قاراجاتتار ۋاقىتىلى يگەرىلۋى ءتيىس - ب. ساعىنتاەۆ

ۇلتتىق ەكونوميكا ءمينيسترى ت. سۇلەيمەنوۆتىڭ, قارجى ءمينيسترى ب. سۇلتانوۆتىڭ باياندامالارىن تىڭداعاننان كەيىن, پرەمەر-مينيستر باقىتجان ساعىنتاەۆ بيۋدجەتتىك قاراجاتتار ەلەۋلى سومادا يگەرىلمەي قالعان مينيسترلىكتەرگە تالاپ قويدى. ماسەلەن, قورعانىس مينيسترلىگىندە رەسپۋبليكالىق بيۋدجەتتەن بولىنگەن, يگەرىلمەگەن قاراجات سوماسى — 15,4 ملرد تەڭگە, مادەنيەت جانە سپورت مينيسترلىگىندە — 11,1 ملرد تەڭگە, اۋىل شارۋاشىلىعى مينيسترلىگىندە — 10,9 ملرد تەڭگە, ىشكى ىستەر مينيسترلىگىندە — 9,5 ملرد تەڭگە, اقپارات جانە كوممۋنيكاتسيالار مينيسترلىگىندە — 5,7 ملرد تەڭگە. 

«بۇل وتە ۇلكەن قاراجات سوماسى, بۇل اقشاعا كوپتەگەن مەكتەپ, اۋرۋحانا, بالاباقشا سالىپ, جولداردى جوندەۋگە بولادى. بۇل قاراجاتتار ۋاقىتىلى يگەرىلۋى ءتيىس», — دەپ پرەمەر-مينيستر, يگەرىلمەگەن قاراجاتتار ۆەدومستۆولاردىڭ تەڭگەرىمىنەن الىنىپ, مەملەكەتتىك جانە سالالىق باعدارلامالاردى ىسكە اسىرۋعا قايتا باعىتتالاتىنىن اتاپ ءوتتى.

ەكونوميكالىق ءوسىم كورسەتكىشتەرىنە قول جەتكىزىلمەگەن وڭىرلەرگە دە جەكەلەي نازار اۋدارىلدى.

قىزىلوردا وبلىسىنىڭ اكىمى ق. كوشەرباەۆ 2018 ج. سەگىز ايىندا رەسپۋبليكالىق بيۋدجەت قاراجاتتارى 90%-عا يگەرىلىپ, يگەرىلمەگەن سوما 2,9 ملرد تگ قۇراعانىن مالىمدەدى.

تۇركىستان وبلىسىنىڭ اكىمى ج. تۇيمەباەۆ 1,9 ملرد تگ سوماسىندا رەسپۋبليكالىق بيۋدجەتتەن بولىنگەن, يگەرىلمەگەن ماقساتتى ترانسفەرتتەر تۋرالى باياندادى.

باتىس قازاقستان وبلىسىنىڭ اكىمى ا. كولگىنوۆتىڭ ايتۋىنشا, جىل باسىنان بەرى ونەركاسىپ بويىنشا تۇراقتى تەرىس ءمان بايقالاتىنىن اتاپ ءوتتى. سونىمەن قاتار, ماۋسىم ايىنان باستاپ ونىڭ تەرىس ءمانى ارتۋدا. رەسپۋبليكالىق بيۋدجەتتەن بولىنگەن ماقساتتى ترانسفەرتتەردىڭ يگەرىلمەۋ سوماسى 1,4 ملرد تگ قۇرادى.

پاۆلودار وبلىسىنىڭ اكىمى ب. باقاۋوۆ وڭىردەگى يگەرىلمەگەن ماقساتتى ترانسفەرتتەر سوماسى 1,3 ملرد تگ قۇراعانىن ايتتى.

سولتۇستىك قازاقستان وبلىسىنىڭ اكىمى ق. اقساقالوۆ 2 ملن تگ استام اينالىمى بار شوب سانى 10 887 بىرلىكتى نەمەسە وبلىستىعى جالپى جۇمىس ىستەپ تۇرعان شوب-ءتىڭ 38% قۇراعانىن, بۇل جالپى رەسپۋبليكالىق ماننەن 9,9%-عا جوعارى ەكەنىن مالىمدەدى. سونىمەن قاتار, رەسپۋبليكالىق بيۋدجەتتەن بولىنگەن ماقساتتى ترانسفەرتتەردىڭ يگەرىلمەۋ سوماسى 1,3 ملرد تگ قۇرايدى.

اكىم ا. مىرزاحمەتوۆ جامبىل وبلىسىنداعى يگەرىلمەگەن سوما 1,1 ملرد تگ قۇراعانىن جەتكىزدى.

