ورال قالاسىندا قازاقستاننىڭ حالىق ءارتيسى, مەملەكەتتىك سىيلىقتىڭ لاۋرەاتى, ءانشى-كومپوزيتور ەسكەندىر حاسانعاليەۆتىڭ اندەرىن ورىنداۋشىلاردىڭ ح حالىقارالىق «اتامەكەن» ءان فەستيۆالى ءوتتى.
باتىس قازاقستان وبلىسى اكىمىنىڭ قولداۋىمەن وتەتىن «اتامەكەن» ءان فەستيۆالى ەڭ العاش 2000 جىلى ۇيىمداستىرىلعان بولاتىن. بۇعان دەيىن ەكى جىلدا ءبىر مارتە وتكىزىلىپ كەلگەن ونەر بايقاۋى ەندى جىل سايىن وتەتىن بولدى. بۇل شەشىمدى ءوڭىر باسشىسى التاي كولگىنوۆ بايقاۋدىڭ سالتاناتتى اشىلۋىندا جاريا ەتتى.
فەستيۆالگە قازاقستاننىڭ تۇكپىر-تۇكپىرىنەن جانە رەسەيدەن 30-عا جۋىق جاس ءانشى قاتىستى. رەسەي فەدەراتسياسىنىڭ استراحان وبلىسى ۆولودار اۋدانىنداعى التىنجار اۋىلىنان كەلگەن ديانا جيەناليەۆا قۇرمانعازى ساعىرباەۆ اتىنداعى ايماقتىق مادەني ورتالىقتا قىزمەت ەتەدى ەكەن. ەسكەندىر حاسانعاليەۆتىڭ «كەلشى, كەلشى, بالاشىم!» ءانىن بالا كۇنىنەن ءسۇيىپ ايتادى ەكەن. جاس ءانشى بولاشاقتا تاريحي وتانىندا وتەتىن ونەر بايقاۋلارىنا تۇراقتى قاتىسىپ تۇرۋ ءۇشىن قازاقستاندىق ارىپتەستەرىمەن تىعىز قارىم-قاتىناس ورناتقانىنا قۋانىشتى.
قۇرامىندا ەسكەندىر حاسانعاليەۆ, قازاقستان رەسپۋبليكاسىنىڭ ەڭبەك سىڭىرگەن قايراتكەرى, چايكوۆسكي اتىنداعى الماتى مۋزىكالىق كوللەدجىنىڭ ديرەكتورى ءبىرجان حاسانعاليەۆ, «ەرەن ەڭبەگى ءۇشىن» مەدالىنىڭ يەگەرى, ءانشى مارات ساربوپەەۆ پەن جاسكەلەڭ عايساعاليەۆ, ءى حالىقارالىق «اتامەكەن» فەستيۆالىنىڭ ءبىرىنشى ورىن ميەگەرى, بەلگىلى ءانشى تاڭات جەكسەنباەۆتار بولعان قازىلار القاسى بيىلعى مەرەيتويلىق بايقاۋدىڭ باس جۇلدەسىنە الماتى قالاسىنان كەلگەن بەكزات ابيتوۆ لايىق دەپ شەشتى. وعان 750 مىڭ تەڭگە كولەمىندە اقشالاي جۇلدە بۇيىردى. ءى ورىنعا تۇركىستان وبلىسىنان كەلگەن «سارىن» توبى شىقتى. ءىى ورىندى ورالدىق دامير ساتىباەۆ پەن اتىراۋلىق مۇراتبەك جۇماشەۆ ءبولىستى. اتىراۋلىق ەرجان مىرزاحمەتوۆ, تارازدىق فاريزا دوسبولوۆا, شىعىسقازاقستاندىق نۇربول چەرۋباەۆ جۇلدەلى ءىىى ورىن يەگەرى اتاندى.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان
سۋرەتتى تۇسىرگەن رافحات حالەلوۆ