الەمدىك رەيتينگ جاڭارتىلدى

الەمنىڭ ەڭ ۇزدىك ويىنشىلارى كوشىن قىتايدىڭ قوس ساڭلاعى – فان چجەندۋن مەن سيۋي سين باستادى. بۇگىنگى تاڭدا بۇل سپورتشىلاردىڭ داڭقى دۇركىرەپ تۇر. اتاپ ايتساق, 21 جاستاعى فان چجەندۋن – الەمنىڭ ءتورت دۇركىن چەمپيونى جانە سول جارىستىڭ ءۇش مارتە جۇلدەگەرى. الەم كۋبوگىن ءۇش مارتە ولجالاپ, 2014 جىلى ينچحوندا وتكەن ازيا ويىندارىندا ءبىر التىن مەن قوس كۇمىس مەدالدى يەمدەندى. 28 جاستاعى سيۋي سين بولسا, ريو وليمپياداسىنىڭ كوماندالىق سايىسىنىڭ جەڭىمپازى, الەم چەمپيوناتىندا توعىز رەت توپ جارىپ, ءۇش رەت جۇلدەگەرلەر قاتارىنا قوسىلدى. الەم كۋبوگىندا جەتى مارتە تەڭدەسسىز دەپ تانىلىپ, ازيا ويىندارىندا باس جۇلدەنىڭ ەكەۋىن ءوز قانجىعاسىنا بايلادى. 

ءۇشىنشى ورىنعا تابان تىرەگەن گەرمانيالىق تيمو بوللدا وتە مىقتى ويىنشى رەتىندە ءوزىن الدەقاشان مويىنداتقان. 37 جاستاعى ارداگەر تەننيسشى سوڭعى ءۇش وليمپيا ويىندارىنىڭ كوماندالىق سايىسىندا جۇلدە الدى. سوڭعى 16 جىلدا ۇيىمداستىرىلعان الەم چەمپيو­ناتتارىنا ۇزدىكسىز قاتىسىپ جۇرگەن ول ايتۋلى جارىستى التى كۇمىس جانە ەكى قولامەن قورىتىندىلادى. الەم كۋبوگىندا ەكى رەت التىن تۇعىرعا كوتەرىلىپ, ەۋروپا بىرىنشىلىگىندە 17 مارتە دارا شىقتى. 

سونىمەن قاتار ۇزدىك ون ويىنشىنىڭ ساناتىنا قىتايلىق لين گاويۋان, گەرمانيالىق دميتري وۆچاروۆ, جاپونيالىق توماكادزۋ حاريموتو, قىتايلىق ما لۋن, كورەيالىق لي سان سۋ, برازيليالىق حيۋگو كالدەرانو جانە گونكونگتىق ۆون چۋن تين سىندى ساڭلاقتار ەنىپ وتىر. ەسىمدەرى اتالعان وسى جىگىتتەردىڭ بارلىعى دا اسا ءىرى حالىقارالىق دودالاردا جۇلدە الىپ جۇرگەن ساقا سپورتشىلار. 

جالپى, ەرلەر اراسىنداعى ەڭ وزىق 50 تەننيسشى قاتارىندا جاپونيانىڭ – 9, گەرمانيانىڭ – 7, قىتايدىڭ – 6, وڭتۇستىك كورەيانىڭ – 5, تايپەيدىڭ – 4, فرانتسيا, پورتۋگاليا, شۆەتسيا, ءۇندىستاننىڭ – 2, گونكونگ, نيگەريا, دانيا, ەگيپەت, ۋكراينا, قازاقستان, حورۆاتيا, يسپانيا, انگليا, برازيليا جانە اۋستريانىڭ 1 وكىلى بار. 

عالىم سۇلەيمەن,

«ەگەمەن قازاقستان»