ءماجىلىس دەپۋتاتتارى, «نۇر وتان» پارتياسى دەپۋتاتتىق فراكتسياسىنىڭ مۇشەلەرى زاۋرەش امانجولوۆا , باقىتگۇل حامەنوۆا جانە نۇرلان دۋلاتبەكوۆ جامبىل كەلىپ ايماقتاعى الەۋمەتتىك جانە ونەركاسىپتىك نىسانداردى ارالاپ, ءوڭىر تىنىسىمەن تانىستى.
سونداي-اق,ەلباسى باستامالارىنىڭ ورىندالۋ بارىسى, اۋىل شارۋاشىلىعى, كاسىپكەرلىكتى دامىتۋ, شاعىن نەسيەلەۋ, مەكتەپتەردىڭ وقۋ جىلىنا دايىندىعى بارىسىنان حاباردار بولدى. دەپۋتاتتار اۋەلى جامبىل اۋدانى كولقاينار اۋىلدىق وكرۋگىندەگى «دامۋ» كاسىپورىنىنا ات باسىن بۇردى. ەلىمىزدىڭ يندۋستريالدى-يننوۆاتسيالىق دامۋ باعدارلاماسى اياسىندا قولعا الىنعان قۇس فابريكاسى حالىققا تازا ءارى ساپالى ءونىم ۇسىنىپ وتىر.
وسى كۇنى «نۇرلى جەر» باعدارلاماسى بويىنشا سالىنىپ جاتقان كوپپاتەرلى تۇرعىن ءۇيدىڭ قۇرىلىس جۇمىستارىمەن تانىستى. ءماجىلىس دەپۋتاتى باقىتگۇل حامەنوۆا «7-20-25» باعدارلاماسىنا كەڭىنەن توقتالا كەلىپ:
- ەلباسىنىڭ بەس الەۋمەتتىك باستاماسى اياسىندا قۇرىلعان «7-20-25» باعدارلاماسى ءار وتباسىنا زور مۇمكىندىك بەرەدى. باسپانالى بولۋ ءۇشىن العاشقى جارنانىڭ كولەمى دە 20 پايىزعا دەيىن تومەندەتىلگەن. بۇل تۇرعىندار ءۇشىن ۇلكەن جەڭىلدىك. جەرگىلىكتى اكىمدىككە, جاۋاپتى مەملەكەتتىك ورگاندارعا وسى باعدارلامانىڭ ارتىقشىلىقتارى جايلى حالىقتى كەڭىنەن اقپاراتتاندىرۋ جۇمىستارىن جانداندىرۋ قاجەت, - دەپ اتاپ ءوتتى.
ودان ءارى حالىق قالاۋلىلارى اۋداندىق «رۋحاني جاڭعىرۋ» جوبالىق ءوفيسىنىڭ جۇمىسىمەن جانە اۋدان ورتالىعىنداعى ب.مومىش ۇلى اتىنداعى ورتا مەكتەپتىڭ وقۋ جىلىنا دايىندىعىمەن تانىستى.
سونىمەن قاتار, دەپۋتاتتار ورتالىق ەمحانانىڭ قىزمەتكەرلەرىمەن كەزدەسىپ, ناۋقاستارمەن تىلدەسىپ, وزدەرىنىڭ جۇمىس ساپارى اياسىنداعى ماقسات-مىندەتتەرىن ءتۇسىندىردى.