنيەت جانە سپورت مينيسترلىگى, ۇلتتىق جانە ات سپورتى ورتالىعىنىڭ ۇيىمداستىرۋىمەن ۇلتتىق سپورت تۇرلەرىنەن رەسپۋبليكالىق دەڭگەيدەگى ماڭىزدى شارا – « ۇلى دالا رۋحى» فەستيۆالى باستالادى. اتالمىش فەستيۆالعا ىرىكتەۋ شارالارى شىلدە-تامىز ايلارىندا ەلىمىزدىڭ ءتورت ايماعىندا ءوتىپ, وعان 700-دەن استام ادام قاتىسقان بولاتىن.
اتاپ ايتار بولساق, 13-15 شىلدە ارالىعىندا شىمكەنت قالاسىندا فەستيۆالدىڭ وڭتۇستىك ايماقتىق ىرىكتەۋ جارىسى وتكىزىلىپ, وعان تۇركىستان, جامبىل, قىزىلوردا جانە الماتى قالاسىنىڭ سپورتشىلارى قاتىسقان ەدى. وسى ورايدا قازاق كۇرەسى, توعىزقۇمالاق, جامبى اتۋ سياقتى سپورت تۇرلەرىنەن تۇركىستاندىقتار ۇزدىك شىقسا, اسىق اتۋ, كوكپار جانە تەڭگە ىلۋدەن جامبىلدىقتار توپ جاردى.
ال باتىس ولكەنىڭ ۇزدىكتەرىن انىقتاۋ جارىسى 27-29 شىلدە ارالىعىندا اقتوبە قالاسىندا جالاۋىن كوتەرگەن ەدى. ايماق جەڭىمپازدارى اقتوبە, باتىس قازاقستان, ماڭعىستاۋ, اتىراۋ وبلىستارىنىڭ سپورتشىلارى اراسىندا انىقتالدى. قازاق كۇرەسى جانە توعىزقۇمالاقتان اتىراۋلىقتار, اسىق اتۋ مەن جامبى اتۋدان اقتوبەلىكتەر, تەڭگە ءىلۋ, اۋدارىسپاقتان باتىسقازاقستاندىقتار, كوكپاردان ماڭعىستاۋلىق سپورتشىلار ۇزدىك شىقتى.
شىعىس ايماقتىڭ ىرىكتەۋ باسەكەلەرىنە شىعىس قازاقستان, پاۆلودار, قاراعاندى, الماتى وبلىستارىنىڭ سپورتشىلارى باقتارىن سىنادى. جارىس 13-15 تامىز كۇندەرى پاۆلودار قالاسىندا ءوتتى. جامبى اتۋ, قازاق كۇرەسى, اۋدارىسپاق, اسىق اتۋدان شىعىس قازاقستان, تەڭگە ىلۋدەن قاراعاندى, توعىزقۇمالاقتان پاۆلودار, كوكپاردان الماتى وبلىستارى جەڭىسكە جەتتى.
فەستيۆالدىڭ ىرىكتەۋ جارىستارىن 29-31 تامىز كۇندەرى سولتۇستىك ايماق قورىتىندىلادى. جارىس استانا قالاسىندا ۇيىمداستىرىلدى. بۇل توپقا استانا قالاسى, سولتۇستىك قازاقستان, قوستاناي, اقمولا وبلىستارىنىڭ سپورتشىلارى قامتىلدى. قازاق كۇرەسى, اسىق اتۋ, توعىزقۇمالاقتان استانا قالاسى, كوكپار, تەڭگە ءىلۋ, جامبى اتۋ, اۋدارىسپاقتان اقمولا وبلىسىنىڭ سپورتشىلارى جەڭىمپاز رەتىندە تانىلدى.
جوعارىداعى ءتورت ايماقتان ىرىكتەلىنىپ الىنعان جەڭىمپازدار 12-16 قىركۇيەك كۇندەرى استانا قالاسىندا شەشۋشى كەزەڭنىڭ كورىگىن قىزدىرماقشى. ۇلتتىق سپورتتىڭ كوكپار, بايگە, تەڭگە ءىلۋ, اۋدارىسپاق, جامبى اتۋ, قازاق كۇرەسى, توعىزقۇمالاق, اسىق اتۋ تۇرلەرىنەن جارىستار كوماندالىق تارتىپتە جۇرگىزىلمەك.
جارىستىڭ باعدارلاماسىنا توقتالار بولساق بۇگىن, ياعني 12 قىركۇيەك كۇنگى اسىق اتۋ, توعىزقۇمالاق, قازاق كۇرەسىنەن وتەتىن سايىستار ەلوردا تورىندەگى «داۋلەت» سپورت كەشەنىندە ۇيىمداستىرىلسا, قالعان كۇندەر ۇلەسىنە تيەسىلى تەڭگە ءىلۋ, جامبى اتۋ, اۋدارىسپاق, كوكپار جانە بايگە تۇرلەرى بويىنشا جارىستار 13-16 قىركۇيەك ارالىعىندا «قازانات» اتشابارىندا وتەدى دەپ كۇتىلۋدە.
بەكەن قايرات ۇلى,
«ەگەمەن قازاقستان»