عىلىمي-تەحنيكالىق ۇدەرىستەر قارقىندى دامىعان كەزەڭدە ەلىمىزدىڭ ءبىلىم سالاسىنا اۋقىمدى مىندەتتەر جۇكتەلۋدە. وسى ورايدا «تىلدەردىڭ ءۇش تۇعىرلىعى» مادەني جوباسىن جۇزەگە اسىرۋعا بايلانىستى ءارى جاھاندىق ەكونوميكا جاعدايىندا عىلىمنىڭ ءتىلىن اعىلشىن تىلىندە يگەرۋدىڭ ماڭىزى زور ەكەندىگىن ۋاقىت دالەلدەپ وتىر.
الماتى قالاسىنداعى ءبىلىم بەرۋدىڭ جاڭاشا ءادىس-تاسىلدەرىن تەرەڭ مەڭگەرىپ, وقۋ مەن تاربيەنى زاماناۋي تالاپتارعا ساي ۇشتاستىرىپ وتىرعان «جاڭا عاسىر» №175 گيمنازياسىندا اعىلشىن ءتىلىن مەڭگەرۋدىڭ وزىندىك باعىت-باعدارى جولعا قويىلعان. باسەكەگە قابىلەتتى ءبىلىم بەرۋدە ءارى وقۋشىلاردىڭ ءتىلدى جىلدام مەڭگەرۋىنە بايلانىستى ءاربىر ءپاندى وقىتۋ ماسەلەسىندە وزىق تاجىريبەلەرگە نازار اۋدارىلادى. وسى ورايدا فيزيكا ءپانىنىڭ وقىتۋشىسى رەتىندە سLIL ادىستەمەسىنىڭ تيىمدىلىگىنە توقتالىپ وتكەندى ءجون كورىپ وتىرمىن. اتالعان ءادىس بارىسىندا مۇعالىمنىڭ از سويلەپ, وقۋشىلاردىڭ ءبىر-بىرىمەن پىكىرلەسۋ داعدىسىن قالىپتاستىرۋ باسشىلىققا الىنادى. پاندەردى اعىلشىن تىلىندە يگەرۋدىڭ ماڭىزدىلىعى زور.
وسى باعىتتا فيزيكانى وقىتۋ بارىسىندا ۇستازدان كوپ ىزدەنىس تالاپ ەتىلەدى. قاجەتتى ماتەريالداردى ىزدەۋ, وقۋشىعا باعىت-باعدار بەرۋ, وسى سالاعا قاتىستى جەتىستىكتەر مەن جاڭالىقتاردان حاباردار بولىپ وتىرۋ ءارى وسىنىڭ بارلىعىن اعىلشىن تىلىندە مەڭگەرۋگە مۇمكىندىك جاساۋ – ءار ۇستازدىڭ مىندەتى. CLIL پاندىك-تىلدىك ءبىلىم بەرۋ ادىستەمەسىنىڭ تيىمدىلىگى نەگىزگى ءپان مەن شەت ءتىلىن قاتار وقىتۋدا جاتىر. وقۋشى وسى پانگە ءتان تەرميندەردى, بەلگىلى ءبىر تىلدىك قۇرىلىمداردى وقىپ يگەرىپ, پاندىك تەرمينولوگيا ارقىلى سوزدىك قورىن جەتىلدىرىپ, دامىتا الادى. وسى تۇرعىدان العاندا تەرميندەردى ەستە ساقتاۋ ءۇشىن «From Start to Finish» ويىنىن ويناتۋدىڭ ماڭىزى جوعارى. ويىن كەزىندە وقۋشىلار توپتارعا ءبولىنىپ, فيزيكالىق تەرميندەردىڭ قازاقشا, اعىلشىنشا اۋدارمالارىن دۇرىس تاۋىپ, باسپالداق تۇرىندە ورنالاستىرۋ ارقىلى ەستە ساقتاي الادى. «Find the terminology» (تەرميندەردى تاپ) ويىن ادىسىندە اعىلشىن ارىپتەرىنىڭ ورىندارى اۋىستىرىلىپ, وقۋشى دۇرىس جازىلۋىن تابۋى قاجەت. «Puzzles» (پازلدار) ارقىلى وقۋشىلار اعىلشىن تىلىندەگى انىقتامالاردى وقىپ, سايكەس ورىندارعا تەرميندەردى جازادى. ال «Matching» (سايكەستەندىرۋ) قازاق-اعىلشىن تەرميندەرىنىڭ نەمەسە ەرەجەلەردىڭ دۇرىس سايكەستەندىرىلۋىنە نەگىزدەلگەن. «True and False» (اقيقات جانە جالعان) ويىنى بارىسىندا وقۋشىلار وزدەرى سۇراق قۇراستىرىپ, اعىلشىنشا ايتىلعان انىقتاماسىنىڭ دۇرىس نە بۇرىستىعىنا بايلانىستى ءبىر-بىرىنەن جاۋاپ الادى. «Cards» ويىن ادىسىندە تاراتىلىپ بەرىلگەن كارتوچكالارعا سايكەس قانداي تاپسىرما بەرىلگەنىن انىقتاپ, اۋدارماسىنىڭ جاۋابىن تابۋى ءتيىس.
فيزيكا ءپانىنىڭ تەرمين سوزدەرىن اعىلشىن تىلىندە ۇيرەتۋدىڭ وسىنداي ءتيىمدى جولدارىن قولدانۋ ارقىلى ءاربىر ساباق قىزىقتى وتەدى. ءارى ءادىس-ءتاسىلدىڭ ارتىقشىلىعى, وقۋشى ءبىلىم الىپ قانا قويماي, اقپارات الماسادى, توپتا وزدىگىمەن جۇمىس ىستەپ, ويىمەن بولىسۋگە, ءبىر-بىرىنەن ەركىن جاۋاپ الۋعا مۇمكىندىك الادى. جاڭارتىلعان ءبىلىم بەرۋ جۇيەسىنىڭ وزىق جەتىستىكتەرى ارقىلى ءبىلىم سالاسىنداعى جوعارى ناتيجەلەرگە جەتۋمەن قاتار دارىندى ءارى ۇلتجاندى ۇرپاق تاربيەلەۋدە ۇستازعا ۇلكەن جاۋاپكەرشىلىك جۇكتەلەدى. ال بۇل جاعدايدا مۇعالىمنىڭ كاسىبي شەبەرلىگىنىڭ جوعارى بولۋى ءلازىم.
ءاليا اناربەكوۆا,
«جاڭا عاسىر» №175 گيمنازياسىنىڭ وقىتۋشىسى