جامبىل وبلىسى, شۋ اۋدانىنىڭ ەسكى شۋ اۋىلدىق وكرۋگىنە قاراستى بەلباسار ەلدى مەكەنىندە جوبالىق قۇنى 350 ميلليون تەڭگەنى قۇرايتىن سپورت كەشەنىنىڭ قۇرىلىسى باستالدى.
ەلباسى نۇرسۇلتان نازارباەۆ ءوزىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا ۇلتتىڭ وتكەن تاريحىن ءبىلۋدى, ونى قۇرمەتتەۋدى, تۋعان جەرگە تۋ تىگىپ, اۋىلدى گۇلدەندىرۋدى مىندەتتەگەن بولاتىن. بۇگىنگى تاڭدا ەلىمىزدە اۋىل احۋالىن جاقسارتۋعا كوڭىل ءبولىنىپ كەلەدى.
جەرگىلىكتى كاسىپكەر ازاماتتار پرەزيدەنت ماقالاسىنان تۋىندايتىن مىندەتتەردى جۇزەگە اسىرۋ ماقساتىندا اۋىلدى جەرلەرگە قولداۋ كورسەتىپ, ناقتى جوسپارلاردى ىسكە اسىرۋدا. بۇگىنگى تاڭدا ەلىمىزدە «تۋعان جەرگە تۋىڭ تىك!» اكتسياسىن ءبىراۋىزدان قولداعان كاسىپكەر ازاماتتاردىڭ قاتارى ارتىپ وتىر. ەل ىشىندەگى بىرلىك پەن بەرەكەنى ارتتىرۋعا, اۋىل احۋالىن جاقسارتۋعا كاسىپكەرلەردىڭ قوسىپ وتىرعان ۇلەسى از ەمەس.
جامبىل وبلىسى, شۋ اۋدانىنىڭ ەسكى شۋ اۋىلدىق وكرۋگىنە قاراستى بەلباسار ەلدى مەكەنىندە جوبالىق قۇنى 350 ميلليون تەڭگەنى قۇرايتىن سپورت كەشەنىنىڭ قۇرىلىسى باستالدى. جوبانى ىسكە اسىرۋشى «شەبەر-بيلد» قۇرىلىس كومپانياسى. كومپانيا باسشىسى, شۋ اۋدانىنىڭ قۇرمەتتى ازاماتى بولات ساۋرانباەۆ جوبانى قولعا الۋداعى ماقسات – جاستاردى سالاماتتى ءومىر سالتىنا بەيىمدەۋ, سونىمەن قاتار, جان-جاقتى تاربيە بەرۋ ەكەنىن ايتادى. قۇرىلىسى باستالعان ەكى قاباتتى سپورت كەشەنى 400 ادامعا ارنالعان. كولەمى جارتى گەكتار جەردى الىپ جاتىر.
– بۇگىندە بىزگە قولداۋ كورسەتىپ وتىرعان جامبىل وبلىسىنىڭ اكىمى اسقار مىرزاحمەتوۆكە, شۋ اۋدانىنىڭ اكىمى قايرات دوساەۆقا العىسىمىز شەكسىز. سونىمەن قاتار سپورتشىلار ەرماحان ىبىرايىموۆ, سەرىك قوناقباەۆ, يسلام بايرامۋكوۆ, سۋرەتشى ەربولات تولەپباي, كاسىپكەر قايرات ورازبەكوۆ سياقتى ازاماتتاردىڭ دا قولداۋى بار. اۋىل – ءار قازاقتىڭ التىن بەسىگى عوي. ال اۋىلعا قولداۋ كورسەتۋ, جاستارعا ونەگە بەرۋ ءبىزدىڭ مىندەتىمىز. ەلباسى ءوزىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا تۋعان جەرگە تۋ تىگۋ كەرەكتىگىن ناقتى اتاپ كورسەتكەن بولاتىن. مىنە, ەلباسىنىڭ ماقالاسىنان تۋىندايتىن مىندەتتەردى جۇزەگە اسىرۋ اياسىندا بەلباسار ەلدى مەكەنىندە زاماناۋي سپورت كەشەنىنىڭ قۇرىلىسىن باستادىق. وسى جەردە اۋىل جاستارى سالاماتتى ءومىر سالتىن قالىپتاستىرىپ, جوعارى دەڭگەيگە قول جەتكىزىپ جاتسا, ءبىز ءۇشىن ول ۇلكەن ولجا. كەلەشەكتە بۇل سپورت كەشەنىنەن قازاق اتىن الەمگە ايگىلەيتىن سپورتشىلار شىعاتىنىنا دا كۇمان جوق, – دەيدى بولات ساۋرانباەۆ.
