مەيرام كۇندەرى ەلىمىزدىڭ ءار وڭىرىندە اتا زاڭىمىزدىڭ ايشىقتى مەرەكەسىنە ارنالعان ءتۇرلى دەڭگەيدەگى ءىس-شارالار سالتانات قۇردى. ارۋ قالا الماتىدا دا كونستيتۋتسيا كۇنىنە وراي مەرەكەلىك كەش ءوتتى. رەسپۋبليكا سارايىندا شىمىلدىعىن تۇرگەن دۋماننىڭ باستى ەرەكشەلىگى سول – تەك قانا ۇلتتىق ناقىشتاعى مۋزىكالىق شىعارمالار ورىندالىپ, مەگاپوليستەگى ەلەۋلى جەتىستىكتەر سارالاندى.
كەش شىمىلدىعىن اشقان قالا باسشىسى باۋىرجان بايبەك العاشقى كونستيتۋتسيا ءدال وسى الماتىدا قابىلدانعانىن اتاپ ءوتتى. سوندىقتان بۇل كۇننىڭ الماتىلىقتار ءۇشىن ەرەكشە مەيرام ەكەنىن جەتكىزگەن اكىم جينالعان جۇرتشىلىقتى مەرەيلى مەرەكەمەن قۇتتىقتادى.
رەسپۋبليكا سارايىن لىق تولتىرعان كورەرمەندەر تامىرى تەرەڭدە جاتقان حالىق اندەرىمەن سۋسىنداپ, ءتىپتى كەيبىرىن ونەرپازدارمەن قوسىلا شىرقادى. دومبىرا شاناعىنان توگىلگەن كۇمبىرلەگەن كۇي اسەم كەشتىڭ اجارىن ارتتىرا ءتۇستى. سونداي-اق, كەش بارىسىندا ەلىمىزدىڭ تاۋەلسىزدىك جىلدارىندا ءجۇرىپ وتكەن سان قيلى جولىنان سىر شەرتەتىن ارنايى بەينەروليكتەر دە كورەرمەن نازارىنا ۇسىنىلدى.
– ەلىمىزدىڭ ەڭ ۇلكەن مەرەكەسى – كونستيتۋتسيا كۇنى. ساناۋلى جىلدار ىشىندە جاس مەملەكەتىمىز ۇلكەن جەتىستىكتەرگە قول جەتكىزدى. ەڭ ءبىرىنشى, بۇل ءۇشىن پرەزيدەنتىمىز باستاعان اتقا قونعان ازاماتتارعا راحمەت. مەملەكەت باسشىسىنىڭ باستاۋىمەن بۇگىنگى جەتىستىك ەلىمىزدى دامىعان 30 ەلدىڭ قاتارىنا اكەلە جاتىر. بارلىق تابىستار حالقىمىزدىڭ ەڭبەگى, ەلىمىزگە ءتاڭىردىڭ بەرگەن سىيى, – دەيدى الماتى قالالىق قوعامدىق كەڭەس مۇشەسى شميت يلياسوۆ.
جينالعان قاۋىم الدىندا قالاداعى بىرقاتار جەتىستىكتەرگە توقتالعان مەگاپوليس باسشىسى ەلباسىنىڭ باستاماسىمەن ىسكە قوسىلعان «7-20-25» باعدارلاماسى بويىنشا الماتىدا 5,1 ملرد. تەڭگەگە تۇرعىن ءۇي نەسيەسىنىڭ 36%-ى بەرىلگەنىن اتاپ ءوتتى. ونىڭ ۇستىنە ەلىمىزدە ۇسىنىلعان 1,5 مىڭ پاتەردىڭ 40% -ى وسى الماتىعا تيەسىلى. «ەلباسىنىڭ «بەس الەۋمەتتىك باستاماسى» بويىنشا تاياۋداعى ءۇش جىل ىشىندە 37 جاتاقحانا سالىنادى. قازىردىڭ وزىندە 4 مىڭ ورىندى 7 نىساننىڭ قۇرىلىسى باستالدى. ولاردىڭ تورتەۋى بيىلعى جىلى پايدالانۋعا بەرىلەدى. ءوز كەزەگىندە «نۇرلى جەر» مەملەكەتتىك باعدارلاماسى قالادا تۇرعىن ءۇي سالۋ دەڭگەيىن 7,5%-عا دەيىن كوتەردى. بۇل وسى جىلدىڭ 7 ايى ىشىندە 1 ملن. شارشى مەتردەن استام ءۇي سالىنعانىن كورسەتەدى», دەدى ول.
ايتا كەتەرلىگى, «الماتى جاستارى» قالالىق تۇرعىن ءۇي باعدارلاماسى بويىنشا سوڭعى ەكى جىلدا قالا بيۋدجەتىنەن 3 ملرد. تەڭگە بولىنگەن. وتكەن جىلى 100-دەن استام جاس وتباسى جەڭىلدەتىلگەن جاعدايدا پاتەر العان بولسا, بيىلعى جىلى بۇل كورسەتكىش ەكى ەسەگە ۇلعايماق.
ارمان وكتيابر,
«ەگەمەن قازاقستان»
الماتى