ەلباسى استانا قالاسىنىڭ اكتيۆىمەن كەڭەس وتكىزدى.
كەزدەسۋ الدىندا قالالىق ءماسليحاتتىڭ سەسسياسى ءوتتى. وندا دەپۋتاتتار استانا قالاسىنىڭ جاڭا اكىمى باقىت تۇرلىحان ۇلى سۇلتانوۆتىڭ كانديداتۋراسىن ءبىراۋىزدان ماقۇلدادى.
نۇرسۇلتان نازارباەۆ ءا.يسەكەشەۆتى پرەزيدەنت اكىمشىلىگىنىڭ باسشىسى لاۋازىمىنا تاعايىندالۋىمەن قۇتتىقتاپ, جاڭا جاۋاپتى قىزمەتىنە تابىس تىلەدى.
مەملەكەت باسشىسى نۇرسۇلتان نازارباەۆ ءا.يسەكەشەۆتىڭ كاسىبي بىلىكتىلىگى مەن جەكە قاسيەتتەرىن اتاپ ءوتىپ, ونىڭ ەلوردانى دامىتۋ جولىندا اتقارعان جۇمىسىنىڭ ناتيجەلەرىنە توقتالدى.
قازاقستان پرەزيدەنتى استانا قالاسىنىڭ بۇرىنعى اكىمى ءا.يسەكەشەۆتىڭ سىڭىرگەن ەڭبەگى جونىندە ايتىپ, قالانىڭ جاڭا باسشىلىعىنىڭ الدىندا تۇرعان مىندەتتەردى اتاپ ءوتتى.
– مەن ەلوردا اكىمىن تاعايىنداۋ ماسەلەسىنە زور ءمان بەرەمىن. قالانى دامىتۋ ءىسى, سونىڭ ىشىندە استاناداعى بۇكىل نىسانداردىڭ قۇرىلىسى ۇنەمى مەنىڭ جەكە باقىلاۋىمدا. بۇل – مەن ءۇشىن ماڭىزدى باسىمدىق. باقىت سۇلتانوۆتىڭ مەملەكەتتىك باسقارۋ ىسىندەگى تاجىريبەسى مول ءارى ۇيىمداستىرۋشىلىق قابىلەتى جەتكىلىكتى, – دەدى ەلباسى.
جيىن بارىسىندا قازاقستان پرەزيدەنتى استانانىڭ جاڭا باسشىلىعى الدىندا تۇرعان بىرقاتار باسىمدىعى بار مىندەتتەردى اتاپ ءوتتى.
– دامۋدىڭ جاڭا مودەلىن ەنگىزۋ قاجەت. يننوۆاتسيانى ىلگەرىلەتۋ جانە كرەاتيۆتى ادامداردىڭ كوبەيۋى ءۇشىن قولايلى ورتا قالىپتاستىرعان ءجون. سول ءۇشىن قالانىڭ 2050 جىلعا دەيىنگى ۇزاق مەرزىمدى دامۋ ستراتەگياسىن ازىرلەۋ كەرەك, – دەدى نۇرسۇلتان نازارباەۆ.
ەلباسى «استانا» حالىقارالىق قارجى ورتالىعىنىڭ مۇمكىندىكتەرىن پايدالانا وتىرىپ, استانانى ىسكەرلىك قارجى حابى رەتىندە دامىتۋدى جالعاستىرۋ قاجەت ەكەنىن ايتتى.
مەملەكەت باسشىسى جاڭا تۇرعىن ۇيلەر سالۋ, تۇرعىندار ءۇشىن قولايلى جاعداي جاساۋ, الەۋمەتتىك نىساندار تۇرعىزۋ ماسەلەلەرىنە ەرەكشە نازار اۋداردى.
سونىمەن قاتار, قازاقستان پرەزيدەنتى قالانىڭ ينفراقۇرىلىمىن دامىتۋ قارقىنىن ساقتاۋدىڭ جانە شاھاردى گازبەن قامتۋ ءۇشىن دايىندىق جۇمىستارىن جۇرگىزۋدىڭ ماڭىزدىلىعىن ايتتى.
نۇرسۇلتان نازارباەۆ ەلوردانىڭ تۋريستىك الەۋەتىن دامىتۋ ىسىندە الەمنىڭ ۇزدىك تاجىريبەلەرىن قولدانۋدى تاپسىردى.
ەلباسى قالانىڭ بارلىق مەملەكەتتىك قۇرىلىمدارىنىڭ جۇمىسىن ترانسفورماتسيالاۋدى جالعاستىرۋ, كورسەتىلەتىن مەملەكەتتىك قىزمەت ساپاسىن ارتتىرۋ جانە تسيفرلاندىرۋ باعدارلاماسىن ىسكە اسىرۋ ماسەلەلەرىن استانانى ودان ءارى دامىتۋدىڭ باسىمدىقتارى رەتىندە ەرەكشە اتاپ ءوتتى.
سوڭىندا ءا.يسەكەشەۆ پەن ب.سۇلتانوۆ سەنىم بىلدىرگەنى ءۇشىن نۇرسۇلتان نازارباەۆقا العىس ايتىپ, باس قالامىز بەن بۇكىل ەلىمىزدى دامىتۋ ىسىنە وزدەرىنىڭ زور ۇلەستەرىن قوساتىنىن جەتكىزدى.