ءوز سوزىندە كاسىپكەر اۋىلعا ءاردايىم كومەك كورسەتۋگە دايىن ەكەنىن جەتكىزدى. كەزىندە وسى بەلباسار اۋىلىنان مەشىت پەن حالىقارالىق تالاپقا ساي ستاديون سالىپ بەرگەن بولات ساۋرانباەۆ ەندى سول جەردەن سپورت كەشەنىنىڭ قۇرىلىسىن باستاپ وتىر. الماتى قالاسى اكىمىنىڭ ورىنباسارى, تاراز قالاسىنىڭ اكىمى سياقتى جاۋاپتى قىزمەتتەر اتقارعان ازامات تۋعان جەرگە تۋ تىككەن ازاماتتار قاتارىندا بولعانىن ماقتانىش تۇتاتىنىن جەتكىزدى.
قانداي دا ءبىر يگىلىكتى ءىس قولداۋدىڭ ناتيجەسىندە عانا كورىنەدى. ماسەلەن, بەلباسار اۋىلىندا سالىنىپ جاتقان سپورت كەشەنىندە اتاقتى بوكسشى ەرماحان ىبىرايىموۆ الەمدىك دارەجەدەگى چەمپيونات وتكىزۋدى جوسپارلاسا, ەركىن كۇرەس شەبەرى يسلام بايرامۋكوۆ كۇرەس كىلەمىن سىيعا تارتۋعا ۋادە ەتىپتى. ال بەلگىلى كاسىپكەر قايرات ورازبەكوۆ اتالعان سپورت كەشەنىنە شاعىن فۋتبول جابدىقتارىن الىپ بەرۋدى, ايگىلى بوكسشى سەرىك قوناقباەۆ بوكس رينگىن سىيلاۋدى موينىنا الىپتى. بۇدان وزگە بىرنەشە قۇرىلىس كومپانيالارى قارجىلاي دەمەۋشىلىك جاساۋعا نيەتتەنىپ وتىر ەكەن. ءوز سوزىندە شۋ اۋدانىنىڭ اكىمى قايرات دوساەۆ بۇل باستاما اۋىل احۋالىن جاقسارتۋعا, جاستاردى سپورتقا باۋلۋعا سەپتىگىن تيگىزەتىنىن ايتتى.
بۇگىندە بەلباسار اۋىلىندا بەس مىڭعا تارتا حالىق تۇرادى. كەزىندە بۇل اۋىلدان 150 التىن, كۇمىس القا يەگەرلەرى مەن 9 سوتسياليستىك ەڭبەك ەرى شىققان ەكەن.
– اتالعان سپورت كەشەنىن تاراز قالاسىنان دا, شۋ اۋدانىنىڭ ورتالىعىنان دا سالۋعا بولار ەدى. الايدا اۋىلدى ۇمىتۋعا بولمايدى. اۋىلدى ۇمىتقان ادامنىڭ تامىرى جوق, قاڭباق سياقتى كەتە بەرەدى. سوندىقتان دا بۇل جاقسىلىقتىڭ ءبارى دە اۋىلعا بولسا دەدىك. سونىمەن قاتار, اۋىلدان شىققان باتىر انالار مەن ەڭبەك مايدانىندا شىنىققان اعالارىمىزدىڭ ەسىمى بىزدەر ءۇشىن ماقتانىش. ەندى, كەلەشەكتە سول كىسىلەردىڭ اتىن قالدىرۋ ءۇشىن اۋىلدان اللەيا اشساق دەگەن جوسپار بار. ول ازاماتتاردىڭ اتى-ءجونى تاسقا قاشالىپ جازىلسا, جاستارعا بۇل دا ءبىر ۇلگى-ونەگە بولاتىن ەدى, – دەيدى بولات ساۋرانباەۆ.
بەلباسار اۋىلىندا سالىنىپ جاتقان زاماناۋي سپورت كەشەنى تالاي تالانتتىڭ جولىن اشىپ, جۇلدىزىن جارقىراتاتىنى ءسوزسىز. ەلباسىنىڭ «تۋعان جەرگە تۋىڭ تىك!» اكتسياسى اياسىندا سالىنىپ جاتقان بۇل نىسان اۋىل تۇرعىندارىنىڭ دا كوپتەن كۇتكەن قۋانىشى. وسىناۋ عيماراتتى سالۋعا دەمەۋشىلىك جاساپ وتىرعان ازاماتتارعا حالىقتىڭ ايتار العىسى شەكسىز.
حاميت ەسامان,
«ەگەمەن قازاقستان»