كونۆەنتسياعا قاتىسۋشى مەملەكەتتەر باسشىلارىنىڭ قول قوياتىنىنا كۇمان از بولعانىمەن, قول قويۋ راسىمىنە دەيىن وعان تۇزەتۋلەر ەنگىزىلىپ قالا ما دەگەن كۇدىك بولعانى راس. قۇجاتتىڭ تولىق ءماتىنى مەن بولىمدەرى الدىن الا كەلىسىلدى. بارلىق مەملەكەتتىڭ مۇددەلەرىن نازارعا الا وتىرىپ, بەس ەلدىڭ سىرتقى ساياسي قۇرىلىمدارى تاباندى تۇردە مۇقيات جۇمىس ىستەپ, كاسپيدىڭ ەرەكشە قۇقىقتىق مارتەبەسىن تاراپتاردىڭ كوڭىلىنەن شىعاتىنداي ەتىپ ايقىنداپ شىقتى.
سول سەبەپتى, اقتاۋ قالاسىندا وتكەن مەملەكەتتەر باسشىلارىنىڭ كەزدەسۋى تازا سالتاناتتى ءراسىم سيپاتىندا ءوتتى دەسەك ارتىق ايتقاندىق بولماس. مۇندا بەسىنشى اقتاۋ سامميتىندە قابىلدانعان قۇجات ەشقانداي قوسىمشا تولىقتىرۋلارسىز, ءبىراۋىزدان ماقۇلداندى.
كەزدەسۋ بارىسىندا ءسوز العان مەملەكەتتەر باسشىلارى وسىعان دەيىن ۇستانىپ كەلگەن باعىتتارىن ساقتايتىندارىن جەتكىزدى. ايتىلعان ۇسىنىستاردى ساراپتاي كەلە, «كاسپيلىك ماسەلەلەر» بويىنشا بەس ەلدىڭ كونسترۋكتيۆتى ىنتىماقتاستىقتى قولدايتىنىن بايقاۋعا بولادى.
ونىڭ ۇستىنە, حالىقارالىق قۇجاتقا قازاقستان جەرىندە قول قويىلعانى يميدجدىك تۇرعىدان وتە ماڭىزدى بولىپ وتىر.
سونداي-اق ءبىز ءۇشىن كونۆەنتسيا تەڭىزدىڭ ستاتۋس-كۆوسىن بەكىتكەنىمەن دە ماڭىزدى. ياعني كاسپيدەگى ءبىزدىڭ ۇلەس سانالاتىن بولىگى بويىنشا جۇرگىزىلىپ جاتقان جۇمىستار مەن تەڭىز قويناۋىن يگەرۋگە بايلانىستى بەسجاقتى زاڭدى كەلىسىمگە قول جەتكىزدىك.
قالاي بولعاندا دا, ءسامميتتىڭ باستى قورىتىندىسى كاسپيدەگى ۇجىمدىق ويىن ەرەجەسىنىڭ نەگىزى بەس ەلدىڭ مورىمەن بەكىتىلگەندىگى بولىپ وتىر.
ورازعالي سەلتەەۆ,
ساياساتتانۋشى