ستاتيستيكاعا سۇيەنسەك, قازاقستاندا سوڭعى ءۇش جىل ىشىندە 8 مىڭنان اسا نازىكجاندى زورلىق-زومبىلىقتىڭ قۇربانى بولىپتى. سوڭعى ۋاقىتتا بۇقارالىق اقپارات قۇرالدارىندا ايەلدەرگە قاتىستى جاسالعان ءتۇرلى قىلمىستاردى جاريالاۋ جيىلەپ كەتتى. نازىك جاندىلاردى وزدەرىن قورعاۋعا ۇيرەتۋدى كوزدەگەن Capital Project LTD كومپانياسى تاياۋدا ازاماتشالارعا ارناپ قورعانۋ جۇيەلەرىن ۇيرەتەتىن تەگىن كۋرستار اشتى.
استانا قالاسىندا العاشقى ساباقتارى باستالىپ كەتكەن كۋرس ءالى ءبىر ايعا سوزىلماق. وسى ۋاقىت ىشىندە نازىكجاندىلار ءوزىن-ءوزى قورعاۋدىڭ نەگىزدەرىمەن تانىسادى. جاتتىعۋشىلارعا ءوزىن-ءوزى قورعاۋ مەن قول كۇرەستەرىنە ارناپ جەكە مەكتەپ اشقان ناعىز كاسىبي مامان, تاجىريبەلى شەبەرلەردى دە كوپ جىلدان بەرى وقىتىپ كەلە جاتقان جوعارى ساناتتى باپكەر سەرىك رىسباي تالىمگەر بولادى.
سەرىكتىڭ ايتۋىنا قاراعاندا, جوبا اياسىندا وزىندىك ەكسپرەسس-كۋرستى قۇرۋ باستى مىندەت سانالدى. شابۋىلدى قىزدار تەك قىلمىستىق حرونيكالاردان عانا بىلەدى دەگەن سەرىك رىسباي ساباقتى ەڭ الدىمەن تەوريادان باستاۋدى ءجون كورىپتى. سودان كەيىن عانا تاجىريبەگە كوشۋدى ۇيعارعان.
– شابۋىل دەگەنىمىز –تۇتقيىلدان بولاتىن جاعداي. اففەكت, ياعني دولدانعان, اشۋ قىسقان ساتتەگى ادامنىڭ جاي-كۇيىنە توقتالا كەتسەك, ول ەسىنەن اداسىپ, قىزبالىقپەن نە ىستەپ, نە قويعانىن بىلمەي قالادى. بىراق ءسىز قورعانۋدىڭ ادىستەرىن بىلەتىن بولساڭىز, قاۋىپ تونگەن كەزدە شابۋىلداۋشىعا زالدا ۇيرەنگەن تاسىلدەرىڭىزبەن قارىمتا سوققى بەرە الاسىز, – دەيدى باپكەر.
ول كۋرسقا كوبىنە زورلىق-زومبىلىقتى باستان كەشكەن ايەلدەر قاتتى قىزىعۋشىلىق تانىتاتىنىن اتاپ ءوتتى. مىسالى, كەلگەن ء بىر كەلىنشەكتى كۇيەۋى ءاردايىم ۇرىپ سوعا بەرگەندىكتەن, جارىنان كەتىپ قالعان كورىنەدى. الايدا ءاردايىم قورقىنىشپەن ء ومىر سۇرۋدەن جالىققان ول وسىندا قايىرىلىپتى.
باپكەر ءوزىن-ءوزى قورعاۋ كۋرستارى بۇگىنگى تاڭدا قىزىعاتىن ءىس قانا ەمەس, سونىمەن قاتار ومىرلىك قاجەتتىلىك ەكەندىگىنە سەندىرەدى. سوندىقتان ول قورعانۋ تاسىلدەرىن مەڭگەرۋ ايەلگە ەرسى كورىنەدى دەۋ قاتە پىكىر ەكەندىگىن العا تارتادى.
اتا-انالار قىزدارىن تەك بي, فيتنەس, گيمناستيكاعا باۋلۋمەن قوسا, ءوز-ءوزىن قورعاۋعا دا ۇيرەتكەندەرى ابزال. باسقا-باسقا, قيىن ساتتە ءومىردى وسىنداي ونەر ساقتاپ قالا الادى, – دەيدى مامان.
تەگىن كۋرستاردىڭ تىڭداۋشىلارى «كۋروچكا ريابا» برەندىنىڭ الەۋمەتتىك جەلىلەرى ارقىلى ىرىكتەلىپ, 50-دەن اسا ء وتىنىش كەلىپ تۇسكەن. ءتۇرلى جاعدايلارعا بايلانىستى كەيبىرەۋلەرى باس تارتىپ, سوڭىندا 15 ادامنان تۇراتىن ءبىرىنشى توپ جاساقتالدى. ەڭ جاسى –20, ەڭ ۇلكەنى – 48 جاستا.
