تابيعاتپەن تامىرلاس تالعام

جۇرتشىلىقتىڭ نازارىنا ۇسىنىلعان 50-گە جۋىق تۋىندىدا «اق قايىڭدار» ولكەسىنىڭ تىلمەن جەتكىزە الماس سۇلۋ تابيعاتى, جان جادىراتار, ومىرگە ىنتىقتىرار, ادام بويىندا تولقىنىستى سەزىم­دەر تۋدىرار عاجايىپ كەلبەتى, ىشكە بۇككەن تىلسىم سىرلارى ءار قى­رىنان بەينەلەنىپ, اتا­مەكەن­گە, قورشاعان ورتاعا دەگەن ەرەكشە سۇيىسپەنشىلىك, پەر­زەنت­­تىك ماحاببات انىق اڭعارى­لادى. جىل مەزگىلدەرىنە ارنال­عان «ورمانداعى كەش», ء«بيشى قايىڭ­دار», «ەسىل وزەنى جاعا­سىندا», تاعى باسقا شىعارمالارى اۆتورعا ءتان قولتاڭبانى ايشىقتاي تۇسەدى.

جەكە كاسىپكەرلىكپەن شۇعىل­داناتىن ۆياچەسلاۆ ءبوريسوۆيچتىڭ حوببيلارى كوپ. بالىق اۋلاۋمەن, اڭشىلىقپەن, سپورتپەن اينالىسادى. دەسەك تە سۋرەت سالۋ ءومىرىنىڭ بولىنبەس ءبىر بولشەگىنە اينالىپ كەتكەنىن, ىلكىمدى ىسىنە كىرىسكەندە بار دۇنيەنى ۇمىتىپ, ايرىقشا ءلاززات, رۋحاني كۇش الاتىنىن ءوزى دە جاسىرمايدى. ءبىر كارتيناسى قازاقستان پرەزيدەنتىنىڭ رەزيدەنتسياسىندا, ال ەندى ءبىرى لەونيد ياكۋبوۆيچ جۇرگىزەتىن «تاڭعاجايىپ الاڭ» تەلەحابارىنىڭ مۋزەيىندە ساق­تاۋلى. تمد مەن ەۋروپا ەلدەرى دە سۇراتىپ العان كورىنەدى. استانا­دا ۇيىمداستىرىلعان شىعار­­ما­شى­لىق كەشىندە بىر­نەشە تۋىندىسى قولما-قول ساتى­لىپ كەتىپ­تى. وسىدان-اق ارنايى وقۋ ورنىن تاۋىسپاسا دا ونەرسۇيەر قاۋىم ورتاسىندا تانى­مال­دى­عىن, بويعا قونعان تالان­تىنىڭ ارقا­سىندا كاسىپقوي سۋرەت­شى دارە­جەسىنە كوتەرىلگەنىن باعام­داۋعا بولادى. تابيعات-انا­نىڭ تاماشا كورىنىستەرىن قىل­قالام ارقىلى «سويلەتە» بىلگەن ونىڭ قارىم-قابىلەتى وتان الدىن­داعى ازاماتتىق بورىشىن وتەپ جۇر­گەندە تانىلىپتى. اۋەس­قوي­لىق كوڭىل كۇي كەيىن كەلە قالىپ­تى ماشىققا اۋىسىپ, سودان بەرى سۇيىكتى تاقىرى­بىنان ءبىر ەلى اجى­راعان ەمەس. مۇراجاي قىز­مەت­­كەر­لەرى ونى ورىستىڭ اتاق­تى قىل­قالام شەبەرى يۆان شيشكينگە ۇقسا­تىپ, «تۋعان جەردىڭ جىرشى­سى» دەيدى ەكەن. قازىر ونىڭ قورىن­دا ءبىر مىڭنان استام كارتينا بار.

ۆ.سميرنوۆ قازاقستان سۋرەت­شىلەر وداعىنىڭ مۇشەسى رەتىندە شىعار­ما­شىلىق تاجىري­بەسىن ءوز جولىن قۋعان شاكىرت­تەرى­مەن ءبولىسىپ, ۇيرەتۋدى جالعاس­تىرىپ كەلەدى.

ءومىر ەسقالي, «ەگەمەن قازاقستان» سولتۇستىك قازاقستان وبلىسى