قازاقستان رەسپۋبليكاسى پرەزيدەنتىنىڭ «بولاشاققا باعدار: رۋحاني جاڭعىرۋ» باعدارلاماسىن جۇزەگە اسىرۋ, دامىتۋ جانە الماتى قالاسىندا ەرىكتىلەر قوزعالىسىن جانداندىرۋ ماقساتىندا «لەسنايا سكازكا» تاۋ شيپاجايى-قوناقۇيى بازاسىندا «تۋعان جەر» دەپ اتالاتىن جازعى جاستار لاگەرى ءوز جۇمىسىن باستادى.
جوبانىڭ باستى ماقساتى – ءبىلىمدى ءارى بەلسەندى جاستاردىڭ شىعارماشىلىق الەۋەتىن شىڭداۋ. ولاردىڭ مادەني جانە كاسىبي قابىلەتىن ارتتىرىپ, جەكە تۇلعا رەتىندە قالىپتاسۋىنا بارىنشا جاعداي جاساۋ. «تۋعان جەر» جازعى جاستار لاگەرى وسى شاراعا قاتىسۋشىلار ءۇشىن قىزىقتى ومىرلىك تاجىريبە الۋىنا جانە ءار ازاماتتىڭ جاڭا قىرىنان تانىلۋىنا سەپتىگىن تيگىزەتىن بىرەگەي مۇمكىندىك.
بۇل كۇندەرى الماتى وبلىسى, تالعار اۋدانىنىڭ بەسقاينار اۋىلىنداعى شيپاجايدا جينالعان 16-35 جاس ارالىعىنداعى 150 ازامات الاتاۋدىڭ بوكتەرىندەگى اسەم تابيعات اياسىندا ءوز ۋاقىتتارىن ءماندى ءارى ماعىنالى, قىزىقتى ءارى ءتيىمدى ەتىپ وتكىزۋدە. بەلسەندى جاستار ءتۇرلى سالادا جەمىستى ەڭبەك ەتىپ, ەلىمىزدىڭ ەلەۋلى تۇلعالارىنا اينالعان ءوز زامانداستارىمەن كەزدەسىپ, ءتۇرلى تاقىرىپتا پىكىر الماسۋدا. سونىمەن قاتار ولاردى الداعى كۇندەرى ءتۇرلى شەبەرلىك ساباقتارى مەن ترەنينگتەر, فۋتبول جانە ۆولەيبول باسەكەلەرى, كۆن سايىسى, زياتكەرلىك «برەين-رينگتەر», مافيا ويىندارى جانە تاعى باسقا سپورتتىق جانە شىعارماشىلىق جارىستار كۇتۋدە.
– الماتى تۇرعىندارىنىڭ تەڭ جارتىسىنا جۋىعىن 16-35 جاس ارالىعىنداعى ازاماتتاردىڭ قۇرايتىنى جاسىرىن ەمەس. ءبىز جالىندى, دارىندى, اقىلدى, ءبىلىمدى, قابىلەتتى, كرەاتيۆتى جاستاردىڭ الەۋەتىن ارتتىرىپ, جان-جاقتى دامۋىنا بارىنشى جاعداي جاساۋدى كوزدەپ وتىرمىز. وسى جوسپاردى جۇزەگە اسىرۋ ءۇشىن ولاردىڭ باسىن قوساتىن ورتاق الاڭ قاجەت بولدى. بۇل يدەيانى الماتى قالاسىنىڭ اكىمدىگى تولىقتاي قولدادى. ءتۇرلى ۇيىمدار مەن كومپانيالار دا يگى ىستەن سىرت قالعان جوق. وسىلايشا, الاتاۋ بوكتەرىنىڭ ەڭ كورىكتى جەرلەرىنىڭ بىرىندە ورنالاسقان شيپاجايدا «تۋعان جەر» جاستار لاگەرى قۇرىلدى. ول جەردە جاستار ءوزارا وي ءبولىسىپ, پىكىر الماسادى. ءتۇرلى يدەيالار تۋىنداپ, سولاردى جۇزەگە اسىرۋدىڭ جولدارى قاراستىرىلادى. بۇل جوبانىڭ ءتيىمدى جاقتارى وتە كوپ. بىلتىر سول جەردە جاستار لاگەرىنىڭ العاشقى جيىنى وتسە, بيىل تاعى دا باسقوسىپ وتىرمىز, – دەيدى جاستار قوعامدىق قورىنىڭ اتقارۋشى ديرەكتورى ءبىرجان قازتۇرعانوۆ.
18 تامىزعا دەيىن سوزىلاتىن ايتۋلى شارا باعدارلاماسىندا جاستاردىڭ بەلسەندى دەمالىسىنان بولەك, ەلىمىزدىڭ تانىمال قايراتكەرلەرى مەن كاسىپكەرلەرى, اكتەرلەر مەن انشىلەر جانە سپورتشىلار قاۋىمىمەن كەزدەسۋلەر ۇيىمداستىرىلۋدا.
عالىم سۇلەيمەن,
«ەگەمەن قازاقستان»