ساباققا قاتىساردا ءار قىزدىڭ وزىندىك سەبەبى بولىپتى. ماسەلەن, 31 جاسار يلميرا ءبىر سەرىكتەستىكتىڭ قىزمەتكەرى: «كەز كەلگەن ساتتە قيىندىققا تاپ بولۋىمىز مۇمكىن, ول قانداي دا ءبىر عيماراتتا دەمالىپ جاتىپ-اق نەمەسە بي كلۋبىندا بولىپ قالۋى دا عاجاپ ەمەس», – دەيدى. يلميراعا كوپتەگەن قىزىقتى ادىستەردى ۇيرەنۋ ۇناعان. قاتىسۋشىلار اسىرەسە اياققا شاپ بەرۋ, تىزەدەن تەبۋ, قولىن كوكىرەك تۇستا ۇستاپ قالۋ سياقتى تاسىلدەرگە باسا نازار اۋدارعان.
34 جاستاعى ناعيما ەسىمدى مەملەكەتتىك قىزمەتكەر جاۋىنگەرلىك ونەرگە قىزىققانىمەن, ەش ۋاقىتتا ونىمەن اينالىسپاعان. وسىنداي مۇمكىندىك تۋعانىنا ءدان ريزا. ول ءوزىنىڭ كۋرسقا جازىلۋىنا ەڭ الدىمەن تەگىن بولعاندىعى اسەر ەتكەنىن دە جاسىرمادى. ناعيمانىڭ تابىسىنىڭ نەگىزگى بولىگى يپوتەكا, پاتەراقى, ءىشىم-جەم, كيىم-كەشەك سياقتى قاجەتتىلىكتەرگە جۇمسالاتىندىقتان, باسقالار ءتارىزدى سپورتقا, وكىنىشكە قاراي, ءار كەز اقشاسى جەتە بەرمەيدى. ناعيما جاتتىعۋلار بارىسىندا قىز-كەلىنشەكتەر قارسىلاسى ەر كىسى بولسا دا السىزدىك تانىتپاۋى تيىستىگىن تۇسىنگەن.
30 جاستاعى بۋحگالتەر انار ءۇشىن ساباقتار وزىنە دەگەن سەنىمىن ارتتىرىپ, ناتيجەسى جاقسارا تۇسكەن. ال ونىڭ كۇيەۋىندە قورقىنىش سەزىمى پايدا بولا ءتۇستى مە, اناردىڭ جەتىستىكتەرىنە ونشا قۋانا قويماپتى.
ءامينا, 25 جاستا, زاڭگەر, ءومىر باقي ەسىندە قالعان ءبىر جايتپەن ءبولىستى. ستۋدەنت شاعىندا ساباقتان كەلە جاتىپ جىگىت پەن قىزدىڭ ۇرىسىنا كۋا بولىپ قالىپتى. ءىس ناسىرعا شاپقاندا ماڭايىندا تۇرعان ەر ادامدار كومەكتەسپەگەن ەكەن. ونداي جاعدايدا ساعان بىرەۋ كومەكتەسە مە, جوق پا بىلمەيسىڭ, ارقاشاندا ءوز-ءوزىڭدى قورعاي ءبىلۋدىڭ ماڭىزدى ەكەنىنە كوزى جەتكەن.
جاتتىعۋلاردان 26 جاستاعى ايسۇلۋ ەسىمدى اعىلشىن ءتىلى ءپانىنىڭ مۇعالىمى دە كەرەمەت اسەر العان. كۋرستار وعان سەنىمدىلىك بەرە وتىرىپ, ەرەكشە كوڭىل-كۇي سىيلاعاندىعىن ايتادى. جۇمىستان قايتقاندا دا كۇش-جىگەرلى بولىپ قايتاتىنىن دا جاسىرمادى.
«كۋروچكا ريابا» قۇس فابريكاسىنىڭ باسشىسى ماكسيم بوجكو حالىقتى قورعاۋعا ارنالعان مۇنداي جوبالاردىڭ ماڭىزى زور, ال بۇل تۇرعىدا قازاقستاندىق كاسىپكەرلەر دە شەت قالماۋ كەرەك دەپ ەسەپتەيدى. ءوزىن-ءوزى قورعاۋدىڭ تەگىن كۋرستارى – تولىعىمەن كوممەرتسيالىق ەمەس جوبا جانە كومپانيا الداعى ۋاقىتتا ونىڭ گەوگرافياسى مەن اۋقىمىن كەڭەيتە ءتۇسۋدى جوسپارلاپ وتىر.
ءبىزدىڭ باستامانى باسقا دا الەۋمەتتىك باعىتتاعى برەندتەر قولداپ, رەسپۋبليكا كولەمىندە مۇنداي مەكتەپتەردىڭ تۇتاس جەلىسىن قۇرا الامىز دەپ ويلايمىن. ەشكىم الدا نە تۇرعانىن بىلمەيدى, دەگەنمەن قاۋىپ تونگەن ساتتە مەڭگەرگەن ءادىس-تاسىلدەرىمىز تاعدىرىمىزدى شەشۋى عاجاپ ەمەس قوي. قۇداي باسقا سالماسىن, ارينە, بىراق ەرتەڭ كىمدە-كىم ويلاماعان جاعدايعا تاپ بولسا, كۋرستا العان بىلىكتىلىگى بىرەۋدىڭ ءومىرى مەن دەنساۋلىعىن ساقتاپ قالسا – تاماشا ەمەي نەمەنە؟! دەمەك, مۇنىڭ راسىمەن-اق ءمانى زور. ەلىمىزدىڭ نازىكجاندىلارى دا وزدەرىن قورعاي بىلۋگە قۇقىلى, – دەدى ماكسيم بوجكو.