باتىس قازاقستان وبلىسىندا شالعاي ەلدى مەكەندەردى ورتتەن قورعاۋ ماقساتىندا 12 ءورت ءسوندىرۋ بەكەتى قۇرىلدى. ولار راديۋسى 20 شاقىرىم اۋماقتاعى 40-تان استام ەلدىمەكەننىڭ قاۋىپسىزدىگىن قامتاماسىز ەتپەك. بۇل جونىندە باتىس قازاقستان وبلىستىق توتەنشە جاعدايلار دەپارتامەنتى باستىعىنىڭ ورىنباسارى, ازاماتتىق قورعاۋ مايورى نۇرلان تاۋبەكوۆ مالىمدەدى.
بىلتىر باتىس قازاقستان وبلىسىندا دالا ءورتى ءجيى شىعىپ, 10 مىڭ گەكتارداي جەر كۇلگە ورانعان ەدى. بيىل جاز باستالعالى 3224 گا دالا, 80,7 گا ورمان ورتەندى دەيدى توتەنشەلىكتەر. بيىلعى قۋاڭشىلىق, مال ازىعىنىڭ تاپشىلىعى جاعدايىندا از ءورتتىڭ دە زاردابى مول بولعالى تۇر.
- 2018 جىلى ورمان جانە دالا ورتتەرىنىڭ الدىن الۋ جانە جويۋ ءۇشىن بىرقاتار ءىس-شارا اتقاردىق. بولۋى مۇمكىن قاتەردى الدىن الا جوسپارلاپ, توتەنشە جاعدايلاردىڭ الدىن الۋ جانە جويۋ جونىندەگى كوميسسيا وتىرىسى وتكىزىلدى. وبلىس اۋماعىندا عارىشتىق مونيتورينگ جۇرگىزۋ ءۇشىن «عارىش ساپارى» ۇق اق-مەن كەلىسىم-شارت جاسادىق, وعان6,5 ملن. تەڭگە ءبولىندى. ترانسشەكارالىق اۋماقتاردا تابيعي ورتتەردى جويۋ رەسەي فەدەراتسياسى توتەنشە جاعدايلار مينيسترلىگى شەكارالىق گۋبەرنيالارىمەن كەلىسىپ, بىرلەسكەن كوماندالىق-شتابتىق جاتتىعۋ وتكىزىلدى. وسىنىڭ ءبارى ءوزىنىڭ وڭ ناتيجەسىن بەرىپ جاتىر, - دەيدى نۇرلان تاۋبەكوۆ.
شالعاي ەلدىمەكەندەردى ورتتەن قورعاۋ بەكەتتەرى بۇگىندە ءبورلى اۋدانىنىنىڭ وسپەن, اقسۋ, كيروۆ اۋىلدارىندا, زەلەنوۆ اۋدانىنىڭ ۇلكەن شاعان, ەگىندىبۇلاق اۋىلدارىندا, سونىمەن قاتار تەرەكتى اۋدانىنىڭ اڭقاتى اۋىلىندا, قازتالوۆ اۋدانىنىڭ بولاشاق اۋىلىندا, سىرىم اۋدانىنىڭ توعاناس اۋىلىندا, اقجايىق اۋدانىنىڭ العاباس اۋىلىندا, شىڭعىرلاۋ اۋدانىنىڭ لۋبەن اۋىلىندا, تاسقالا اۋدانىنىڭ 2-شەجىن اۋىلىندا جانە بوكەيوردا اۋدانىنىڭ ۇيالى اۋىلىندا قۇرىلعان.
وڭىردە تابيعي ءورتتىڭ الدىن-الۋ جانە ءسوندىرۋ ءۇشىن قازىرگى ۋاقىتتا 150 ەرىكتى ورتكە قارسى قۇرالىم قۇرىلعان. ەرىكتى قۇرالىمدار قۇرامىندا 2966 ادام قىزمەت ەتەدى. ولارعا 9 اۆتوتسيستەرنا, 448 باسقا تەحنيكا, 1701 اسپالى ءورت ءسوندىرۋ قۇرالى جانە 105 موتوپومپا بەرىلگەن.
باتىس قازاقستان وبلىستىق توتەنشە جاعدايلار دەپارتامەنتى بقو ءىىد جەرگىلىكتى پوليتسيا قىزمەتى, باتىس قازاقستان وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسى قىزمەتكەرلەرىمەن بىرگە ورمان القاپتارىندا, تابيعي دەمالىس ورىندارىندا رەيد جۇرگىزىپ, ورماندا وت جاققان تارتىپبۇزۋشىلارعا جالپى كولەمى 265 100 تەڭگەلىك 22 حاتتاما تولتىرعان ەكەن.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان