تامىز ايىنىڭ سوڭعى جەكسەنبىسى قاراعاندىلىقتار ءۇشىن باستى مەرەكە كۇندەرىنىڭ ءبىرى. كەنشىلەر استاناسى شاحتەر كۇنىن اتاپ وتەدى. ءداستۇرلى مەرەكەگە سوڭعى كۇندەرى جيىلەگەن جاۋىن-شاشىن بوگەت بولا المادى. بۇل جولى دا نەگىزگى دۋمان قاراعاندىنىڭ ورتالىق ساياباعىندا باستالىپ, شاحتەرلەر كوپتەپ تۇراتىن قاناتتاس ساران, اباي, شاحتينسك قالالارىندا دا ەرەكشە سالتاناتپەن مەرەكەلەندى. ال وبلىس ورتالىعىنداعى كەنشىلەر مادەنيەت سارايىندا اتاۋلى كۇنگە وراي جيىن بولىپ, شاحتەرلەردى ماراپاتتاۋ ءراسىمى ءوتتى.
– سىزدەرگە جاساپ وتىرعان وراسان ەڭبەكتەرىڭىز ءۇشىن العىس ايتقىم كەلەدى. بيىل «ارسەلورميتتال تەمىرتاۋ» اق باسشىلىعىمەن كەلىسىمگە قول جەتكىزىپ, رەسمي قۇجاتقا سايكەس, كومپانيا ءوندىرىس نىساندارىنا ءۇش جىل ىشىندە 305 ملرد تەڭگە ينۆەستيتسيالايتىن بولدى. بۇل قاراجات شاحتالاردى دامىتۋعا, ەڭبەككەرلەردىڭ قاۋىپسىزدىگىن ارتتىرۋعا جۇمسالماق. كاسىبي مەرەكەلەرىڭىزبەن شىن جۇرەكتەن قۇتتىقتايسىن, –دەدى سالتاناتتى جيىننىڭ كىرىسپەسىندە قاراعاندى وبلىسى اكىمىنىڭ ورىنباسارى الماس ايداروۆ.
شاحتەرلەر مەن ەڭبەك ارداگەرلەرىن «ارسەلورميتتال تەميرتاۋ» اق-نىڭ اتقارۋشى ديرەكتورى ۆاديم باسين دە كومپانيا باسشىلىعىنىڭ اتىنان ارنايى قۇتتىقتادى.
–بۇگىنگى كۇن قاراعاندى ءۇشىن ەرەكشە, ويتكەنى بۇل وسى ءوڭىردىڭ نەگىزىن قالاۋشى شاحتەر ەڭبەگىنىڭ مەرەكەسى, –دەدى ول.–وسىنداعى مىڭداعان ادامداردىڭ ءومىرى شاحتەردىڭ ۇلكەن قۇرمەتكە لايىق اۋىر ەڭبەگىمەن بايلانىستى. وسى ءوڭىردىڭ يگىلىكتەرى تىكەلەي سىزدەردىڭ قاجىرلى ەڭبەكتەرىڭىزدىڭ جەمىسى. اسىرەسە, ارداگەر شاحتەرلەرگە العىسىمىز شەكسىز, سىزدەردىڭ ارقالارىڭىزدا قازىر ءبىزدىڭ قالىپتاسقان ەڭبەك داستۇرلەرىمىز, سىزدەردىڭ جولدارىڭىزدى قۋعان ءىزباسارلار بار.
وسىدان كەيىن بىرقاتار كەنشىلەرگە ءتۇرلى ماراپاتتار تابىس ەتىلدى. «تەنتەك» شاحتاسىنداعى كونۆەيەرلىك كولىك ۋچاسكەسىنىڭ باسشىسى ر.ۆالەەۆ; تازارتۋ كەنجارىنىڭ جۇمىسشىلارى گ.ۆيگوۆسكي (لەنين اتىنداعى شاحتا), ل.كوتوۆ («شاحتينسك» شاحتاسى), ب.ماحامبەتوۆ ( «اباي» شاحتاسى), س.چەرنىشوۆ (ت.كۇزەمباەۆ اتىنداعى شاحتا); پروحودچيكتەر و.پروسكۋرنين (كوستەنكو اتىنداعى شاحتا) مەن ق.مۇرىنباەۆ («قازاقستان» شاحتاسى), «ساران» شاحتاسىنىڭ جەر استى ەلەكترسلەسارى ي.سۆيريدوۆ ءى دارەجەلى «شاحتەر داڭقى» بەلگىسىمەن ماراپاتتالدى. سونىمەن قاتار, وسى بەلگىنىڭ ەكىنشى دارەجەسىمەن 17 شاحتەر, ءۇشىنشى دارەجەسىمەن 25 شاحتەر ناگرادتالدى.
ال ءۇش دارەجەلى «ەڭبەك داڭقى» بەلگىسىنىڭ ءار دارەجەسىمەن ون ەكى ادامنان, بارلىعى 36 شاحتەر ماراپاتتالدى. سونداي-اق, ونداعان كەنشىلەردىڭ ەڭبەگى مەرەكە ۇستىندە قاراعاندى وبلىسى اكىمىنىڭ قۇرمەت گراموتالارىمەن جانە العىس حاتتارىمەن اتالىپ ءوتتى.
سالتاناتتى جيىن سوڭى مەرەكەلىك كونتسەرتكە ۇلاستى. شاحتەرلەر الدىندا بەلگىلى ونەرپازدار ارايلىم جۇكەنوۆا مەن ەرشات قوناقباەۆ, تاتتىمبەت اتىنداعى اكادەميالىق ۇلت اسپاپتارى وركەسترى, «مەرەي» ءانسامبلى جانە وسى مەرەكەگە وراي الماتىدان ارنايى شاقىرىلعان تانىمال ءانشى ءالي وقاپوۆ ونەر كورسەتتى.
قايرات ءابىلدا,
«ەگەمەن قازاقستان»
قاراعاندى