– قازىر ارمەنيادا بيلىكتىڭ ادەبيەتكە دەگەن كوزقاراسى قالاي؟
– بيلىك ادەبيەتكە سونشالىقتى كوپ نازار اۋدارمايدى. كىتاپتىڭ باسىلۋىنا اقشا بولىنبەيدى, قالاماقى مۇلدە جوق. كىتاپ تارالىمى – 500 دانا. ونىڭ كوپ بولىگىن سىيلاۋعا تۋرا كەلەدى. جاقىندا باقىتجان قاناپيانوۆتىڭ كىتابىن اۋدارىپ, باسىپ شىعاردىم. حالىق ادەبيەتتەن الىستاپ كەتتى. بىراق ادەبيەتپەن اينالىساتىن ورتا ءسوز ونەرىنە ماحابباتىن جوعالتقان جوق.
– كىتاپ دۇكەندەرىندەگى احۋال قالاي؟
– ءبىزدىڭ مەملەكەتتە حالىقتىڭ باسىم بولىگى – ارمياندار. سوعان سايكەس كىتاپتاردىڭ كوبى ارميان تىلىندە. الەم ادەبيەتى, ارينە, بارلىق ەلدەردەگى سياقتى دۇكەنگە جۇيەلى تۇردە تۇسەدى. ءبىزدىڭ حالىق كوپ ءتىلدى بىلۋگە قۇشتار. بالكىم, بۇل ءبىزدىڭ الەمدە شاشىلىپ جاتقانىمىزبەن بايلانىستى شىعار. تالانتتى جاستارىمىز بار. ادەبيەتىمىز كوپ جانرلى. قازىر ساعان ولاردىڭ اتىن ايتسام, ول ساعان ەشتەڭە بەرمەيدى.
– سول تالانتتى جاستارعا ارنالعان قانداي سىيلىق بار؟
– جاستارعا ارنالعان مەملەكەتتىك جاستار سىيلىعى جانە پرەزيدەنت سىيلىعى بار. جىل سايىن ءبىر ادەبيەتشىگە بەرىلەدى. ودان بولەك, جازۋشىلار وداعىندا جاستارعا ارنالعان سىيلىق كوپ. جانىندا اقشالاي دا سىيلارى بار. مەملەكەتتىك جاستار سىيلىعىنىڭ جۇلدەسى – 10 مىڭ دوللار, ال پرەزيدەنت سىيلىعى – 5 مىڭ دوللار. بۇل جاس ادەبيەتشىلەر ءۇشىن جاقسى ستيمۋل دەپ ويلايمىن.
– قازاق جازۋشىلارىمەن قاي كەزدەن تانىسسىز؟
– وسىدان 33 جىل بۇرىن ۆلاديۆوستوكتا جاس اقىنداردىڭ ون ءۇشىنشى فەستيۆالى ءوتىپ جاتقان. سوندا قازاق اقىنى باقىتجان قاناپيانوۆپەن تانىستىم. ءبىر-بىرىمىزگە مەكەن-جايىمىزدى, ولەڭدەرىمىزدى بەردىك. سودان ءبىراز ۋاقىت وتكەندە ماعان الماتىدان قالاماقى كەلدى. ءۇش اي ءومىر ءسۇرىپ, وتباسىن ەركىن اسىراۋعا جەتەتىندەي اقشا ەدى. قالاي راحمەت ايتامىن دەپ جۇرگەندە, ءبارى وزگەرىپ كەتتى. ءبىر-بىرىمىزدەن كوز جازىپ قالدىق. 2010 جىلى اياق استىنان ەرەۆاننان باقىتجاندى كەزدەستىرىپ قالدىم. ارادا 25 جىل وتكەن. ءبىر-ءبىرىمىزدى ۇمىتۋعا اينالعانبىز. بىراق ءتۇرىن بىردەن تانىپ: «باقىتجانبىسىڭ؟» دەسەم, ول دا تانىپ, قۇشاقتاسا كەتتىك. مەن ونىڭ ولەڭدەرىن الىپ, اۋدارىپ, «گراكان تەرت» دەگەن ادەبي گازەتىمىزگە باستىم. ەندى وسى جەرگە ونىڭ ارميان تىلىندەگى كىتابىن اكەلدىم.
– باسقا قازاق قالامگەرلەرىنەن كىمدى بىلەسىز؟
– م. اۋەزوۆتىڭ «اباي جولىمەن», جۇبان مولداعاليۆتىڭ ولەڭدەرىمەن تانىسپىن. بىراق كوپ اقىن-جازۋشىلاردى تانيمىن دەپ ايتا المايمىن. ماعان قازاق جاستارى قىزىق. قازىرگى قازاق جاستارى قالاي جازادى ەكەن سوعان قىزىعامىن.
– ءبىزدىڭ دە ادەبيەتىمىز كوپجانرلى, تالانتتى جاستارى دا كوپ. «اق وردالى استانا» فەستيۆال اياسىندا ءبىر بولىگىمەن تانىستىڭىز دەپ ويلايمىن.
– ارينە, ەرلان ءجۇنىس, باۋىرجان قاراعىز ۇلى, اقبەرەن ەلگەزەك, نۇرتاس تۇرعانبەك, بەكزات سماديار, ەلامان حاسەن سياقتى جاستارمەن تانىسىپ, ولەڭدەرىن تىڭدادىم. باسقا دا قازاق اقىندارىمەن تانىسىپ, ەندى بايلانىس ۇزبەۋگە كەلىسىپ جاتىرمىز. وسىنداي شارا ۇيىمداستىرعان قازاقستان بيلىگىنە, قازاقستان جازۋشىلار وداعىنا راحمەت. ءبىز ءبىر-ءبىرىمىزدى اۋدارۋ ارقىلى وسەمىز.
– اڭگىمەڭىزگە راحمەت.
اڭگىمەلەسكەن باعاشار تۇرسىنباي ۇلى,
«ەگەمەن قازاقستان»