تاياۋدا سەمەي قالاسىنىڭ جاستار رەسۋرستىق ورتالىعىنىڭ ۇيىمداستىرۋىمەن ورتالىق ساياباقتا مەرەكەلىك جيىن ءوتتى. جيىنعا كەلگەن جاستاردىڭ قۋانىشىندا شەك جوق, ۇلكەن-كىشىنىڭ بارلىعى باس قوسىپ ارقا-جارقا بولىستى.
– شارامىزعا سەمەيدىڭ 100-گە جۋىق جاستارى قاتىستى, – دەيدى سەمەي قالالىق جاستار رەسۋرستىق ورتالىعىنىڭ مامانى دۋمان كەنجەعازين. ونىڭ ايتۋىنشا, «دومبىرا Party» سايىسىندا جاستار دومبىرانىڭ قۇلاعىندا شەبەر وينايتىندىقتارىن بايقاتتى. قوس ىشەكتى ۇلتتىق اسپاپتىڭ ءۇنى ورتالىق ساياباق ىشىندەگى قاريالارعا قاتتى ۇناعان. شارا بارىسىندا كىشكەنتاي ۇل بالالار ءۇشىن «اسىق Party», قاربىز جەۋدەن جارىسقا تۇسكەن «قاربىز Party» جارىستارى تۇرعىندارعا ەرەكشە قۋانىش سىيلادى.
«باۋىرساق شوۋ» ينتەللەكتۋالدىق ويىنى دا قىزىقتى ءوتتى. بۇل جەردە قويىلعان ينتەللەكتۋالدى سۇراققا دۇرىس جاۋاپ بەرگەن ءار جاسقا مولىنان باۋىرساق بەرىلدى.
– شاراعا قاريالار دا, كىشكەنتاي بۇلدىرشىندەر دە كەلىپ قىزىعا قاتىسىپ جاتىر, – دەيدى جاستار رەسۋرستىق ورتالىعىنىڭ مامانى دۋمان كەنجەعازين, – ولارعا دومبىرا تارتۋدى, اسىق اتۋدى ۇيرەتتىك. ۇلتتىق ونەرىمىزدى جالعاستىرۋشى جاس ۇرپاقتىڭ قاتارى ارتا بەرۋى كەرەك. بالدىرعاندار سونداي-اق ءوزارا جارىسىپ سىيلىقتارىن الدى.
بەلسەنە قاتىسقان جاستارعا ماراپاتتار تابىس ەتىلىپ, كەش سوڭى كوڭىلدى بيىمەن جالعاسىن تاپتى.
راۋشان نۇعمانبەك,
جۋرناليست
سەمەي