اتالعان ماسەلەنى قاراۋ قورىتىندىسىن شىعارا وتىرىپ, پرەمەر-مينيستر باقىتجان ساعىنتاەۆ اكىمدەرگە اعىمداعى جاعدايعا تالداۋ جاساپ, ەكونوميكالىق ءوسىمنىڭ ماقساتتى كورسەتكىشتەرىنىڭ ورىندالماۋىنا جول بەرگەن, باسشىلاردىڭ جاۋاپكەرشىلىگىن قاراۋدى تاپسىردى.

«مەملەكەت باسشىسى كەمىندە 4% ءوسىمدى قامتاماسىز ەتۋ مىندەتىن قويىپ وتىر. الايدا ستاتيستيكالىق دەرەكتەرگە سۇيەنسەك, 8 ايدىڭ قورىتىندىسى بويىنشا ءوسىم 3,8% قۇرادى. تيمۋر مۇرات ۇلى (سۇلەيمەنوۆ) ءوز بايانداماسىندا اتاپ وتكەنىندەي, جىل سوڭىنا دەيىن 4% وسىمگە قول جەتكىزۋ ءۇشىن, بىزگە اي سايىنعى ءوسىمدى ورتا ەسەپپەن 4%-دان جوعارى دەڭگەيدە قامتاماسىز ەتۋ قاجەت. اتقاراتىن جۇمىس كوپ», — دەپ ب. ساعىنتاەۆ, قر پرەمەر-ءمينيسترىنىڭ ءبىرىنشى ورىنباسارى ا. ءماميننىڭ ايتۋىنا سايكەس, جۇمىس تامىز ايىنداعى دەمالىستارعا جانە باسقا دا سەبەپتەرگە بايلانىستى كەشەۋىلدەپ قالعانىن اتاپ ءوتتى. 

ايتا كەتۋ كەرەك, قر ۇلتتىق ەكونوميكا مينيسترلىگىنىڭ دەرەكتەرىنە سايكەس, ەلىمىزدىڭ ەكونوميكالىق ءوسىمىنىڭ تومەندەۋىنە سىرتقى فاكتورلار مەن تۋربۋلەنتتىلىك تە اسەر ەتۋدە.

«ارينە ىشكى جانە سىرتقى قولايسىز فاكتورلار بار, الايدا بۇل تاپسىرمالاردى ورىنداماۋعا سەبەپ ەمەس. بىزدە پرەزيدەنتتىڭ تاپسىرمالارىن ىسكە اسىرىپ, وسى جىلدى تابىستى اياقتاي الاتىنداي بارلىق مۇمكىندىك بار. سوندىقتان دا بۇل ماسەلەگە مۇقيات جاۋاپكەرشىلىكپەن قاراۋدى تاپسىرامىن. اكىمدەرگە جەرگىلىكتى جەرلەردە ءمان-جايدى انىقتاپ, جۇمىسىن تيىسىنشە اتقارماعان باسشىلاردىڭ جاۋاپكەرشىلىگىن قاراۋدى تاپسىرامىن. قابىلدانعان شارالار مەن تارتىپتىك جازالار تۋرالى اقپاراتتى ءبىر اپتا مەرزىم ىشىندە پرەمەر-مينيستر كەڭسەسىنە ۇسىنىڭىزدار», — دەدى پرەمەر-مينيستر.

ۇلتتىق ەكونوميكا مينيسترلىگىنە, مۇددەلى مەملەكەتتىك ورگاندار مەن پرەمەر-مينيستر كەڭسەسىنە قىركۇيەكتىڭ سوڭىنا وڭىرلەردىڭ, بانكتەردىڭ, بيزنەس پەن كۆازيمەملەكەتتىك سەكتوردىڭ قاتىسۋىمەن كەڭەس دايىنداۋدى تاپسىرامىن.  

«نەگىزگى ماسەلە – پرەزيدەنت تاپسىرمالارىننىڭ ورىندالۋ بارىسى, اسىرەسە – سەسسيانىڭ اشىلۋىندا بەرىلگەن تاپسىرمالار, پرەزيدەنتتىڭ بەس الەۋمەتتىك باستاماسى بويىنشا تاپسىرمالار. تيمۋر مۇرات ۇلى, تاپسىرمالاردىڭ ورىندالۋ ساپاسى, پروبلەمالار مەن ولاردى شەشۋ جولدارى بويىنشا ەگجەي-تەگجەيلى تالداۋ قاجەت», — دەپ تۇيىندەدى پرەمەر-مينيستر.