كوشپەندىلەر ويىندارىنىڭ مادەني ءىس-شارالارى ءوتىپ جاتقان قىرشىن جايلاۋىنداعى ەتنوقالاشىقتىڭ «ىستىقكول وبلىسىنىڭ ورداسىندا» قىرعىزدىڭ ۇلتتىق كيىمدەرىن كيىپ, شاشتارىن سالالاپ ءورىپ العان وقۋشى قىزداردى سۋرەتكە تۇسىرگەلى جاندارىنا بارعانىمدا, مەنىڭ قازاق گازەتىنەن ەكەنىمدى بىلگەن سوڭ, ولار جارىسىپ: «بايكە (اعا دەگەندەرى), ءبىز دومبىرا تارتقاندى بىلەمىز!», دەپ جانىما ۇيىرىلە قالىستى.
ءوزىن جازگۇل بۇلالوۆا دەپ تانىستىرعان قارىنداس: ء«بىز, وسى ىستىقكول وبلىسى اقسۋ اۋدانىنىڭ كەرەگەتاش اۋىلىنداعى جۋماعۇل الىشپاەۆ اتىنداعى ورتا مەكتەپتىڭ وقۋشىلارىمىز. مەكتەبىمىزدىڭ 120 ونەرپازىنان قۇرالعان قومىزشىلار ءانسامبلى بار. ولاردىڭ وتىزى دومبىرا تارتۋدى ۇيرەنگەن», دەپ ماقتانا سويلەدى. سودان اڭگىمەگە ادەلينا شارشەمباەۆا دەگەن وقۋشى ارالاسىپ: ء«بىز «اداي», «بالبىراۋىن» جانە «كەلىنشەك» كۇيلەرىن شەرتەمىز, «ەركەم-اي» جانە باسقا اندەردى دومبىراعا قوسىلىپ ايتامىز. بىزگە دومبىرا تارتۋدى مۋزىكادان ساباق بەرەتىن ايگانىش مامىراليەۆا اپايىمىز ۇيرەتتى», دەدى ول جىميىپ.
باۋىرلاس حالىقتىڭ بالاۋسا تالانتتارىنىڭ ىزگى نيەتىنە ءبىز دە ءىلتيپاتىمىزدى بىلدىردىك.
نازاربەك بايجىگىتوۆ,
ارنايى «ەگەمەن قازاقستان» ءۇشىن
قىرعىز رەسپۋبليكاسى,
شولپان-اتا قالاسى